दिल्लीका विद्यालय खोप नआउँदासम्म बन्द गरिने- विश्व - कान्तिपुर समाचार
कान्तिपुर वेबसाईट
AdvertisementAdvertisement

दिल्लीका विद्यालय खोप नआउँदासम्म बन्द गरिने

एजेन्सी

नयाँदिल्ली — भारतको केन्द्रीय राजधानी रहेको दिल्ली राज्यमा कोभिड–१९ विरुद्धको खोप नआउँदासम्म विद्यालय बन्द गरिने भएको छ । खोप नआउँदासम्म बालबालिकाहरू विद्यालयमा सुरक्षित हुन नसक्ने भएकाले अहिले नै विद्यालय खोल्न ठीक नहुने निष्कर्ष राज्य सरकारले निकालेको हो ।

दिल्लीका उपमुख्यमन्त्री तथा शिक्षामन्त्री मनीष सिसोडियाले बुधबार भने, ‘जहिलेसम्म खोप आउँदैन त्यसबेलासम्म दिल्लीका विद्यालयहरू बन्द नै रहन्छन् ।’ कोभिड–१९ विरुद्धको खोप नआउँदै विद्यालय खोल्नु घातक हुने भएकाले विद्यालय खोल्ने निर्णय गर्न नसकिएको उनको भनाइ छ । दिल्ली राज्यमा गत मार्च १६ देखि सबै विद्यालय बन्द छन् । कोभिड–१९ को महामारी पुनः फैलिन थालेपछि सरकारले विद्यालय बन्द गराएको हो । भारतका कतिपय राज्यहरूले विद्यालय खोल्ने निर्णय गरे पनि दिल्ली राज्यले भने बन्दलाई अझै कायमै राख्ने निर्णय गरेको छ ।

तुलनात्मक रूपमा कोभिडबाट बढी प्रभावित राज्य भएकाले पनि दिल्ली सरकारले विद्यालय खोल्ने जोखिम नलिएको हो । नयाँदिल्लीमा मात्रै बुधबार साँझसम्म ५ लाख ४० हजार ५ सय ४१ जना कोभिड–१९ बाट संक्रमित भइसकेका छन् । ८ हजार ६ सय २१ जनाको मृत्यु भइसकेको छ ।

भारतको केन्द्रीय स्वास्थ्य तथा परिवार कल्याण मन्त्रालयले बुधबार दिएको जानकारीअनुसार भारतमा कोभिड–१९ संक्रमितको संख्या ९२ लाख २२ हजार २ सय १६ पुगेको छ । त्यसैगरी कोरोनाका कारण अहिलेसम्म मृत्यु भएकाहरूको संख्या १ लाख ३४ हजार ६ सय ९९ पुगेको अधिकारीहरूले जनाएका छन् ।

प्रकाशित : मंसिर ११, २०७७ ०९:४२
प्रतिक्रिया
पठाउनुहोस्

आईसीसीमा नयाँ अध्यक्ष

रोयटर्स

वेलिङ्टन — न्युजिल्यान्डका ग्रेग बार्क्ले बुधबार अन्तर्राष्ट्रिय क्रिकेट काउन्सिल (आईसीसी) का नयाँ अध्यक्ष चुनिएका छन् । दोस्रो चरणको मतदानपछि उनले विश्व क्रिकेटको सर्वोच्च पद हात पारेका हुन् । उनले भारतका शशांक मनोहरको स्थान लिनेछन् । मनोहरले गत वर्ष आईसीसी अध्यक्ष पद छाडेका थिए ।

अकल्यान्डमा कानुनी व्यवसायी रहेका बार्क्ले सन् २०१२ देखि न्युजिल्यान्ड क्रिकेट (एनजेडसी) का निर्देशक थिए । उनी अहिले आईसीसीका न्युजिल्यान्डका प्रतिनिधि रहेका छन् । आईसीसी प्रमुख पद सम्हालेयता तटस्थ रहन उनले न्युजिल्यान्ड क्रिकेटको जिम्मेवारी छाड्ने छन् ।

सन् २०१५ को पुरुष विश्वकपमा उनी निर्देशक रहेका थिए । यस्तै उनी न्युजिल्यान्डको नर्थन डिस्ट्रिक्ट क्रिकेट संघका बोर्ड सदस्य र अध्यक्ष रहिसकेका छन् । न्युजिल्यान्ड र अस्ट्रेलियाका व्यावसायिक संस्थाको नेतृत्व गरेको अनुभव पनि उनमा रहेको छ । अध्यक्ष चुनिएयता उनले यो स्थानमा पुग्ने आफ्ना लागि गर्वको उपलब्धि रहेको बताएका छन् । उनले भनेका छन्, ‘म आईसीसीका सबै सदस्यसँग मिलेर साझेदारीमा काम गर्न इच्छुक छु । म विश्व बजारमा क्रिकेटको बलियो उपस्थिति चाहन्छु र यो खेलले अझ विकास तथा विस्तार गरोस् भन्ने चाहन्छु । म आफ्नो जिम्मेवारीलाई लिएर गम्भीर छु र सबै १ सय ४ आईसीसी सदस्य देशको भलाइमा काम गर्न चाहन्छु ।’

प्रकाशित : मंसिर ११, २०७७ ०९:२६
पूरा पढ्नुहोस्
प्रतिक्रिया
पठाउनुहोस्
×