आतंककारी हमलापछि युरोपभरिका सीमा कडा पारिँदै- विश्व - कान्तिपुर समाचार

आतंककारी हमलापछि युरोपभरिका सीमा कडा पारिँदै

ददि सापकोटा

पेरिस — फ्रान्स र अस्ट्रियामा आतंककारी हमला बढेपछि युरोपेली मुलुकहरूले आफ्नो सीमामा सुरक्षा व्यवस्था कडा पार्दै लगेका छन् ।

फ्रान्सको राजधानी पेरिसको काँठ क्षेत्रका एक शिक्षकको हत्यासँगै फ्रान्समा लगातार आतंककारी हमला भएपछि युरोपेली मुलुकहरूले आ–आफ्ना देशको सीमामा उच्च सतर्कता अपनाएका स्थानीय सञ्चारमाध्यमहरूले जनाएका छन् ।

फ्रान्सको निस, लियों, पेरिस र अस्ट्रियाको राजधानी भियनामा समेत आक्रमण गरिएपछि आतंककारीहरूले युरोपेली देशमा निर्बाध घुमफिर गर्न पाउने सेन्जेन भिसाको सुविधा दुरुपयोग गरेको भन्दै युरोपेली मुलुकले सीमामा कडाइ गरेका हुन् ।

फ्रान्समा लगातारको आतंककारी हमलापछि राष्ट्रपति एमानुयन माक्रोंले चर्च, स्कुल र धार्मिक स्थलहरूको सुरक्षाका लागि थप ४ हजार सेना खटाउने बताइसकेका छन् । तर सीमा क्षेत्रमा खटाइने सेनाको संख्याबारे उनले केही बताएका छैनन् ।

उता अस्ट्रियाले पनि आतंककारी हमलापछि आफ्नो सीमा क्षेत्रमा थप सुरक्षाकर्मी परिचालन गरेको छ । त्यसैगरी, जर्मनी, बेल्जियम, स्विट्जरल्यान्ड, स्पेन, इटालीलगायत मुलुकले पनि सीमामा सुरक्षा व्यवस्था कडा पारेका जनाइएको छ ।

फ्रान्स र अस्ट्रियामा हालै भएका आतंककारी आक्रमणपछि फ्रान्सेली राष्ट्रपति माक्रोंले युरोपेली मुलुकले आफ्नो खुला सीमालाई कडाइ गर्नुपर्ने बताएका थिए । यस क्षेत्रका बाहिरी सीमाहरूमा अझै बढी सुरक्षा सतर्कता अपनाउनुपर्ने उनको भनाइ छ ।

गैरकानुनी रूपमा युरोप प्रवेश गर्ने आप्रवासीमध्ये केहीले तस्करी गर्ने, आपराधिक गिरोहसँग साँठगाँठ गर्ने तथा आतंककारीहरूको सञ्जालसँग जोडिने गरेको उनको दाबी छ । माक्रोंले डिसेम्बर महिनामा हुने युरोपेली युनियनका साझेदारहरूबीचको शिखर सम्मेलनमा फ्रान्सका तर्फबाट साझा सीमालाई थप कडाइ पार्नुपर्ने विषयमा प्रस्ताव लगिने पनि सार्वजनिक गरेका छन् ।

अक्टोबर २९ मा फ्रान्सको निस सहरस्थित चर्चमा ट्युनिसियाली नागरिकले गरेको आक्रमणमा ३ जनाको ज्यान गएको थियो । आक्रमणमा संलग्न ब्राहिम अलसाउई ५ साताअघि उत्तरी अफ्रिकास्थित इटालियन टापु लाम्पेडुसा पुगेका थिए ।

अस्ट्रियाको भियनामा चार जनाको हत्या गर्ने जिहादी जुलाईमा गोलाबारुद किन्न छिमेकी देश स्लोभाकिया गएको अस्ट्रियाका अधिकारीहरूले सार्वजनिक गरिसकेका छन् । हालसालैका आक्रमणहरूबारे उल्लेख गर्दै माक्रोंले भनेका छन्, ‘आतंकवादी जोखिम जताततै छ ।’

युरोपभर सञ्जाल भएको युरोस्टार रेलसेवाको तथ्यांकअनुसार सन् २०१९ मा ६ लाख २८ लाख गैरयुरोपेली नागरिकहरूले सेन्जेन राष्ट्रको भ्रमण गरेका थिए । यो संख्या अघिल्लो वर्षको तुलनामा १० प्रतिशतले बढी हो । त्यस्तै, ७ लाख १७ हजार गैरयुरोपेली नागरिकलाई त रेलमा प्रवेश गर्नबाटै निषेध गरिएको थियो । यो तथ्यांक हालसम्मकै सबैभन्दा उच्च हो ।

प्रकाशित : कार्तिक २४, २०७७ २०:२६
प्रतिक्रिया
पठाउनुहोस्

फ्रान्समा स्वास्थ्य क्षेत्र सुधार्न ८१ अर्ब युरो

स्वास्थ्य क्षेत्रका कर्मचारीको न्युनतम तलब मासिक १ सय ८३ युरोका दरले वृद्धि हुने
ददि सापकोटा

पेरिस — फ्रान्स सरकारले स्वास्थ्य सेवा सुधार, स्वास्थ्यकर्मीकालागि तलब, सेवा र सुविधा वृद्धिका लागि ८१ अर्ब युरोको प्याकेजको घोषणा गरेका छन् । प्रधानमन्त्रीको आर्थिक प्याकेज घोषणासँगै स्वास्थ्यकर्मीहरुले गर्दै आएको आन्दोलन टुंगिएको छ । स्वास्थ्य सेवासँग सम्बन्धित मजदुर युनियन र सरकारबीच भएको सम्झौताअनुसार उक्त प्याकेज सार्वजनिक गरिएको हो ।

प्रधानमन्त्री जाँ कार्तेक्सले ‘स्वास्थ्यमा आम सुधार’ प्याकेजमा हस्ताक्षर गरेका हुन् । उनले स्वास्थ्य प्रणाली सुधारका लागि यो ‘ऐतिहासिक पल’ भएको बताएका स्थानीय सञ्चारमाध्यमले उल्लेख गरेका छन् । ‘यो ऐतिहासिक प्रयासले कोरोना भाइरसको महामारीविरूद्ध पहिलो मोर्चामा उभिएर लड्ने स्वास्थ्यकर्मीका लागि ठूलो मान्यता राख्छ,’ प्रधानमन्त्रीले भनेका छन् । लोकतन्त्रमा सामाजिक बहसमार्फत सबैले फाइदा लिन सक्ने सम्झौताबाट पुष्टि भएको उनको भनाइ छ ।

‘म धेरै युनियन तथा रोजगारदाताका प्रतिनिधिलाई चिन्दछु जो मेरो पछाडि छन् । वार्ता, छलफल, समझदारी, फेरि वार्ता सधै प्रभावकारी हुन्छ । द्वन्द्व र हिंसाभन्दा माथि रहेर सोच्न सकियो भने यो नै उत्कृष्ट उपाय हो,’ कार्तेक्सले भने ।

मजदुर यूनियनसँगको सात साता लामो रसाकस्सीपछि सरकारले उक्त प्याकेज ल्याएको हो । सम्झौतामा प्रधानमन्त्री, स्वास्थ्यमन्त्री र स्वास्थ्य सेवासित सम्बन्धित युनियनका अधिकारीहरुले हस्ताक्षर गरेका छन् । सम्झौताअनुसार प्यारामेडिकल क्षेत्रका नर्सहरू, नर्सिङ सहयोगीहरू, फिजियोथेरापिस्ट, स्वास्थ्य क्षेत्रका टेक्निसियन, स्ट्रेचबाहक, प्रशासनिक एजेन्टलगायतले मासिक रुपमा तलब पाउने छन् ।

स्वास्थ्यमन्त्री ओलिभिय भेराका अनुसार अब स्वास्थ्य क्षेत्रका कर्मचारीको न्युनतम तलब मासिक १ सय ८३ युरोका दरले वृद्धि हुने छ । तर त्यसका लागि यो सम्झौतालाई संसद्ले भने पारित गर्नुपर्ने छ । पहिलो चरणमा सेप्टेबर १ मा ९० युरो र दोस्रो चरणमा मार्च १ मा ९३ युरो वृद्धिका लागि संसद्‍मा मतदान हुने जनाइएको छ ।

त्यसैगरी, रात्रीकालीन समयमा, बिदाका दिनमा र निजी क्षेत्रमा काम गर्नेहरुका हकमा समेत तलब तथा सुविधा वृद्धि हुनेछ । लगातार १५ वर्षसम्म सरकारी वा निजी क्षत्रेमा काम गर्दै आएका चिकित्सकका लागि मासिक ७ सय युरो वृद्धि गरिएको छ । सरकार र युनियनबीच स्वास्थ्य सेवा सुधारका विषयमा लामो समयदेखि असमझदारी रहेको थियो । स्वास्थ्यकर्मीहरुले स्वास्थ्य सेवा सुधारको माग गर्दै आन्दोलन गर्दै आएका थिए । उनीहरुले स्वास्थ्य सेवा सुधारका लागि सार्वजनिक रुपमा छलफल गरी आर्थिक प्याकेजको माग गरेका थिए ।

सरकारले यो स्वास्थ्य सेवा प्याकेज ल्याएसँगै स्वास्थ्य सेवा विभाग, अन्य निजी स्वास्थ्यसेवाकर्मी र केही स्वास्थ्य मजदुर युनियनहरुले आपत्ति जनाएका छन् । स्वास्थ्यकर्मीका लागि ल्याइएको आर्थिक प्याकेजले अन्य क्षेत्रका कर्मचारीमा निराशा बढाउने तथा सुविधा थपको माग गर्दै आन्दोलन चर्किनसक्ने कतिपयको आंकलन छ ।

प्रकाशित : असार ३०, २०७७ २०:१७
पूरा पढ्नुहोस्
प्रतिक्रिया
पठाउनुहोस्
×