'कुनै ठूलो चोट सहनुभन्दा फरक रहेछ कोरोना संक्रमण'- विश्व - कान्तिपुर समाचार

'कुनै ठूलो चोट सहनुभन्दा फरक रहेछ कोरोना संक्रमण'

एजेन्सी

हलिउड अभिनेता ड्वेन जोनसनले केही साताअघि आफू र परिवारका सदस्यहरू काेराेना संक्रमित भएकाे र अहिले सबैजना निकाे भएकाे बताएका छन् । इन्स्टाग्राममार्फत ड्वेनले आफूसहित श्रीमती र दुई छोरीलाई कोरोना संक्रमण भएको जानकारी गराएका हुन् ।

'मेरो श्रीमती लरेन, दुई छोरीहरु र मेरो कोरोना परीक्षण पोजिटिभ आएको थियाे,' इन्स्टाग्राममा सार्वजनिक गरेको भिडियोमा उनले भनेका छन्, 'एउटा परिवारका लागि यी कुरा सामना गर्न चुनौतीपूर्ण र कठिन थियाे । व्यक्तिगत हिसाबले पनि । कुनै ठूलो चोट, दुखाइ सहनुभन्दा फरक छ कोरोना पोजिटिभ देखिनु । मेरो लागि परिवारलाई सुरक्षित गर्नु पहिलो प्राथमिकता हो ।'

परिवार नै संक्रमित हुनु दुःखको कुरा रहेको उनले बताएका छन् । 'मलाई मात्र कोरोना संक्रमण देखिएको भए हुन्थ्यो। तर त्यस्तो भएन । मेरो परिवार नै संक्रमित भयो । यो वास्तवमा पीडादायक नै छ । तर म खुसी छु कि परिवारका सबैजना अहिले काेराेनामुक्त भएका छन् । उनीहरूकाे स्वास्थ्य पनि राम्रो छ,' उनले भने,'सुरुको केही हप्ता दुई छोरीहरूको गलामा समस्या थियो । तर अहिले उनीहरु पनि सामान्य भएका छन् ।'

क्वारेन्टाइनमा रहेका उनीहरुले मास्क लगाउन नछुटाएको उनले बताएका छन् । उनले भिडियोमार्फत सबैलाई सुरक्षित रहन सन्देश दिएका छन् ।

पूर्व व्यवसायिक रेस्लर तथा डब्लुडब्लुई स्टार ४८ वर्षीय जाेनसनका द स्करपियन किङ, फास्ट एन्ड फ्युरियस र जुमान्जी फ्रेन्चाइज चर्चित छन् ।

प्रकाशित : भाद्र १८, २०७७ १३:०१
प्रतिक्रिया
पठाउनुहोस्

कोरोना संक्रमण रोकथामप्रति सरकार अझै गम्भीर भएन : कांग्रेस

‘हचुवाका आधारमा लकडाउन/निषेधाज्ञा लागू गर्ने र हटाउने काम भयो’
कान्तिपुर संवाददाता

काठमाडौँ — कोरोना संक्रमण रोकथाम र उपचारको आवश्यक तयारीप्रति सरकार अझै गम्भीर नभएको कांग्रेसले आरोप लगाएको छ । कांग्रेसको ‘कोभिड–१९ अनुगमन समिति’का संयोजक प्रकाशशरण महतले विज्ञप्ति जारी गर्दै सरकारले ठोस अध्ययनका आधारमा नभएर हचुवाका भरमा लकडाउन र निषेधाज्ञा गर्ने र हटाउने काम गरेको बताएका हुन् । 

‘उपत्यकामा फेरि निषेधाज्ञा थपिएको छ । देशको विभिन्न भागहरुमा पनि निषेधाज्ञा लागू गरिएको छ । यस्ता लकडाउन र निषेधाज्ञा गर्ने र हटाउने निर्णय ठोस अध्ययनका आधारमा नभएर हचुँवामा हुने गरेका छन् । अन्य तयारीको अभावमा कोरोना नियन्त्रणमा सरकारको लकडाउन र निषेधाज्ञाप्रतिको निर्भरता बढ्दो छ,’ विज्ञप्तिमा भनिएको छ ।

निषेधाज्ञाको निरन्तरताले आर्थिक–सामाजिक संकट चुलिँदै गएको तर संक्रमण बढ्ने क्रम भने कम नभएको संयोजक महतले बताएका छन् । ‘कतिपय ठाउँहरुमा समुदाय स्तरमा समेत संक्रमण फैलिएको छ । निषेधाज्ञा लगाउने/नलगाउने निर्णय स्थानीय प्रशासनहरुले गरेको देखाएर सरकार कोरोना रोकथाम र उपचारको मूल जिम्मेवारीबाट पन्छिन खोज्दैछ,’ विज्ञप्तिमा भनिएको छ ।

कांग्रेसका तर्फबाट कोभिड–१९ अनुगमन समितिले केही दिन अगाडि १३ बुँदे ध्यानाकर्षणसहित सरकारसँग कोरोना रोकथाम, उपचार व्यवस्थापन र आर्थिक—सामाजिक संकट कम गर्न अल्पकालीन र दीर्घकालीन कार्ययोजना सार्वजनिक गर्न माग गरे पनि सरकारसँग अझै जनतालाई आश्वस्त पार्ने कुनै तयारी नदेखिएको महतले बताएका छन् ।

‘हामी सरकारको यस्तो संवेदनहीनता र निष्क्रियताको घोर निन्दा गर्दछौं । साथै, तत्काल कोरोना संक्रमणलाई नियन्त्रण गर्न, उपचारको समुचित व्यवस्था गर्न र नागरिकहरुको आर्थिक सामाजिक जीवनमा देखा परेको कष्टलाई कम गर्न तत्काल अल्पकालीन र दीर्घकालीन कार्ययोजना सार्वजनिक गर्न फेरि पनि माग गर्दछौं,’ विज्ञप्तिमार्फत महतले भनेका छन् ।

प्रकाशित : भाद्र १८, २०७७ १२:५६
पूरा पढ्नुहोस्
प्रतिक्रिया
पठाउनुहोस्
×