‘ह्वाइटहाउसको समन्वय इमानदार’- विश्व - कान्तिपुर समाचार
कान्तिपुर वेबसाईट
AdvertisementAdvertisement

‘ह्वाइटहाउसको समन्वय इमानदार’

एजेन्सी

वासिङ्टन — अमेरिकाका नवनिर्वाचित राष्ट्रपति जो बाइडेनले सत्ता हस्तान्तरणका लागि राष्ट्रपति कार्यालय ह्वाइटहाउसले गरेको समन्वय इमानदार भएको बताएका छन् । ‘यसका लागि ह्वाइटहाउस अनिच्छुक छैन र मलाई लाग्छ यो त्यस्तो हुने छैन,’ एनबीसी टेलिभिजनसँगको अन्तर्वार्तामा बाइडेनले भने ।

अमेरिकी राष्ट्रपति डोनाल्ड ट्रम्पले बाइडेनलाई सत्ता हस्तान्तरणको प्रक्रिया थाल्न चुनावको करिब ३ सातापछि सोमबार सहमत भएका थिए ।

यद्यपि उनले नोभेम्बर ३ मा भएको राष्ट्रपतीय चुनावमा आफू पराजित भएको स्वीकार गरिसकेका छैनन् । उनको पक्षले निर्वाचनमा व्यापक धाँधली भएको आरोप लगाउँदै मतपरिणामविरुद्ध कानुनी चुनौती दिएको छ तर आफू सत्तामा रहिरहने ट्रम्पको सम्भावना भने लगभग समाप्त भएको छ । पेन्सलभेनिया र नेभादा राज्यले बाइडेन विजयी भएको मंगलबार प्रमाणीकरण गरेका छन् । एक दिनअघि मिसिगन राज्यले पनि बाइडेन विजयी भएको प्रमाणित गरेको थियो ।

एनबीसी टेलिभिजनको एक कार्यक्रममा बोल्दै बाइडेनले आफूले राष्ट्रपति ट्रम्पसँग कुराकानी नगरेको भए पनि संक्रमणकालको सुरुवातका कारण आफ्नो कार्यकाल प्रभातिव हुने अपेक्षा नगरेको जनाए । ‘यो प्रक्रिया सुरु हुन केही ढिलाइ भएको हो तर हामीसँग अझै दुई महिना बाँकी छ । त्यसैले सबै काम सुरु गर्न सक्षम हुनेमा मलाई निकै राम्रो लागिरहेको छ,’ उनले भने ।

अमेरिकाको एउटा प्रशासनले अर्कोलाई महत्त्वपूर्ण सूचना र कर्तव्य हस्तान्तरण गर्ने चलन छ । यसका कारण राष्ट्रपति निर्वाचित र उनको समूह ह्वाइटहाउसमा पुगेपछि विभिन्न कार्यलाई गति दिन सक्छन् । सरकारी निकाय जनरल सर्भिसेस एड्मिनिस्ट्रेसन (जीएसए) ले आउँदो प्रशासनलाई सहयोग गर्ने गर्छ । त्यसका लागि उसले करिब ७० लाख डलरको कोष उपलब्ध गराउँछ । त्यसका साथै कार्यालय, प्रविधि र उपकरणलगायत आवश्यक सामग्री सहयोग गर्छ ।

सामान्यतः हस्तान्तरण प्रक्रिया नयाँ राष्ट्रपति निर्वाचित भएको करिब ११ सातामा सकिन्छ । सेन्टर फर प्रेसिडेन्सियल ट्रान्जिसनका अनुसार त्यो केवल एउटा पदको हस्तान्तरण मात्र नभई नयाँ राष्ट्रपतिसँगै ह्वाइटहाउस प्रवेश गर्ने ४ हजार राजनीतिक पदको पूर्ति पनि हो । सत्ता हस्तान्तरण अवधिमा कर्मचारी निर्धारण, विषयगत जानकारी प्रदान र राष्ट्रपति निर्वाचितको व्यस्त तालिकाको निर्धारणका कार्य हुन्छन् । औपचारिक रूपमा सत्ता हस्तान्तरण सुरु भएपछि नवनिर्वाचित राष्ट्रपतिको समूहद्वारा उक्त प्रक्रिया अघि बढ्छ । चुनावअघि सबै प्रमुख राष्ट्रपतीय उम्मेदवारले राष्ट्रिय सुरक्षाका केही सूचना पाउँछन् तर राष्ट्रपति पदमा निर्वाचित उम्मेदवारलाई भने राष्ट्रिय सुरक्षालगायत विषयसँग सम्बन्धित महत्त्वपूर्ण सूचना उपलब्ध गराइन्छ ।

बाइडेनले अब सुरक्षासँग सम्बन्धित महत्त्वपूर्ण जानकारी दैनिक पाउँछन् । त्यसमा भविष्यमा आउन सक्ने जुनसुकै विषयमा नयाँ प्रशासनलाई तयार राख्ने सुनिश्चितताका निम्ति निश्चित गुप्तचर सूचना पनि पर्छन् । सन् २००१ को सेप्टेम्बर ११ मा भएका आक्रमणबारे छानबिन गर्न गठित आयोगले सन् २००० को चुनावपछि सत्ता हस्तान्तरण ढिलो हुँदा त्यसले उक्त घटना रोक्न नसकिएको दाबी गरेको थियो । २००० मा मत परिणामविरुद्ध अदालतमा मुद्दा परेकाले सत्ता हस्तान्तरण सामान्य अवधिभन्दा ढिलो भएको थियो तर त्यसबेला यस पटकभन्दा निकै झिनो मतान्तर थियो । सन् २००६ मा भने जीएसएले औपचारिक रूपमा परिणाम घोषणा हुनुभन्दा निकै पहिले अर्थात् चुनावको भोलिपल्टै ट्रम्पलाई विजेताको मान्यता दिएको थियो । त्यसको भोलिपल्ट ट्रम्पले ह्वाइटहाउसमा तत्कालीन राष्ट्रपति ओबामालाई भेटेका थिए ।

कर्मचारी निर्धारण र नीति परिवर्तनमा सहयोगका निम्ति सामान्यतः बैठकहरू सरकारी निकायका बहालवाला सदस्यहरूसँग गरिन्छ । प्रमुख सदस्यहरूले आफ्नो नयाँ भूमिकाको तयारीका लागि बहिर्गमन हुन लागेका कर्मचारीका कामलाई पछ्याउने गर्छन् । बाइडेनले प्रमुख सदस्य नियुक्त गर्न थालिसकेका छन् । हस्तान्तरण प्रक्रियाले प्रत्येक सरकारी निकायका प्रमुखलाई उनीहरूले गर्नुपर्ने आवश्यक भूमिका पहिल्याउन सहयोग गर्छ । राजनीतिक नियुक्ति हुने ४ हजार पदमध्ये १ हजार २ सयका लागि सिनेटको अनुमोदन आवश्यक पर्छ ।

प्रकाशित : मंसिर ११, २०७७ ११:४४
प्रतिक्रिया
पठाउनुहोस्

जब बालिकाले फोनमा बुबाबाटै बलात्कृत भएको सुनाइन्

दीपक परियार

पोखरा — एक गैरसरकारी संस्थाको पोखरास्थित कार्यालयमा गत सोमबार आएको फोनले कर्मचारीलाई खङ्ग्रङ्ग बनायो । कास्कीकी १३ वर्षीया बालिकाले आफूलाई बुबाले पाँच वर्षअघिदेखि बलात्कार गरिरहेको फोनमा बताइन् ।

संस्थाले सोमबार बेलुकी नै जिल्ला प्रहरी कार्यालयमा लिखित निवेदन दियो । प्रहरीले बालिकाका ३९ वर्षीय बुबालाई घरनजिकैबाट मंगलबार पक्राउ गर्‍यो । बालिकाकी आमाले बुधबार हाडनाता करणी तथा करणीसम्बन्धी कसुरमा कारबाहीको माग गर्दै पतिविरुद्ध जाहेरी दिइन् ।

ती व्यक्तिले बालिकालाई ४ कक्षा पढ्दादेखि नै यौन–दुर्व्यवहार गर्न थालेको जाहेरीमा उल्लेख छ । त्यतिखेर उनी ८ वर्षकी थिइन् । गत मंसिर ६ गते पनि बुबाले होटलमा लगेर बलात्कार गरेको बालिकाले बताएकी छिन् । बालिकाकी आमाका अनुसार त्यस दिन उनीहरूकहाँ घर बनाउने कामदार थिए । अरू बेला बिहान ९ बजे नै मेला जाने उनी त्यस दिन कामदारलाई खाजा बनाउन घरै बसेकी थिइन् । दुई छोरा मेला गएका थिए । श्रीमान् र कान्छी छोरी काममै थिए । साँझ ५ बजे बुबाले साथीलाई चामल पुर्‍याइदिने भन्दै छोरीलाई मोटरसाइकलमा राखेर पोखरा ल्याए । राति साढे ७ बजेतिर घर फर्किए । उनले पतिलाई ढिलो हुनुको कारण सोध्दा केही जवाफ दिएनन् ।

बालिकाले संस्थालाई बताएअनुसार चामल छोडेर फर्किने क्रममा बुबाले बाटोको एक होटलमा खाजा खान लिएर गए । होटलको तल्लो तलामा रहेको कोठामा लगेर खाजा मगाए । जबर्जस्ती बियर पिलाए । यौन–दुर्व्यवहार गर्न सुरु गरे । बालिकाले कोठामा रहेको घण्टी थिचिन् तर सहयोगका लागि कोही आएन । बुबाले मोबाइलमा आमाको नग्न तस्बिर र भिडियो देखाए । छोरीको पनि नग्न भिडियो खिचे । झन्डै एक घण्टा जबर्जस्ती करणी गरे ।

बालिकाले सोमबार छिमेकीको मोबाइलबाट संस्थाको कार्यालयमा फोन गरिन् । ‘घटना एकदमै वास्तविक लाग्यो,’ संस्थाका प्रतिनिधिले भने, ‘प्रहरीमा नगई हुँदैन भनेर पक्राउका लागि त्यसै दिन निवेदन दियौं ।’ बुबा पक्राउ परेपछि संस्थाले बालिकालाई आफ्नो संरक्षणमा राख्यो । आफूलाई चार कक्षा पढ्दा पहिलोपल्ट बुबाले घरमा कोही नभएको समयमा जबर्जस्ती करणी गरेको उनले संस्थाका प्रतिनिधिलाई बताइन् । त्यसपछि कहिले घर, कहिले होटलमा लगेर निरन्तर यौनशोषण गरेको उनले सुनाइन् । ‘बुबाले धेरैजस्तो घरमा कोही नहुँदा करणी गर्ने, बिरामी हुँदा समेत करणी गर्ने, नमाने कुटपिट गर्ने, घरबाट निस्कन नदिने, निरन्तर यौनशोषण गर्ने रहेछन्,’ ती प्रतिनिधिले भने, ‘यी कुरा कसैलाई भने मार्ने धम्की दिएकैले अहिलेसम्म लुकाउन बाध्य रहिछन् ।’ उनका अनुसार सातामा तीनपल्टसम्म बुबाले उनीमाथि करणी गर्थे ।

उनले झन्डै ३ वर्षअघि बुबाको हर्कतबारे आमालाई बताइन् । तर त्यही कुराले बुबाले आमालाई कुटपिट गरेको देखेपछि भन्नै छोडिन् । अधिवक्ता कुञ्जनी परियारको सम्पर्कमा पुगेकी बालिकाका अनुसार उनले बुबाको व्यवहारबारे काका–काकीलाई समेत भनेकी थिइन् । विद्यालयका शिक्षकलाई लेखेरै दिएकी थिइन् । टोल–छिमेकमा समेत ती व्यक्तिले आफ्नै छोरीमाथि यौनशोषण गर्ने गरेको छिपेको थिएन । तर कसैले चुँसम्म बोलेनन् । ‘बुबाले दिनभरि आफूसँगै काममा लिएर हिँड्ने, बिहान–बेलुका बालिकाले आमालाई भन्न खोज्दा उनी पुगिहाल्ने रहेछन्,’ अधिवक्ता परियारले भनिन्, ‘समुदाय र विद्यालयमा थाहा हुँदा पनि किन सुनुवाइ भएन भन्ने उदेक लाग्दो छ । अहिले अति भएपछि विस्फोट भएर बाहिर आयो ।’

बुबा पक्राउ परेपछि ठूली छोरीले आफूमाथि पनि यौनशोषण भएको खुलाइन् । बुबाले यौन–दुर्व्यवहार गरेकै कारण ९ कक्षा पढ्दापढ्दै छोडेको र सानैमा बिहे गरेर गएको उनले कान्तिपुरसँग बताइन् । ‘बुबाको बानी पहिलेबाटै त्यस्तो थियो । साथीसँग कुरा गरेको पनि थिएँ,’ २० वर्षीया उनले भनिन्, ‘त्यति बेला सपोर्ट गर्ने कोही भएन ।’ बुबाले आमालाई सधैं पिट्ने भएकाले आमासँग पनि भन्न नसकेको उनले सुनाइन् । ‘आमासँग यसो कुरा निकाल्न लाग्यो बाउ आइहाल्थे,’ उनले भनिन्, ‘डरैडरले कसैसँग केही भन्न सकिएन ।’

अधिवक्ता परियारले ती व्यक्तिलाई हदैसम्म सजाय र पीडितलाई क्षतिपूर्ति दिन माग राखी जाहेरी दर्ता गरिएको बताइन् । हाडनाता करणीमा जन्मकैदको व्यवस्था छ । जिल्ला प्रहरी कार्यालयका प्रवक्ता एवं डीएसपी सुवास हमालका अनुसार प्रारम्भिक बयानमा प्रतिवादीले आरोप स्वीकार गरेका छन् । बालिकाको बुधबार नै शारीरिक जाँच गराइएको छ ।

प्रकाशित : मंसिर ११, २०७७ ११:२७
पूरा पढ्नुहोस्
प्रतिक्रिया
पठाउनुहोस्
×