चिनियाँ खोप ‘मध्य चरणको परीक्षणमा सफल’- विश्व - कान्तिपुर समाचार
कान्तिपुर वेबसाईट
AdvertisementAdvertisement

चिनियाँ खोप ‘मध्य चरणको परीक्षणमा सफल’

‘कोरोनाभ्याक’ ले मानव शरीरमा तीव्र रूपमा भाइरस प्रतिरोधी क्षमता उत्पन्न गराएको अनुसन्धानकर्ताहरूको दाबी
फाइजरको खोप '९४ प्रतिशत प्रभावकारी'
एजेन्सी

बेइजिङ — कोभिड–१९ विरुद्ध चीनले विकसित गरेको खोपले मध्य–चरणको परीक्षणमा सफल भएको अनुसन्धानकर्ताहरूले बताएका छन् । चीनले कोभिड–१९ विरुद्ध विभिन्न खोपहरू तयार गरिरहेको छ । तीमध्ये केही खोप स्वास्थ्यकर्मी तथा अग्रमोर्चामा खटिएका सुरक्षाकर्मीमा लगाइसकिएको छ ।

सिनोभ्याक बायोटेकले विकसित गरेको ‘कोरोनाभ्याक’ खोपले तीव्र रूपमा रोग प्रतिरोधी क्षमता विकसित गरेको अनुसन्धानकर्ताहरूले जनाएका छन् । उक्त परीक्षण ७ सय ४४ जनामा गरिएको हो ।

युरोप तथा अमेरिकामा निर्मित खोपहरूको ठूलो स्तरको परीक्षणका आधारमा ती खोपहरू सफल रहेका समाचार आइरहेका बेला चिनियाँ अनुसन्धानकर्ताहरूको घोषणा सार्वजनिक भएको हो । अमेरिका, जर्मनी र रुसमा विकास गरिएका तीनवटा खोपहरूको परीक्षणका तथ्यांकहरूका आधारमा ती खोप ९० प्रतिशतभन्दा बढी प्रभावकारी देखिएको बताइएको छ ।

अमेरिका तथा युरोपेली देश जस्तै चीन पनि कोभिडविरुद्धको खोप बनाउने दौडमा क्रियाशील छ । यसक्रममा चारवटा खोप चिकित्सकीय परीक्षणको अन्तिम चरणहरूमा प्रवेश गरेका जनाइएको छ । तीमध्ये सिनोभ्याक बायोटेक खोप एक हो ।

तर वैज्ञानिक जर्नल ‘द ल्यान्सेट’ मा प्रकाशित परिणामहरू ती चारमध्ये एकको पहिलो र दोस्रो चरणका परीक्षणबाट प्राप्त तथ्यांक मात्र भएको बीबीसीले उल्लेख गरेको छ । प्रतिवेदनअनुसार कोरोनाभ्याक खोपले मानव शरीरमा तीव्र रोग प्रतिरोधी क्षमता उत्पन्न गराएको देखिएको छ । उक्त अध्ययन गत अप्रिल र मे महिनामा गरिएको र खोपको सफलताको प्रतिशत उल्लेख गरिएको छैन ।

प्रतिवेदनका एक लेखक झु फेंगचाईले पहिलो चरणमा एक सय ४४ र दोस्रो चरणमा ६ सय जनामा गरिएको परीक्षणमा आधारित नतिजाहरूका आधारमा उक्त खोप आपत्कालीन अवस्थामा प्रयोग गर्न योग्य रहेको बताएका छन् ।

हाल खोपको तेस्रो चरणको परीक्षण जारी छ र त्यसबारे भने केही तथ्यांकहरू सार्वजनिक गरिएको छैन । चिनियाँ खोपहरू हाल पाकिस्तान, साउदी अरब, रुस, इन्डोनेसिया र ब्राजिलमा ठूलो स्तरमा परीक्षण भइरहेको छ । चिनियाँ चारमध्ये एक खोप नोभेम्बर महिनाको सुरुसम्ममा करिब ६० हजार जनाले लगाइसकेका छन् ।

कोरोनाभ्याक खोपको परीक्षण ब्राजिलमा गत साता केही समयका लागि रोकिएको भए पनि पुन: सुरु भएको छ । कम्तीमा तीनवटा खोप एउटा आपत्कालीन योजनाअनुसार अत्यावश्यक सेवाका कर्मचारीहरूलाई दिइसकिएको जनाइएको छ । बीबीसीका अनुसार एउटा खोप भने जुन महिनामा नै चिनियाँ सेनाका लागि प्रयोग गर्न अनुमति दिइएको थियो ।

फाइजरको खोप ६५ वर्षमाथिकालाई झन् प्रभावकारी

फाइजर र बायोएनटेक कम्पनीले विकसित गरेको कोभिड–१९ विरुद्धको खोप ६५ वर्षमाथिका बिरामीका लागि अझै प्रभावकारी हुने देखिएको छ । तेस्रो चरणको परीक्षणका तथ्यांकको विश्लेषणका आधारमा नयाँ तथ्य सार्वजनिक गरिएको हो ।

कम्पनीले उक्त खोपले ६५ वर्षभन्दा बढी उमेर समूहका ९४ प्रतिशत बिरामी निको पार्ने दाबी गरेको हो । अन्तिम चरणको परीक्षणका क्रममा उक्त खोप ४१ हजार जनालाई दुई डोज दिइएको थियो । खोपको आपत्कालीन प्रयोगका लागि अमेरिकामा छिटै अनुमति लिइने पनि कम्पनीले जनाएको छ ।

गत साता फाइजर तथा बायोएनटेकले प्रारम्भिक तथ्यांकको विश्लेषणका आधारमा खोपले कोभिड–१९ का ९० प्रतिशत बिरामी निको पार्ने जनाएका थिए । अमेरिकी कम्पनी मोडर्नाले विकसित गरेको खोपले भने कोभिड–१९ का ९४.५ प्रतिशत बिरामी निको हुने जनाइएको छ ।

सम्बन्धित समाचार

प्रकाशित : मंसिर ४, २०७७ ०६:५०
प्रतिक्रिया
पठाउनुहोस्

कोरोनाविरुद्ध करिब एक दर्जन खोप अन्तिम चरणमा

 मोडर्ना खोप ९४.५ प्रतिशत प्रभावकारी, फाइजर खोपको तुलनामा भण्डारण गर्न निकै सहज 
एजेन्सी

काठमाडौँ — अमेरिकी कम्पनी मोडर्नाले विकास गरेको कोभिड–१९ विरुद्धको खोप करिब ९५ प्रतिशत प्रभावकारी देखिएको एक अध्ययनले जनाएको छ । मोडर्नाले क्लिनिकल परीक्षणमा सहभागी भएकाहरूको नतिजा विश्लेषण गर्दा उक्त खोप ९४.५ प्रतिशत प्रभावकारी देखिएको जनाएको हो ।

फाइजर र बायोएनटेकले निर्माण गरेको खोपले कोभिडका ९० प्रतिशत बिरामी निको पारेको दाबी गरिएको केही दिनमा मोडर्नाले यो घोषणा गरेको हो । मोडर्नाले ‘महान्’ दिन भन्दै खोप प्रयोगका लागि अनुमति लिन केही दिनमै आवेदन दिने बताएको छ । कम्पनीका अनुसार यो खोपको परीक्षणमा ३० हजार अमेरिकी सहभागी भएका थिए । सहभागीमध्ये आधालाई दुई पटक खोप लगाइएको थियो । तर खोप एक पटक लगाएपछि कति समयसम्म काम गर्छ भन्नेबारे केही उल्लेख गरिएको छैन ।

‘तेस्रो चरणको परीक्षणको सकारात्मक नतिजाको विश्लेषण गर्दा यो खोपले कोभिड–१९ का बिरामीलाई निको पार्ने देखिएको छ,’ मोडर्नाका प्रमुख कार्यकारी अधिकृत स्टेफान बान्सेलले एक विज्ञप्तिमार्फत जनाएका छन् ।

मोडर्ना र फाइजर दुवै कम्पनीले निर्माण गरेका खोप एमआरएनए प्रविधिमा आधारित हुन् । एमआरएन शरीरका कोषहरूका लागि एउटा सफ्टवेयरजस्तै हो । यो प्रविधिमा निर्मित खोपले कोषहरूले निर्माण गरेको प्रोटिनलाई शरीरका विभिन्न भागमा पढाउन निर्देशन दिने गर्छ । जसका कारण मानिसको शरीरमा भाइरसविरुद्ध एन्टिबडी निर्माणका लागि रोग प्रतिरोधात्मक क्षमता बढ्दै जान्छ ।

तर मोडर्नाको खोप भण्डारणका लागि भने सहज देखिएको छ । बान्सेलका अनुसार यो खोप माइनस २० डिग्री सेल्सियस तापक्रममा सुरक्षित रहन्छ । यसअघि फाइजरले विकसित गरेको खोप माइनस ७० डिग्री सेल्सियस तापक्रममा राख्नुपर्ने जनाइएको थियो ।

कोभिड–१९ विरुद्धको खोप विकास र यससम्बन्धी अनुसन्धानका लागि मोडर्नालाई अमेरिकी सरकारले १ अर्ब डलर प्रदान गरेको छ । कम्पनीले डेढ अर्ब डलरबराबरको १० करोड डोज खोप उपलब्ध गराउन यसअघि नै सम्झौतासमेत गरिसकेको छ ।

मोडर्नाले आगामी वर्षभित्र विश्वभर १ अर्ब डोज खोप उपलब्ध गराउने लक्ष्य लिएको जनाएको छ । त्यसका लागि क्रमशः अन्य मुलुकहरूबाट समेत आवश्यक स्वीकृति लिइने बान्सेलको भनाइ छ । यी खोपसँगै विश्वका विभिन्न देशमा विकसित करिब एक दर्जन खोपको परीक्षण अन्तिम चरणमा छ ।

यसअघि बहुराष्ट्रिय कम्पनीले आफूले बनाइरहेको खोप ९० प्रतिशत प्रभावकारी भएको दाबी गरेको थियो । त्यस्तै रुसले पनि आफूले उत्पादन गरेको कोभिड–१९ विरुद्धको खोप स्पुतनिक–५ खोप ९२ प्रतिशत प्रभावकारी भएको दाबी गरेको थियो । रुसको सार्वभौम वेल्थ फन्डले अन्तरिम परीक्षणमा खोपको प्रभावकारिता ९२ प्रतिशत देखिएको बताएको हो ।

त्यस्तै चिनियाँ सरकारद्वारा सञ्चालित सिनोफार्म कम्पनीले विकास गरिरहेको कोरोना खोप बीबीआईबीपी–कोरभीको पहिलो र दोस्रो चरणको परीक्षण सफल भएको बताइएको छ । उक्त रिपोर्टका अनुसार पहिलो र दोस्रो चरणको परीक्षणमा सहभागी व्यक्तिलाई गम्भीर प्रकृतिको कुनै नकारात्मक प्रतिक्रिया नदेखिएको र शरीरमा एन्टीबडी पनि विकास भएको बताइएको छ । उक्त खोप पनि तेस्रो चरणको परीक्षणमा रहेको छ ।

त्यसै गरी बेलायतको अक्सफोर्ड विश्वविद्यालय र औषधि उत्पादक कम्पनी अस्ट्राजेनेकाले विकास गरिरहेका कोरोना भाइरसविरुद्धको खोप पनि तेस्रो चरणअन्तर्गतको परीक्षणमा रहेको बताइएको छ ।

जोन्सनको खोपको तेस्रो चरणको परीक्षण

कोभिड–१९ विरुद्ध निर्माण गरेको खोप तेस्रो चरणको परीक्षणका लागि फर्मास्युटिकल कम्पनी जोन्सन एन्ड जोन्सनले अनुमित पाएको छ । करिब १२ महिना चल्ने परीक्षणका लागि कम्पनीले बेलायत सरकारले अनुमति दिएको हो । परीक्षणमा करिब ६ हजार जना सहभागी हुने जनाइएको छ ।

खोप निर्माणको नेतृत्व गरिरहेका डा. साउल फाउस्टले खोप अन्तिम परीक्षण पहिलो पटक बेलायतमा गर्न लागिएको बताए । उनले खोप परीक्षणमा विश्वका ६ देशका करिब ३० हजार जना सहभागी हुने जनाए ।

‘खोप मात्र पर्याप्त छैन’

विश्व स्वास्थ्य संगठनका प्रमुखले कोभिड–१९ को महामारी अन्त्यका लागि खोप विकास र प्रयोगले मात्रै काम नगर्ने बताएका छन् । संगठनका महानिर्देशक टेड्रोस अड्हानोम गेहब्रेयससले भने, ‘महामारी नियन्त्रणका लागि हामीसँग रहेका उपायमध्ये खोप एक हो । खोप आफैंले मात्र महामारीलाई अन्त्य गर्न सक्दैन ।’

खोपको प्रयोगले मृत्युदर नियन्त्रणमा आउने र स्वास्थ्य प्रणालीलाई प्रभावकारी बनाउने उनको भनाइ छ । अनुगमन र परीक्षणको दायरा बढाउँदै बिरामीलाई समुदायको सम्पर्कबाट टाढा राख्नु नै महामारी नियन्त्रणको प्रमुख उपाय रहेको उनको दाबी छ ।

त्यसका साथै हरेक व्यक्तिले सावधानी अपनाउनु अनिवार्य रहेको टेड्रोसले बताए । टेड्रोसले खोपको आपूर्ति सुरुमा नियन्त्रित रूपमा वितरण हुने र यसको प्राथमिकतामा स्वास्थ्यकर्मी, बढी उमेरका र जोखिममा रहेका व्यक्तिहरूलाई दिइनुपर्ने बताए ।

प्रकाशित : मंसिर ३, २०७७ १४:०२
पूरा पढ्नुहोस्
प्रतिक्रिया
पठाउनुहोस्
×