फाइजरले माग्यो कोरोना खोपको आपत्कालीन प्रयोग अनुमति- विश्व - कान्तिपुर समाचार
कान्तिपुर वेबसाईट
AdvertisementAdvertisement

फाइजरले माग्यो कोरोना खोपको आपत्कालीन प्रयोग अनुमति

इकान्तिपुर डेस्क

काठमाडौँ — बहुराष्ट्रिय कम्पनी फाइजर र बायोएनटेकले कोरोना भाइरसविरुद्धको खोपको आपत्कालीन प्रयोग(ईयूए) का लागि अमेरिकी खाद्य तथा औषधि प्रशासन(एफडीए) समक्ष निवेदन दिएका छन् ।

अमेरिकी नियमनकारी निकायसमक्ष आपत्कालीन प्रयोगका लागि निवेदन दिने यो पहिलो कोरोना खोप हो । फाइजरका अध्यक्ष तथा प्रमुख कार्यकारी अधिकृत अल्बर्ट बोलाले यसलाई ऐतिहासिक दिन भनेका छन् । शुक्रबार एउटा भिडियो जारी गर्दै उनले भनेका छन्, ‘विज्ञान र हामी सबैका लागि यो एक ऐतिहासिक दिन हो । हामीले बायेएनटेकसँग सहकार्य गर्दै कोरोना खोप बनाउने योजना घोषणा गरेको २४८ दिनमै हामीले एफडीएमा आपत्कालीन प्रयोगका लागि निवेदन दिएका छौं ।’

बीएनटी१६२बी २ नामको यो खोप डिसेम्बरको अन्त्यसम्ममा अमेरिकामा उपलब्ध हुने बताइएको छ । २८ दिनको अन्तरालमा कोरोना संक्रमितलाई यो खोपको दुई डोज दिनुपर्ने अनुसन्धानकर्मीले बताएका छन् ।

तेस्रो चरणको परीक्षणमा अत्यन्तै प्रभावकारी देखिएपछि फाइजरले एफडीएमा आपत्कालीन प्रयोगका लागि निवेदन दिएको हो । उक्त खोप ६ वटा मुलुकका करिब ४३ हजार ५ सय मानिसमा परीक्षण गर्दा स्वास्थ्यमा कुनै पनि समस्या नदेखिएको कम्पनीले दाबी गरेको छ ।

एफडीएले शुक्रबार फाइजर र बायोएनटेकसँग डिसेम्बर १० मा कोरोना खोपको आपत्कालीन प्रयोगबारे छलफल गर्ने भएको छ । त्यसपछि मात्रै एफडीएले यो खोपलाई आपत्कालीन प्रयोगका लागि अनुमति दिने वा नदिने निर्णय गर्नेछ ।

त्यस्तै अमेरिकी कम्पनी मोडर्नाले विकास गरेको कोभिड–१९ विरुद्धको खोप करिब ९५ प्रतिशत प्रभावकारी देखिएको एक अध्ययनले जनाएको छ ।

मोडर्नाले क्लिनिकल परीक्षणमा सहभागी भएकाहरूको नतिजा विश्लेषण गर्दा उक्त खोप ९४.५ प्रतिशत प्रभावकारी देखिएको जनाएको हो । मोडर्नाले पनि यसै महिनाको अन्त्यसम्ममा आपत्कालीन प्रयोगका लागि एफडीएमा निवेदन दिने बताएको छ ।

सम्बन्धित समाचार

कोरोनाविरुद्ध करिब एक दर्जन खोप अन्तिम चरणमा

प्रकाशित : मंसिर ६, २०७७ १२:००
प्रतिक्रिया
पठाउनुहोस्

३३ एसएसपीको सरुवा : काठमाडौंमा अशोक सिंह, ललितपुरमा किरण बज्राचार्य (सूचीसहित)

इकान्तिपुर डेस्क

काठमाडौँ — गृह मन्त्रालयले नेपाल प्रहरीका ३३ जना प्रहरी वरिष्ठ उपरीक्षक(एसएसपी)को सरुवा गरेको छ । शुक्रबार गृहमन्त्रीस्तरको निर्णयबाट विभिन्न स्थानमा कार्यरत एसएसपीको सरुवा गरिएको हो ।

प्रहरी प्रधान कार्यालय मानवश्रोत एवं प्रशासन विभागले शुक्रबार एक सूचना प्रकाशित गरी मंसिर ७ गते देखि लागू हुने गरी एसएसपीहरुको सरुवा गरिएको जनाएको छ ।

गृह मन्त्रालयले महानगरीय प्रहरी परिसर काठमाडौंमा अशोक सिंहलाई सरुवा गरेको छ । यसअघि उनी प्रहरी प्रधान कार्यालय अपराध अनुसन्धान विभाग, अपराध नियन्त्रण महाशाखामा कार्यरत थिए । यसअघि महानगरीय प्रहरी परिसरमा कार्यरत श्यामलाल ज्ञवालीलाई चाहिँ सिंहको ठाउँमा नक्सालस्थित अपराध नियन्त्रण महाशाखामा पठाइएको छ ।

त्यस्तै महानगरीय प्रहरी परिसर, ललितपुरको प्रमुख रहेका एसएसपी टेकप्रसाद राईलाई प्रहरी प्रधान कार्यालय, कार्यविभाग महाशाखा नक्साल सरुवा गरिएको छ । त्यस्तै महानगरीय प्रहरी कार्यालय, रानीपोखरीमा कार्यरत किरण बज्राचार्यलाई महानगरी प्रहरी परिसर, ललितपुर सरुवा गरिएको छ ।

त्यसैगरी वाग्मती प्रदेश प्रहरी तालिम केन्द्र, दुधौली सिन्धुलीमा कार्यरत सन्दीप भण्डारीलाई महानगरीय प्रहरी कार्यालय रानीपोखरीमा सरुवा गरिएको छ ।

त्यस्तै महानगरीय ट्राफिक प्रहरी महाशाखा, रामपथका प्रमुख भीमप्रसाद ढकाललाई प्रहरी प्रधान कार्यालय, सामुदायिक प्रहरी महाशाखा नक्सालमा सरुवा गरिएको छ । प्रहरी प्रधान कार्यालय तालिम महाशाखा नक्सालमा कार्यरत जनक भट्टराईलाई महानगरीय ट्राफिक महाशाखा रामशाहपथमा सरुवा गरिएको छ ।

त्यस्तै प्रहरी प्रधान कार्यालय यूएन महाशाखामा कार्यरत बीरेन्द्रकुमार बस्याललाई नेपाली राजदूतावास दिल्लीमा सरुवा गरिएको छ । त्यस्तै गण्डकी प्रदेश प्रहरी तालिम केन्द्रमा कार्यरत एसएसपी दिवेश लोहनीलाई प्रहरी प्रधान कार्यालय यूएन महाशाखा नक्साल सरुवा गरिएको छ ।

को कहाँ सरुवा भए ? हेर्नुहोस सूची

प्रकाशित : मंसिर ५, २०७७ १४:३०
पूरा पढ्नुहोस्
प्रतिक्रिया
पठाउनुहोस्
×