बेलायत-ईयू व्यापार सम्झौता टर्‍यो- विश्व - कान्तिपुर समाचार
कान्तिपुर वेबसाईट
AdvertisementAdvertisement

बेलायत-ईयू व्यापार सम्झौता टर्‍यो

ब्रसेल्समा भएको बेलायत–ईयू दुईदिने सम्मेलन बिनानिष्कर्ष सकिएपछि व्यापार सम्झौताको सम्भावना टरेको हो
नवीन पोखरेल

लन्डन — बेलायती प्रधानमन्त्रीको कार्यालयले ब्रेक्जिटपछि युरोपेली संघसँग हुने व्यापारसम्बन्धी सम्झौताका लागि जारी वार्ता ‘सकिएको’ जनाएको छ । प्रधानमन्त्री कार्यालयले साझेदारीबारे विस्तृत कानुनी मस्यौदा छलफल गर्न युरोपेली संघ तयार नहुँदासम्म वार्ता जारी राख्नुको कुनै औचित्य नहुने जनाएको हो ।

बीबीसीका अनुसार यूकेका प्रमुख वार्ताकार लर्ड फ्रस्टले आफूले ईयूका आफ्ना समकक्षी मिसेल बार्नियलाई अब सोमबार पूर्वनिर्धारित वार्ता गर्नुको कुनै आधार नभएको अवगत गराएका छन् । कार्यालयले दुवै पक्षबीच आउँदो साता फोनबाट वार्ता हुने सहमति भएको जनाएको छ ।

यसअघि ईयू आयोगका अध्यक्ष उर्सुला भन डर लेयेनले एक ट्वीट गर्दै यो सप्ताहान्तपछि ब्रसेल्सको वार्ता टोली सघन छलफलका लागि लन्डन जान लागेको बताएका थिए । ब्रसेल्समा भएको बेलायत–ईयू दुईदिने सम्मेलन बिनानिष्कर्ष सकिएपछि व्यापार सम्झौताको सम्भावना झन् टरेको हो ।

मार्चयता सहमतिका लागि कोभिड महामारीका बेलासमेत भिडियो लिंकमार्फत भएका कैयौं वार्ता निष्कर्षमा पुग्न सकेनन् । बेलायती प्रधानमन्त्री बोरिस जोन्सनले अक्टोबर १५ सम्म खुला व्यापार सम्झौता नभए दुवै पक्ष अगाडि बढ्नुको विकल्प नभएको बताउँदै आएका थिए । जोन्सनले बिनासम्झौता ईयूबाट अलग्गिनुपर्ने बेला आएको चेतावनी दिँदै ‘अस्ट्रेलियन स्टाइलका लागि तयार रहन सबैमा अपिल गरेका छन् । युरोपेली युनियनले अनावश्यक माग अघि सारेको जोन्सनको जिकिर छ । ‘हामीले जटिल कुरा केही चाहेका थिएनौं,’ जोन्सनले भनेका छन्, ‘मित्रतापूर्ण व्यवहार र खुला व्यापारमा आधारित क्यानाडा स्टाइलको सम्बन्ध हाम्रो चाहना थियो ।’ ईयूभित्र जर्मनीपछि बेलायतको अर्थतन्त्र सबैभन्दा ठूलो छ । त्यसकारण पनि रोजगार, उत्पादन, व्यापार, सुरक्षालगायत अन्य विषयमा यी दुवैका लागि निकट सम्बन्ध अत्यावश्यक छ । बेलायत र ईयूबीच व्यापार सम्झौता असफल भए दुवै पक्षले विश्व व्यापार संगठनको सर्तमा व्यापार गर्नेछन् । जसअन्तर्गत नयाँ सीमा नियन्त्रण र करले गर्दा व्यापारका लागि उनीहरूलाई अतिरिक्त लागत हुनेछ ।

बेलायत–ईयूबीच विगत ४७ वर्षदेखिको सम्बन्ध गत ३१ जनवरीमा औपचारिक रूपमा विच्छेद भइसकेको छ । यद्यपि, यस वर्षको अन्त्यसम्म रहने संक्रमणकालीन अवधिका बेला बेलायतले ईयूसँग व्यापार वार्ता चाहेको हो । गत २३ जुन, २०१६ मा भएको ईयू जनमतसंग्रहमा ५१ दशमलव ९ प्रतिशत जनताले अलग्गिने पक्षमा मत हालेका थिए ।

उता, बेलायतमा आउँदो वर्षको सुरुदेखि लागू हुने प्वाइन्ट बेस्ड (अंकमा आधारित) अध्यागमन प्रणालीका लागि तयार रहन बेलायत सरकारले व्यवसायीहरूलाई आह्वान गरेको छ । सरकारले नयाँ प्रणालीबारे जानकारी गराउने उद्देश्यले देशव्यापी रूपमा एक प्रवर्द्धनात्मक अभियानसमेत सुरु गरेको छ । होम अफिसले यसै साता सुरु गरेको अभियानअन्तर्गत विभिन्न मिडिया र माध्यमबाट व्यवसायीहरूलाई नयाँ इमिग्रेसन प्रणालीबारे अपडेट गर्ने प्रयास गरिनेछ । यो वर्षको समाप्तिसँगै बेलायतको युरोपसँगको ‘फ्रि मुभमेन्ट’ सम्झौता अन्त्य हुँदै छ, जसकारण सन् २०२१ सुरुदेखि युरोपेली नागरिकहरूलाई काममा लगाउँदा पनि अन्य मुलुकका नागरिकका लागि जस्तै इमिग्रेसन प्रक्रिया पूरा गर्नुपर्नेछ ।

यसअघि युरोपेली मुलुकका नागरिकहरू स्वतन्त्रतापूर्वक बेलायत आउन र निर्बाध रूपमा काम गर्न सक्ने व्यवस्था छ । ‘फ्रि मुभमेन्ट’ को अन्त्यसँगै उनीहरूले पाउँदै आएको विशेष अधिकार खोसिने भएपछि बेलायतमा काम गर्न आउने लाखौं युरोपेली नागरिकका रोजगारदाता कम्पनीहरूले इमिग्रेसन प्रक्रिया पूरा गर्नुपर्ने भएको हो ।

युरोपेली नागरिकहरूको हकमा लागू हुने यही परिवर्तनबारे ‘अपडेट’ गराउन नै सरकारले प्रवर्द्धनात्मक अभियान सुरु गरेको बताइएको छ । विदेशी कामदारलाई रोजगारी दिनका लागि स्पोन्सर लाइसेन्स लिनुपर्ने व्यवस्था रहेका कारण सम्बन्धित कम्पनीहरूलाई आवश्यक तयारीका लागि सूचित गर्ने प्रयास सरकारले गरेको छ ।

‘फ्रि मुभमेन्ट’ को अन्त्य र अंकमा आधारित इमिग्रेसन प्रणालीको सुरुवातपछि गैरयुरोपेली मुलुकबाट आउने कामदारका लागि बेलायतमा थप अवसर मिल्ने आशा गरिएको छ । जसबाट नेपालीहरूसमेत लाभान्वित हुने अपेक्षा छ ।

प्रकाशित : कार्तिक २, २०७७ ०८:५७
प्रतिक्रिया
पठाउनुहोस्

पाथीभरामा एकै दिन ५ सय तीर्थयात्री

आनन्द गौतम

ताप्लेजुङ — काठमाडौं कीर्तिपुरका मनोज विश्वकर्मा शनिबार पाथीभरा दर्शन गरेर फर्किए । गत वर्ष पहिलो पटक परिवारसहित आएका उनी यस पटक भने एक्लै थिए । कोरोना महामारीका बीच सार्वजनिक यातायातबाट आएका उनले हातमा पन्जा र अनुहारमा मास्क भने लगाएका थिए । गोजीमा सेनिटाइजर बोकेका उनी घरीघरी त्यसलाई निकालेर प्रयोग गर्थे ।

नुवाकोटका गणेश अधिकारी नेतृत्वको आठ जनाको टोलीले पनि शनिबारै पाथीभरा दर्शन गर्‍यो । एउटै गाडीमा आएका उनीहरूले पनि स्वास्थ्य मापदण्ड पालना गरेका थिए । तर उच्च लेकाली क्षेत्रको उकालो चढ्दै गर्दा मास्क लगाइरहन कठिन हुने भएकाले लगाउने भन्दा हातमा बोक्ने धरै देखिए । फेदीको उकालो चढ्दा एकले अर्कोलाई साथ दिनुपर्ने भएकाले सामाजिक दूरी पालना गराउन पनि सम्भव देखिएन ।

सरकारले धार्मिक स्थल खुला गर्ने निर्णय लिएको छैन । तर कोरोना संक्रमणको त्रासकै बीच पाथीभरा दर्शन भने खुला भएको छ । दसैंको पहिलो दिन शनिबार ४ सय ६६ जनाले पाथीभरा दर्शन गरेको माथिल्लो फेदी अस्थायी प्रहरी चौकीले जनाएको छ । ३ हजार ७ सय ९४ मिटर उचाइमा रहेको पाथीभरा दर्शनका लागि शुक्रबार माथिल्लो फेदी, काफ्लेपाटी लगायतका स्थानमा गएर बसेका र सदरमुकाम फुङलिङबाट गएकाहरूले मन्दिर दर्शन गरेर फर्किएका हुन् ।

आइतबार र त्यसपछिका लागि पनि तीर्थयात्री सम्पर्कमा रहेको र होटल बुक गराइरहेको पाथीभरा क्षेत्र विकास समितिका सदस्य तथा माथिल्लो फेदी होटल व्यवसायी संघका अध्यक्ष इन्द्रनारायण भट्टराईले बताए । कोरोना संक्रमणका कारण गत चैतदेखि पाथीभरा ठप्पजस्तै थियो । आफ्नै व्यवस्थापनमा फाट्टफुट्टले भने बाटोमा बास नबसीकनै सरासर जाने र पूजा गरेर फर्कने गरेका थिए । दसैंको पहिलो दिन काठमाडौं, नुवाकोट, झापा, मोरङ, सुनसरीदेखिका तीर्थयात्री आएको भट्टराई बताउँछन् ।

माथिल्लो फेदीमा मात्रै शुक्रबार बेलुका २ सय ७५ को हाराहारीमा तीर्थयात्री बास बसेका थिए । एउटा खाटमा एक जनालाई मात्रै सुताउने, प्रत्येक दिन तन्ना र सिरकको खोल सफा गर्ने, मास्क, सेनिटाइजर अनिवार्य गर्ने जस्ता सुरक्षा विधि अपनाइएको होटल व्यवसायी राजेन्द्र महतले बताए । चैतदेखिको लकडाउनका कारण खाद्यान्न तथा पेय पदार्थको मिति गुज्रिँदा फाल्नुपरेकाले यो सिजनमा थोरै सामानको व्यवस्थापन गरिएको उनको भनाइ छ ।

देउरालीदेखि माथिल्ला फेदीसम्म ३८ वटा होटल तथा खाजाघर छन् । धर्मशालामा बस्नेका लागि कम्बल, राडीलगायत सामग्री पनि समितिले जोहो गरेको छ । मास्क नबोक्नेलाई आफूहरूले उपलब्ध गराएको माथिल्लो फेदी प्राथमिक उपचार केन्द्रका अहेब उमनाथ पौडेलले बताए । सदरमुकामबाट २० किमि दूरीमा रहेको काफ्लेपाटीसम्म अहिले राम्रो मोटर बाटो छ । सुकेटारसम्म ८ किलोमिटर कालोपत्रे सडक छ भने त्यहाँबाट उता कच्ची सडक । मन्दिर पुग्न काफ्लेपाटीबाट पाँच किलोमिटर हिँड्नुपर्छ ।

गत वर्षको तथ्यांकअनुसार पाथीभरामा कोजाग्रत पूर्णिमाका दिन करिब ११ हजारले दर्शन गरेका थिए । सबैभन्दा बढी चैते दसैंको समयमा एकैदिन १३ हजारले दर्शन गरेको पाथीभरा देवी मन्दिर क्षेत्र संरक्षण तथा संवर्द्धन समितिका सचिव लक्ष्मी काफ्लेले जानकारी दिए ।

प्रकाशित : कार्तिक २, २०७७ ०८:५६
पूरा पढ्नुहोस्
प्रतिक्रिया
पठाउनुहोस्
×