चुनावमा धाँधली गर्न विपक्षीहरू लागिपरेका छन् : ट्रम्प- विश्व - कान्तिपुर समाचार

चुनावमा धाँधली गर्न विपक्षीहरू लागिपरेका छन् : ट्रम्प

हुलाकमार्फत गरिने मतदानलाई डेमोक्र्याटहरुले दुरूपयोग गरेर चुनावी नतिजा आफ्नो पक्षमा पार्न सक्ने अमेरिकी राष्ट्रपति डोनाल्ड ट्रम्पको दाबी 
एजेन्सी

नर्थ क्यारोलाइना — अमेरिकी राष्ट्रपति डोनाल्ड ट्रम्पले नोभेम्बरमा हुने राष्ट्रपतीय चुनावमा धाँधली गर्न विपक्षीहरू लागिपरेको दाबी गरेका छन् । रिपब्लिकन दलले दोस्रो कार्यकालका निम्ति उनको उम्मेदवारी निश्चित गरेलगत्तै ट्रम्प मञ्चमा आएर एक घण्टा सम्बोधन गरेका थिए । यद्यपि, रिपब्लिकन दलको राष्ट्रिय सम्मेलनमा उनले सम्बोधन गर्दै पूर्वनिर्धारित कार्यक्रम भने थिएन ।

रिपब्लिकन पार्टीको राष्ट्रिय सम्मेलनमा अमेरिकी राष्ट्रपति डोनाल्ड ट्रम्प र उपराष्ट्रपति माइक पेन्स । तस्बिर : एपी

‘तिनीहरू (विपक्षीहरू) ले अमेरिकी जनतालाई छल गर्न कोभिडलाई प्रयोग गरिरहेका छन्,’ नर्थ क्यारोलिनामा आयोजित पार्टी सम्मेलनमा उनले ट्रम्पले भने । उनले हुलाकमार्फत गरिने मतदानलाई डेमोक्र्याटहरूले दुरुपयोग गरेर चुनावमा धाँधली गर्न लागेको आरोप लगाएका हुन् । यद्यपि, राष्ट्रपति ट्रम्पले त्यसबारे कुनै प्रमाण भने सार्वजनिक गरेनन् ।

यसपालि कोरोना भाइरसको महामारीका कारण ठूलो संख्याका अमेरिकीले हुलाकमार्फत मतदान गर्ने ठानिएको छ । स्वतन्त्र विज्ञ तथा अधिकारीहरूले भने अमेरिकाको मतदानमा अनियमितता हुने दाबीलाई ठाडै नकारेका छन् ।

सन् २०१७ मा ब्रेनन सेन्टर फर जस्टिसले गरेको सर्वेक्षणमा अमेरिकी चुनावमा धाँधली हुने प्रतिशत ०.००००४ देखि ०.०००९ रहेको देखिएको थियो । संघीय निर्वाचन आयोगका आयुक्त एलेन वेनट्राबले भने, ‘सामान्यतः हुलाकमार्फत हुने चुनावी मतदानमा षड्यन्त्रको कुनै आधार छैन र हुँदैन ।’

ताजा मत सर्वेक्षणहरूमा डेमोक्र्याट उम्मेदवार जो बाइडेनभन्दा राष्ट्रपति ट्रम्प पछाडि देखिएका छन् । दुईबीचको दूरी थोरै तर उल्लेखनीय छ । पूर्वराष्ट्रपति बाराक ओबामा प्रशासनमा उपराष्ट्रपतिका रूपमा काम गरिसकेका बाइडेन ट्रम्पभन्दा दस प्वाइन्ट अघि रहेको दाबी गरिएको छ । रिपब्लिकन दलको भेला ट्रम्पका निम्ति यो स्थिति उल्ट्याउने उत्तम अवसर हुन सक्ने विश्लेषकको भनाइ छ ।

सम्मेलनका क्रममा बोल्दै ट्रम्पले आफूलाई जिताए अमेरिका अघि बढ्ने दाबीसमेत गरेका छन् । ‘उनीहरूले यो चुनाव जित्न सक्ने एकमात्र तरिका भनेको चुनावमा धाँधली भए मात्र हो,’ ट्रम्पले भने, ‘यो चुनाव हामीले जित्नैपर्छ ।’

राष्ट्रपति ट्रम्पले आगामी नोभेम्बर ३ मा हुने चुनाव अमेरिका र अमेरिकी जनताका लागि इतिहासकै सबभन्दा महत्त्वपूर्ण चुनाव भएको बताए । ‘यो सबभन्दा ठूलो चुनाव हो । हाम्रो देश अत्यन्त खराब दिशामा जान सक्छ वा अझै राम्रो उचाइमा पुग्न सक्छ । चीनबाट भाइरस आउनु अगाडि हामी राम्रो दिशामा गइरहेका थियौं ।’

कोरोना भाइरसको महामारी नियन्त्रण र रोकथामका लागि प्रभावकारी कदम चाल्न नसकेको भन्दै पछिल्लो समय ट्रम्प प्रशासन निकै आलोचित बनेको छ । यस्तो अवस्थामा चुनावी नतिजा विपक्षीको पोल्टामा जाने राजनीतिक विश्लेषकहरूको अनुमान छ । आधुनिक कालमा दोस्रो कार्यकाल जित्न अहिले ट्रम्पले सामना गरेजत्तिको चुनौती निकै कम अमेरिकी राष्ट्रपतिहरूले गर्नुपरेको बीबीसीले उल्लेख गरेको छ । ट्रम्पलाई रिपब्लिकन दलले सोमबार औपचारिक रूपमा राष्ट्रपतिको उम्मेदवार बनाएको हो । नर्थ क्यारोलिनको चार्लोटमा आयोजित राष्ट्रिय सम्मेलनले उम्मेदवार चयन गरेसँगै त्यहाँ उपस्थित समर्थकहरूले ‘अरू चार वर्ष’ भन्दै खुसी मनाएका थिए ।

पार्टी सम्मेलनलाई सम्बोधन गर्ने रिपब्लिकनहरूले राष्ट्रपति ट्रम्पको जित सुनिश्चित भएको दाबी गरेका थिए । फ्लोरिडाका सांसद म्याट गेजले डेमोक्र्याटहरू ह्वाइटहाउसमा प्रवेश गरे अमेरिका भूतको चलचित्रजस्तो बन्ने दाबी गरे । राष्ट्रसंघका लागि अमेरिकी राजदूत निक्की हलीले अमेरिकामा रंगभेद नरहेको दाबी गरिन् ।

ट्रम्पका छोरा जुनियर ट्रम्पले जो बाइडेनले कर आफू र सम्भ्रान्त वर्गका लागि प्रयोग गर्न चाहेको आरोप लगाए । ट्रम्प पत्नी मेलानियाका साथै उनका छोराछोरीहरू एरिक, इभाना तथा टिफनीले पनि सम्मेलनमा सम्बोधन गर्दै छन् । बिहीबार ट्रम्पले सम्मेलनको समापनका अवसरमा महत्त्वपूर्ण सम्बोधन गर्नेछन् ।

प्रकाशित : भाद्र १०, २०७७ ०६:२०
प्रतिक्रिया
पठाउनुहोस्

चिनियाँ चिकित्सकको नेपाल सहायता कहिले ?

चिनियाँ विशेषज्ञहरू हालसम्म ५६ वटा देशमा पुगेर कोरोना भाइरसको महामारी रोकथाम तथा नियन्त्रणमा सक्रिय भूमिका निर्वाह गरिसकेका छन्
लक्ष्मी लम्साल

बेइजिङ — चीनको वुहानबाट फैलिएको कारोना भाइरस (कोभिड–१९) को महामारीबाट प्रभावित देशहरूमा चीनले सक्दो सहयोग गरिरहेको छ । चीनले आफ्नो अनुभवका आधारमा हालसम्म विभिन्न देशहरूमा विशेषज्ञ टोली खटाएर महामारी नियन्त्रणमा सघाउ पुर्‍याएको छ ।

पछिल्लो समय नेपाल पनि महामारीबाट दिनदिनै आक्रान्त हुँदै गइरहेको छ । चीनले भिडियो कन्फरेन्समार्फत सुझावहरू दिने तथा केही औषधि तथा उपकरण मात्रै पठाएको छ । तर विशेषज्ञहरूको टोली पठाउनेबारे भने केही जनाएको छैन ।

त्यस विषयमा चिनियाँ पक्षसँग निरन्तर सम्पर्क गरिरहेको बेइजिङस्थित नेपाली दूतावासले जनाएको छ । नेपाली राजदूत महेन्द्रबहादुर पाण्डेले चिनियाँ पक्षबाट ठोस जवाफ आइनसकेको जनाए । ‘अहिले हामी चिनियाँ पक्षसँग सम्पर्कमै छौं, ठोस निष्कर्षमा पुगेपछि जानकारी गराउँछांै,’ पाण्डेले भने ।

महामारी फैलिएयता चीनले इटाली, सर्विया, कम्बोडिया, पेरु, पाकिस्तान, सुडान, बंगलादेश गरी दर्जनौं देशमा आफ्ना दक्ष चिकित्सक पठाएको छ भने १० भन्दाबढी अन्तर्राष्ट्रिय संगठनसँग महामारी रोकथामको अनुभव तथा उपचार योजना प्रस्तुत गरेको छ ।

फिलिपिन्स सरकारको निमन्त्रणामा त्यहाँ गएको चिनियाँ चिकित्सकहरूको टोलीका प्रमुख वाङ सनकङले भने, ‘चीनसँग फिलिपिन्सको राम्रो सम्बन्ध बन्दै गएको छ । फिलिपिनीहरूले चिनियाँ विशेषज्ञतामा निकै रुचि पनि देखाए ।’

चिनियाँ विशेषज्ञ टोली सम्बन्धित देशमा गएर अस्पतालहरूको भ्रमण, भाइरस परीक्षण, स्थानीय विशेषज्ञहरूसँग स्थलगत छलफल गर्ने गर्छन् । चीनले महामारी नियन्त्रणमा उल्लेख्य सफलता हासिल गरेको देखेर विभिन्न देशहरूले उनीहरूबाट सल्लाहसुझाव लिने गरेका छन् ।

इटालीमा खटिएका चिनियाँ चिकित्सक राहत टोलीका विशेषज्ञ ल्याङ सोङआनले इटालीमा महामारीको वितण्डा मच्चिइरहेका बेला त्यहाँका जनताले ताली बजाएर हौसला दिएको स्मरण गरे ।

बंगलादेशमा पुगेका चिनियाँ चिकित्सक टोलीसँग त्यहाँका विदेशमन्त्री एके अब्दुल मोमनले कुनै पनि देश एक्लैले कोरोना महामारी नियन्त्रण गर्न सम्भव नभएको बताएका थिए ।

हालसम्म ५६ वटा देशमा चिनियाँ चिकित्सक, विशेषज्ञहरू पुगेर महामारी रोकथाम तथा नियन्त्रणमा सक्रिय भूमिका निर्वाह गरेको चीनले बताएको छ । विभिन्न देशमा पुगेका चिनियाँ चिकित्सकहरूले ती देशमा काम गर्दाका बखतमा अझ स्तरीय अनुभव हासिल गर्न पाएको सुनाए ।

प्रकाशित : भाद्र ९, २०७७ २२:४४
पूरा पढ्नुहोस्
प्रतिक्रिया
पठाउनुहोस्
×