तिब्बत पनि ‘अति गरिबी’ बाट मुक्त- विश्व - कान्तिपुर समाचार
कान्तिपुर वेबसाईट
AdvertisementAdvertisement

तिब्बत पनि ‘अति गरिबी’ बाट मुक्त

लक्ष्मी लम्साल

बेइजिङ — चीनको तिब्बत स्वशासित क्षेत्र अब अति गरिबीबाट मुक्त भएको छ । तिब्बतमा कूल ७४ वटा अति गरिबीग्रस्त जिल्लाहरू रहेकोमा अब ती स्तरोन्नति भएका बिहीबार त्यहाँ आयोजित पत्रकार सम्मेलनमा जानकारी गराइएको छ ।

चिनियाँ कम्युनिष्ट पार्टी तिब्बत शाखाका महासचिव ऊ यिङ्च्येले पत्रकार सम्मेलनमा भने, ‘सन् २०१९ को अन्तसम्म तिब्बतका ७४ वटा अति गरिब जिल्लाका ६ लाख २८ हजार जनसंख्या सबै गरिबीबाट मुक्त भएका छन् ।’

अति गरिबीबाट उन्मुक्ति पाएका तिब्बतीहरूको कूल आम्दानी सन् २०१५ को १ हजार ४९९ युआन (चिनियाँ मुद्रा) बाट सन् २०१९ मा आइपुग्दा ९ हजार ३२८ युआन पुगेको छ ।

समृद्धितर्फ अघि बढ्नुपर्छ भन्ने तिब्बतीमा विकसित भएको मानसिकता र सरकारको निरन्तरको प्रयासबाट अन्ततः अति गरिबीको दुश्चक्रबाट तिब्बतका पुरै क्षेत्रहरूलाई मुक्त गर्न सकिएको महासचिव ऊले बताए । उनले थपे, ‘गरिबी निवारण कार्यक्रमप्रति सर्वसाधारणको विचार फेरिएको छ । तिब्बतमा रहेका विभिन्न जातिका किसान तथा पशुपालकहरूको जीवन जिउने तरिका पनि बदलिएको छ।’

तिब्बतमा गरिबी निवारणको विशेषतायुक्त उद्योगको विकास भएपछि ६ लाख भन्दा बढी सर्वसाधारणको जीवन समृद्धितर्फ अघि बढेको छ । चीनले सन् २०२० भरिमा सारा चीनबाट गरिबी उन्मूलन गर्ने घोषणा गरिसकेको छ ।

यो पनि पढ्नुहोस्ः

चीनमा ५ वर्षमा ५ करोड मानिस गरिबी मुक्त

प्रकाशित : आश्विन २९, २०७७ १६:५८
प्रतिक्रिया
पठाउनुहोस्

दसैंको मुखमा खाद्य डिपो रित्तै 

बजारको महँगो चामल किनेर चाड मनाउँदै दुर्गमका बासिन्दा 
राजबहादुर शाही

मुगु — दसैं नजिकिँदै गर्दा जिल्लाका ४ स्थानीय तहका खाद्य डिपोहरु ३ महिनादेखि रित्तिएका छन् । खाद्य व्यवस्था तथा व्यापार कम्पनी लिमिटेडले समयमै खाद्यान्न ढुवानी नगर्दा गाउँका डिपोहरु रित्ता बनेका हुन् । 

चालु आर्थिक वर्षमा कम्पनीले सदरमुकाम गमगढीमा करिब १३ सय क्विन्टल चामल ढुवानी गरेको छ । तर ग्रामीण क्षेत्रका सोरुकोट, पूलु, श्रीकोट, रातापानी र कालै डिपोमा साउनदेखि चामल गएको छैन । दसैंको मुखमा खाद्य डिपो रित्तिएपछि स्थानीयबासी बजारबाट महँगो मूल्यमा खाद्यान्न खरिद गरी उपभोग गर्न बाध्य छन् । ‘ढुवानी अनुदानको चामल गाउँमा कहिल्यै आउँदैन,’ सोरुकोटका कमल शाहीले भने, ‘बजारबाट २ गुणा महँगो मुल्यमा चामल किन्नुपर्ने बाध्यता छ ।’ खाद्य डिपोमा ५२ रुपैयाँ प्रतिकिलो पाइने चामल पनि बजारमा ८० रुपैयाँमा किन्नुपरेको उनले गुनासो गरे ।

दसैं र तिहारमा पनि खाद्यको चामल नपाइने समस्या वर्षौदेखि रहेको सोरु गाउापालिका–६ का पदमबहादुर शाहीले बताए । उनका अनुसार अन्न उत्पादन कम हुँदा अधिकांश बासिन्दालाई बाहिरको चामल किन्नुपर्ने बाध्यता छ । ‘पुरानो अन्न सकियो,’ उनले भने, ‘नयाँ अन्न पाकेको छैन ।’ उनले सोरुकोट डिपोमा चामल नहुादा भीई, नार्थपु, जिमालगायत गाउँका बासिन्दा सदरमुकाममा चामल लिन आउनुपर्ने बाध्यता रहेको बताए ।

डिपोमा चामल ढुवानी नहुँदा स्थानीयले खाद्यान्न अभावको सामना गर्नुपरेको गाउँपालिका अध्यक्ष लोकबहादुर शाहीले बताए । उनका अनुसार अधिकांश घरधुरीमा आफ्नै उत्पादनले ६ महिनाभन्दा बढी खान पुग्दैन । ‘डिपोमा चामल आए विपन्न परिवारलाई राहत मिल्थ्यो,’ उनले भने, ‘कतिपयले ऋण गरेरै भए पनि दसैं–तिहारका लागि खाद्यान्न किनेका छन् ।’

मुगमकार्मारोङको पूलु खाद्य डिपो पनि गत साउनदेखि रित्तै हुँदा ९ वटै वडाका बासिन्दा छाइल बजार पुगेर चामल खरिद गर्न बाध्य भएको गाउँपालिका अध्यक्ष छिरिङक्याप्ने लामाले बताए । उनका अनुसार खाद्यको चामल २५ किलोको बोराको १५ सय ६० रुपैयाँ पर्ने भए पनि स्थानीयबासी बजारमा २ हजार रुपैयाँ प्रतिबोरा चामल खरिद गर्न बाध्य छन् ।

ठेक्का प्रक्रियामा ढिलाइ हुँदा खाद्य डिपोमा चामल ढुवानी हुन नसकेको खाद्य व्यवस्था तथा व्यापार कम्पनी लिमिटेडका सूचना अधिकारी पुष्कर भामले बताए । उनका अनुसार गमगढीमा पनि पर्याप्त चामल ढुवानी हुन सकेको छैन । उनले शाखा कार्यालयका लागि १३ सय क्विन्टल चामल ढुवानी भएको जानकारी दिए ।

प्रकाशित : आश्विन २९, २०७७ १६:५०
पूरा पढ्नुहोस्
प्रतिक्रिया
पठाउनुहोस्
×