जोर्जियाको पुन: मतगणनामा बाइडेन नै विजयी- विश्व - कान्तिपुर समाचार
कान्तिपुर वेबसाईट
AdvertisementAdvertisement

जोर्जियाको पुन: मतगणनामा बाइडेन नै विजयी

इकान्तिपुर डेस्क

काठमाडौँ — जोर्जिया राज्यमा गरिएको पुन: मतगणनामा पनि जो बाइडेन विजयी भएको चुनाव अधिकारीले जनाएका छन् । जोर्जिया राज्यका सचिवद्वारा जारी विज्ञप्तिमा राष्ट्रपतिमा निर्वाचित जो बाइडेनले वर्तमान राष्ट्रपति डोनाल्ड ट्रम्पलाई जितेको उल्लेख गरिएको छ ।

सीएनएका अनुसार बाइडेनलले ट्रम्पलाई १२ हजार २ सय ८४ भोटले जितेका हुन् । जोर्जियाका चुनाव अधिकारीहरुका अनुसार पुन: गरिएको मतगणनामा चुनावमा कुनै धाँधली भएको पाइएन । राष्ट्रपति ट्रम्पले जोर्जियामा व्यापक धाँधली भएको बताउँदै पुन: मतगणना गर्न माग गरेपछि झन्डै ५० लाख मत हातैले गनिएको थियो ।

सन् १९९२ पछि जोर्जियामा चुनाव जित्ने पहिलो डेमोक्रेटिक उम्मेदवार हुन् जो बाइडेन् । करिब तीन दशकलेखि रिपब्लिकन पार्टीको पकड रहँदै आएको जोर्जियामा डेमोक्रेटिक पार्टीका उम्मेदवार बाइडेनको जितलाई महत्वपूर्ण रुपमा हेरिएको छ । पछिल्लो पटक सन् १९९२ मा डेमोक्रेटिक पार्टीका तर्फबाट बिल क्लिन्टनले जोर्जियामा जितेका थिए ।

बाइडेनले कुल ३०६ इलेक्टोरल भोट पाएका छन् । जुन सन् २०१६ मा राष्ट्रपति ट्रम्पले पाएकै जति हो । ट्रम्पको पक्षमा कुल २३२ इलेक्टोरल भोट पर्नेछ । वर्तमान राष्ट्रपति डोनाल्ड ट्रम्पले भने चुनावमा धाँधली भएको आधारहीन आरोप लगाउँदै हार स्वीकार गरेका छैनन् ।

प्रकाशित : मंसिर ५, २०७७ ०९:५२
प्रतिक्रिया
पठाउनुहोस्

राजधानीका विद्यालय तत्काल नखुल्ने

उपत्यका कोरोना हटस्पट नै छ, समीक्षा गररे अघि बढ्छौं । - मेयर शाक्य
गणेश राई

काठमाडौँ — काठमाडौं उपत्यकाका विद्यालयहरू तत्काल पुनः सञ्चालन नहुने भएको छ । उपत्यकामा कोरोना संक्रमण कम नभएकाले तत्काल विद्यालय सञ्चालन गर्न नसकिने स्थानीय तहहरूले जनाएका हुन् । 

काठमाडौं महानगरपालिकाका मेयर विद्यासुन्दर शाक्यले उपत्यकामा अझै संक्रमणको जोखिम रहेको बताए । ‘देशभरि सबै एक प्रकारको स्थिति छैन, कतिपय ठाउँ कोरोना संक्रमणमुक्त छन्,’ मेयर शाक्यले भने, ‘तर काठमाडौं उपत्यका अझै संक्रमणको हटस्पट नै छ ।’

उपत्यका नगरपालिका फोरमले कार्यढाँचाबारे बृहत् छलफल गरी निर्णय लिने मेयर शाक्यले जनाए । फोरम उपत्यकाका १८ वटा नगरपालिका तथा महानगरपालिकाको छाता संस्था हो । ‘अब हामी शिक्षा र स्वास्थ्य मन्त्रालयसँग समन्वय गरेर निर्णय लिन्छौं,’ फोरमका अध्यक्षसमेत रहेका शाक्यले भने ।

सरकारले स्थानीय तहलाई विद्यालय सञ्चालनको जिम्मा दिएको छ । शिक्षा, विज्ञान तथा प्रविधि मन्त्रालयले परिमार्जनसहित ‘विद्यालय सञ्चालनसम्बन्धी कार्यढाँचा, २०७७’ ल्याएर स्थानीय तहलाई विद्यालय खोल्ने जिम्मा दिएको हो । विद्यालय पुनः सञ्चालन गर्दा स्थानीय तहभित्र संक्रमणको जोखिम नभएको वा सबैभन्दा न्यून रहेको क्षेत्रमा अवस्थित विद्यालयबाट सुरु गर्ने गरी व्यवस्था गर्न सकिने कार्यढाँचामा उल्लेख छ ।

स्थानीय तहको निर्देशनबमोजिम विद्यालयले सञ्चालनको समय, मितिसहित स्थानीय भाषामा समेत सूचना प्रकाशन तथा प्रसारण गर्नुपर्नेछ । क्वारेन्टाइन र आइसोलेसन सेन्टरका रूपमा प्रयोग भएका विद्यालयलाई हटाएर निर्मलीकरण गर्नुपर्नेछ । हरेक विद्यालयले आवश्यकताअनुसार स्वास्थ्यकर्मीसहित हेल्थ डेक्स निर्माण गरी विद्यालयका विद्यार्थी तथा शिक्षकको नियमित स्वास्थ्य परीक्षण तथा परामर्श लिनुपर्नेछ । गत कात्तिक २० गतेको मन्त्रीस्तरीय निर्णयबाट कार्यढाँचा स्वीकृत गरेको हो । कार्यढाँचाअनुसार चैतमा स्थगित कक्षा १२ को परीक्षा यही मंसिर ९ गतेबाट सञ्चालन हुनेछ ।

शिक्षा तथा मानव स्रोत विकास केन्द्रका महानिर्देशक वैकुण्ठ अर्यालले कार्यढाँचा जारी भएसँगै अर्थ मन्त्रालयसँग स्थानीय तहलाई स्रोत व्यवस्थापन रकमान्तर गर्न पत्राचार गरेको बताए । उनले भने, ‘रकमान्तर भएसँगै स्थानीय तहले विद्यालय खोल्न तथा सबै किसिमको प्रक्रिया पुर्‍याएर पूर्वाधारसहित विद्यार्थी डाकेर पठनपाठन सुचारु राख्न सक्नेछन् ।’

प्रकाशित : मंसिर ५, २०७७ ०९:५१
पूरा पढ्नुहोस्
प्रतिक्रिया
पठाउनुहोस्
×