अस्ट्रेलियामा विदेशी विद्यार्थी आवेदनमा उल्लेख्य कमी- विश्व - कान्तिपुर समाचार

अस्ट्रेलियामा विदेशी विद्यार्थी आवेदनमा उल्लेख्य कमी

नारायण खड्का

सिड्नी — अस्ट्रेलियामा उच्च शिक्षा अध्ययनका लागि आवेदन दिने विदेशी विद्यार्थीको संख्यामा एक तिहाइले कमी आएको छ । हालै सार्वजनिक तथ्यांकअनुसार गत वर्षको तुलनामा अस्ट्रेलियामा अध्ययन गर्न चाहने विदेशी विद्यार्थीको आवेदनमा ३३ दशमलव ५ प्रतिशतले कमी आएको हो । उच्च शिक्षा अध्ययनका लागि आवेदन दिने अन्य देशका विद्यार्थीको तुलनामा नेपालीको संख्या सबैभन्दा कम छ ।

गत वर्षको तुलनामा यस वर्ष नेपालबाट उच्च शिक्षाका लागि आवेदन दिने विद्यार्थीको संख्या ६१ प्रतिशत कम छ । त्यस्तै, भारतीय विद्यार्थीको संख्या ४७ प्रतिशतले घटेको छ भने चिनियाँ विद्यार्थीको आवेदन २० प्रतिशतले कमी आएको छ । अस्ट्रेलियामा रहेका विद्यार्थीले दिने आवेदन संख्यामा भने गत वर्षको भन्दा १० प्रतिशतले वृद्धि भएको जनाइएको छ । जसमा यहाँका विभिन्न राज्यमा रहेका ३६ प्रतिशत नेपाली विद्यार्थीले भिसाका लागि आवेदन दिएका छन् ।

इन्टरनेसनल एजुकेसन एसोसिएसनले केही दिनपहिले आयोजना गरेको एक कार्यक्रममा गृह मामिला विभागका विद्यार्थी भिसा तथा ग्य्राजुएट निर्देशक म्याथ्यु नोबलले यात्रामा लगाइएको प्रतिबन्धका कारण यो अवस्था सिर्जना भएको बताएका थिए ।

शिक्षाविज्ञहरूले कोरोना भाइरसका कारण सिर्जित समस्याका कारण आउँदो दुई वर्षसम्म अन्तर्राष्ट्रिय विद्यार्थी अध्ययनका लागि आउने क्रममा असर पर्ने बताएका छन् । अन्तर्राष्ट्रिय विद्यार्थीलाई भिसा आवेदन खुला गर्ने सरकारी निर्णयलाई यहाँका कलेज तथा विश्वविद्यालयले स्वागत गरेका भए पनि यो समस्या लामो समयसम्म रहने विज्ञहरूले जनाएका छन् ।

वुलंघन युनिभर्सिटीका निमित्त चान्सलर प्रोफेसर एलेक्स फ्रिनोले सरकारले बाहिरबाट आवेदन बन्द गर्ने निर्णय गरेका कारण यो समस्या सिर्जना भएको बताएका छन् । स्थानीय समाचार माध्यमका अनुसार अस्ट्रेलियाको प्राविधिक शिक्षा तथा साना कलेजमा अध्ययन गर्न आउन चाहने विद्यार्थीको संख्या भविष्यमा धेरै बढ्ने भएको छ । जसमा नेपाल तथा भारतलगायत विद्यार्थी अध्ययनका लागि आउने गरेका छन् ।

नेपाली शैक्षिक परामर्शदाता अर्जुन थपलिया कोरोना भाइरसको अवस्था सामान्य हुनेबित्तिकै नेपाली विद्यार्थीको संख्या अस्ट्रेलियामा बढ्ने दाबी गर्छन् । उनी अस्ट्रेलियाको चीनसँगको बिग्रँदो सम्बन्ध, विदेशी विद्यार्थी यहाँको अर्थतन्त्रको मुख्य स्रोत हुनु र प्राविधिक शिक्षाका लागि विदेशी विद्यार्थी नै मुख्य ग्राहक भएका कारणसमेत वर्तमान अवस्था सहज भएपछि नेपालबाट आउने विद्यार्थीको संख्या धेरै बढ्ने दाबी गर्छन् । भाइरसको संक्रमण बढेसँगै अन्तर्राष्ट्रिय उडान बन्द गरिएपछि विदेशी विद्यार्थी अध्ययनका लागि यहाँ आउन पाएका छैनन् । अर्का नेपाली परामर्शदाता सञ्जीव पाण्डे मुख्य गरेर विदेशी विद्यार्थी आउने समयमा भाइरसको समस्या सिर्जना भएकाले यो संख्या कम हुन सक्ने बताउँछन् ।

अस्ट्रेलिया सरकारले अन्तर्राष्ट्रिय उडान कहिलेदेखि सञ्चालन गर्ने निर्णय गरिसकेको छैन भने यहीं रहेका विदेशी विद्यार्थीलाई समेत अनलाइन अध्ययनका लागि प्रेरित गरिरहेको छ । विगत लामो समयदेखि विदेशी विद्यार्थी अस्ट्रेलियाको अर्थतन्त्रको मुख्य स्रोत बन्दै आएका छन् । अस्ट्रेलियाको अर्थतन्त्रमा विदेशी विद्यार्थीले गत आर्थिक वर्षमा मात्र करिब ३७ अर्ब डलर बराबरको योगदान पुर्‍याएको सरकारी तथ्यांक छ ।

प्रकाशित : श्रावण २७, २०७७ ०७:४५
प्रतिक्रिया
पठाउनुहोस्

लेवरकुसनलाई हराएर इन्टर युरोपा लिगको अन्तिम चारमा

एजेन्सी

डुसलडोफ — बेल्जियमका फरवार्ड रोमेलु लुकालुले सोमबार इन्टर मिलानलाई युरोपा लिगको सेमिफाइनल प्रवेश गर्न निर्णायक खेल प्रदर्शन गरेका छन् । उनकै उत्कृष्ट प्रदर्शनमा इन्टरले बायार लेवरसकुसनलाई २–१ ले हरायो । 

निकोलो बारेलाले १५ औं मिनेटमा इन्टरलाई सुरुवाति अग्रता दिलाए । त्यसको ६ मिनेटपछि बेल्जियमका खेलाडी लुकाकुले दोस्रो गोल थपे । जर्मन टिमका लागि काइ हारभटेजले एक गोल फर्काए ।

लुकालुले युरोपा लिगमा लगातार नवौं खेलमा गोल गरेका हुन् र उनी यस्तो उपलब्धि हात पार्ने पहिलो खेलाडी हुन् । अब अन्तिम चारमा इन्टरको प्रतिद्वन्द्वी मंगलबार साख्तर डोनेस्क र एफसी बासेलबीच खेलले निर्धारण गर्नेछ ।

प्रकाशित : श्रावण २७, २०७७ ०७:३९
पूरा पढ्नुहोस्
प्रतिक्रिया
पठाउनुहोस्
×