हिंसा भड्किनुअघिको सम्बोधन गलत थिएन : ट्रम्प- विश्व - कान्तिपुर समाचार
कान्तिपुर वेबसाईट
AdvertisementAdvertisement

हिंसा भड्किनुअघिको सम्बोधन गलत थिएन : ट्रम्प

‘इतिहासमै अभिव्यक्ति स्वतन्त्रतामाथि सबैभन्दा आक्रमण भयो’
एजेन्सी

वासिङ्टन — अमेरिकी राष्ट्रपति डोनाल्ड ट्रम्पले इतिहासमै सबैभन्दा बढी अभिव्यक्ति स्वतन्त्रतामा आक्रमण भएको बताएका छन् । साथै उनले गत हप्ता अमेरिकी संसद्‍मा आक्रमण हुनुभन्दा अघि गरेको सम्बोधन ‘पूर्ण रुपमा उपयुक्त’ भएको स्पष्टीकरणसमेत दिएका छन् । 

साथै हिंसा भड्काएको आरोपमा डेमोक्रेटिक पार्टीले आफूविरुद्ध महाभियोगको तयारी गर्नु ‘हास्यासपद’ भएको पनि उनले बताएका छन् । जनवरी २० मा जो बाइडेनले अमेरिकी राष्ष्ट्रपतिका रुपमा शपथ ग्रहण गरेपछि ट्रम्पले ह्वाइट हाउस छाड्ने बताइएको छ ।

टेक्समा अमेरिका र मेक्सिकोको सीमामा लगाइएको पर्खालको निरीक्षणमा गएका ट्रम्पले भने, ‘अहिले जसरी अभिव्यक्ति स्वतन्त्रतामाथि आक्रमण भइरहेको छ, यस्तो यसअघि कहिल्यै भएको थिएन । २५औं संशोधनबाट मलाई कुनै खतरा छैन । यसले बाइडन र बाइडन प्रशासनलाई नै क्षति पुग्नेछ ।’

ट्रम्पले आफूले हिंसा नचाहेको उल्लेख गर्दै भनेका छन्, ‘मलाई लाग्छ, महाभियोग प्रक्रियाले हाम्रो मुलुकमा भयंकर खतरा र आक्रोश निम्त्याउँछ । म हिंसा चाहँदिनँ ।’

अहिले अमेरिकी संसद्को तल्लो सदन हाउस अफ रिप्रेजेन्टेटिभ्समा ट्रम्पलाई राष्ट्रपतिबाट हटाउने एउटा प्रस्तावमा बहस भइरहेको छ । प्रस्तावमा भनिएको छ, ‘राष्ट्रपति ट्रम्पले खुला रुपमै भीडलाई उक्साएपछि अमेरिकी संसद्‍मा आक्रमण गरियो ।’

प्रस्तावमा उपराष्ट्रपति माइक पेन्सलाई राष्ट्रपतिको जिम्मेवारी सम्हाल्न आग्रह गरिएको छ । अमेरिकी संविधानको २५औं संशोधनको व्यवस्थाबमोजिम राष्ट्रपतिले आफ्नो जिम्मेवारी निभाउन असमर्थ रहेमा उपराष्ट्रपति कार्यवाहक राष्ट्रपति बन्न सक्नेछन् । तर उपराष्ट्रपति पेन्सलेृ २५औं संशोधन लागू गर्न अस्वीकार गरेका छन् ।

जनवरी ६ मा वासिङ्टनमा आयोजित ऱ्यालीमा ट्रम्पले गत नोभेम्बरमा भएको राष्ट्रपतीय चुनावमा व्यापक धाँधली भएको कुरा दोहोऱ्याएका थिए । त्यस्तै उनले आफ्ना समर्थकलाई संसद् भवन(क्यापिटल हिल्स) तर्फ अघि बढ्न पनि आग्रह गरेका थिए । उनले समर्थकलाई सम्बोधन गर्द भनेका थिए,‘हामी क्यापिटलतर्फ जाँदैछौं । हाम्रा साहसी सिनेटर र सांसदलाई हामीले हौसला प्रदान गर्नेछौं । तपाईँहरुले शक्ति देखाउनुपर्छ र बलियो बन्नुपर्छ ।’

एयरफोर्सबाट अवकासप्राप्त एक महिला, एक प्रहरीसहित ५ जनाको मृत्यु हुने गरी भड्किएको हिंसात्मक घटनाको पछि भने ट्रम्पले आलोचना गरेका थिए । तर डेमोक्रेटिक पार्टी ट्रम्पको उक्साहटमै हिंसा भड्किएकाले उनलाई पदबाट हटाउनुपर्ने कुरामा अडिग रहेको छ ।

सम्बन्धित समाचार

के कार्यकाल सकिनुअघि नै ट्रम्पलाई ह्वाइटहाउसबाट हटाउन सकिन्छ ?

प्रकाशित : पुस २९, २०७७ ०९:१२
प्रतिक्रिया
पठाउनुहोस्

अमेरिकामा कोरोनाबाट एकैदिन ४ हजारभन्दा बढीको मृत्यु

इकान्तिपुर डेस्क

काठमाडौँ — अमेरिकामा कोरोना भाइरसको संक्रमणबाट एकैदिन ४ हजारभन्दा बढी मृत्यु भएको छ । जोन्स होप्किन्स विश्वविद्यालयको कोरोना रिसोर्स सेन्टरका अनुसार मंगलबार कोरोनाका कारण अमेरिकामा ४ हजार १ सय ९७ जनाको मृत्यु भएको हो ।

मंगलबारको पूरा तथ्यांक आइनसकेकाले यो संख्या अझै बढ्न सक्ने सीएनएनले जनाएको छ । अमेरिकामा पछिल्ला केही दिन यता औसतमा ३ हजार २ सय ३३ जनाको कोरोनाबाट मृत्यु भइरहेको छ । त्यस्तै पछिल्ला ७ दिनमा लगातार २ लाखभन्दा बढीमा कोरोना संक्रमण पुष्टि भएको छ ।

सोमबार मात्रै अमेरिकामा २ लाख ४ हजार ६ सय ५२ जनामा कोरोना संक्रमण पुष्टि भएको थियो । त्यस्तै सोमबार अमेरिकामा कोरोनाबाट १ हजार ७ सय ३१ जनाको मृत्यु भएको थियो । अमेरिकामा अहिलेसम्म कोरोनाबाट मृत्यु हुनेको संख्या ३ लाख ८० हजार नाघेको छ भने २ करोड २८ लाखभन्दा बढीमा संक्रमण पुष्टि भएको छ ।

कोरोना महामारीबाट विश्वमै सबैभन्दा बढी प्रभावित अमेरिकामा कोरोनाविरुद्ध दुई वटा खोपलाई आपत्कालीन प्रयोगका लागि अनुमति दिइएको छ । मोडर्ना र फाइजर–बायोएनटेकको गरी अमेरिकामा २ करोड ५४ लाखभन्दा बढी डोज कोरोना खोप वितरण भइसकेको छ ।

सन् २०१९ को डिसेम्बर महिनामा चीनको वुहानबाट फैलिएको कोरोना भाइरसका कारण अहिलेसम्म विश्वभर ९ करोड १५ लाखभन्दा बढी संक्रमित भइसकेका छन् । त्यस्तै संक्रमण पुष्टि भएकामध्ये ५ करोड ५ लाखभन्दा बढी निको भएका छन् । त्यस्तै कोरोनाका कारण अहिलेसम्म १९ लाख ६१ हजारभन्दा बढीको मृत्यु भइसकेको छ ।

प्रकाशित : पुस २९, २०७७ ०८:३९
पूरा पढ्नुहोस्
प्रतिक्रिया
पठाउनुहोस्
×