भारतीय विदेशमन्त्रीले भने–‘बुद्ध महान् भारतीय’- विश्व - कान्तिपुर समाचार
कान्तिपुर वेबसाईट
AdvertisementAdvertisement

भारतीय विदेशमन्त्रीले भने–‘बुद्ध महान् भारतीय’

सुरेशराज न्यौपाने

नयाँदिल्ली — भारतीय विदेशमन्त्री एस. जयशंकरले गौतम बुद्ध भारतीय भएको दाबी गरेका छन् । भारतीय उद्यमी तथा व्यवसायीहरुको छाता संगठन कन्फडरेसन अफ इण्डियन इन्डष्ट्रिद्वारा शनिबार आयोजित इण्डिया एट ७५ भर्चुअल सम्मेलनमा सम्बोधन गर्ने क्रममा जयशंकरले त्यस्तो धारणा राखेका हुन् ।

‘हामी सबैले आजसम्मकै महान भारतीय भनेर चिन्ने दुई जनालाई हो । पहिलो गौतम बुद्ध र दोस्रो महात्मा गान्धी । र, हामीले मात्र होइन यी दुईलाई यसरी चिन्ने पूरै विश्वले नै महान् भारतीयका रुपमा चिन्छ’ सम्मेलनलाई सम्बोधनका क्रममा जयशंकरले भनेका छन् ।

भारतीय राजनीतिक नेतृत्वबाट गौतम बुद्धलाई भारतको दाबी गरिएको यो पहिलो पटक भने होइन । भारतीय प्रधानमन्त्री नरेन्द्र मोदीले समेत दुई वर्षअघिको बुद्ध पूर्णिमाको अवसर दिएको मन्तव्यमा भारत बुद्धको भूमि भएको दाबी गरेका थिए । मोदीको उक्त भनाइको पनि नेपालमा विरोध भएको थियो । तर उनै मोदीले ठिक ६ वर्षअघि नेपालको व्यवस्थापिका संसदलाई सम्बोधन गर्दै नेपाल बुद्ध भूमि भएको र सारा विश्वलाई शान्तिका लागि प्रेरित भएको उल्लेख गरेका थिए । मोदीको गरेको उक्त सम्बोधनले नेपालमा निकै वाहवाही पाएको थियो । तर, नेपालमा त्यस्तो अभिव्यक्ति दिएका मोदीले नै बेलाबखत बुद्ध भारतीय भएको दाबी गर्दै आएका छन् । गत वर्ष संयुक्त राष्ट्र संघको महासभालाई सम्बोधन गर्ने क्रममा पनि मोदीले भारतले विश्वलाई बुद्ध दिएको दाबी गरेका थिए ।

भारतीय पक्षबाट बेलाबखत आउने यस किसिमका अभिव्यक्तिहरुको नेपालमा चर्को विरोध हुँदै आएको छ । सन् २०१३ मा भारतीय टेलिभिजन च्यानल जीले प्रसारण गरेको बुद्धको जीवनीमा आधारित सिरियललाई लिएर पनि ठूलो विवाद भएको थियो । उक्त सिरियलमा बुद्धलाई भारतीय भएको देखाइएको थियो । त्यसपछि फेसबुक, ट्विटरलगायतका सामाजिक सञ्जालमा उक्त सिरियलमाथि तत्काल प्रतिबन्ध लगाउनुपर्ने मागसहित तीव्र आक्रोश प्रकट गरिएको थियो । नेपालमा चर्को विरोध भएपछि नेपालका केबल अपरेटरहरुले उक्त सिरियलको प्रसारणमै रोक लगाएका थिए ।

त्यसताका नेपाल भ्रमणमा रहेकी भारतीय विदेश सचिव सुजाता सिहंले दिल्ली फर्कनुअघि काठमाडौंमा भएको पत्रकार सम्मेलनमा बुद्ध नेपालमै जन्मेको भन्नेमा कुनै विवाद नरहेको भन्दै अभिव्यक्ति दिएकी थिइन् । साथै काठमाडौंस्थित भारतीय दूतावासले पनि वक्तव्य जारी गर्दै बुद्धको जन्मस्थल नेपालको लुम्बिनी भएको कुरामा भारत सरकारले प्रष्ट रहेको बताएको थियो । पछि उक्त सिरियलका प्रमुख कलाकार कविर वेदीले पनि ट्विटरमार्फत् माफी मागेका थिए ।

भारतीय पक्षबाट लुम्बिनीका सम्बन्धमा हुँदै आएका यस किसिमका अभिव्यक्तिले नेपालमाण् तीव्र प्रतिरोध हुँदै आएको छ ।

प्रकाशित : श्रावण २५, २०७७ ०७:५९
प्रतिक्रिया
पठाउनुहोस्

सुरक्षा मापदण्ड पालना गराउन टोल सुधार समिति

कान्तिपुर संवाददाता

काठमाडौँ — कोरोना संक्रमण रोकथाम तथा नियन्त्रण र संक्रमितको पहिचान गर्न जिल्ला प्रशासन कार्यालय काठमाडौंले स्थानीय टोल सुधार समितिलाई परिचालन गर्ने गरी नयाँ प्रतिकार्य योजना ल्याएको छ ।

राजधानीमा संक्रमितको संख्या दैनिक बढ्दै गएको, संक्रमण पुष्टि भए पनि संक्रमित सम्पर्कमै नआएको, स्वास्थ्य र सुरक्षा मापदण्ड पालना नगरेकोलगायत कारण स्थिति थप खतराउन्मुख हुन सक्ने भन्दै काठमाडौं प्रशासनले स्थानीय प्रहरी र नगरपालिकाका वडामार्फत टोल सुधार समितिलाई परिचालन गर्न लागेको हो ।

समितिका पदाधिकारी र सदस्यलाई भीडभाड नियन्त्रण, मास्क/सेनिटाइजर प्रयोग, लुकेर बसेका संक्रमितको खोजीलगायतमा परिचालन गरिने काठमाडौं प्रशासनले जनाएको छ । काठमाडौंका प्रमुख जिल्ला अधिकारी जनकराज दाहालले आइतबार कोरोना संक्रमणविरुद्ध थप प्रतिकार्य योजना अनुमोदन गर्न जिल्ला क्राइसिस म्यानेजमेन्ट सेन्टरको बैठक बोलाइएको बताए । चारवटै सुरक्षा निकायका जिल्ला प्रमुख, काठमाडौं महानगरका मेयर, जिल्ला समन्वय समिति प्रमुखलगायत अधिकारीसहितको बैठकले यसबारे निर्णय गर्नेछ ।

‘स्थानीय टोल सुधार समितिलाई प्रहरी र स्थानीय वडा कार्यालयसँग समन्वय गरेर कोरोना रोकथाम तथा नियन्त्रणका लागि परिचालन गर्ने गरी कार्ययोजना बनाएका छौं,’ प्रजिअ दाहालले भने, ‘आइतबार यसकै लागि आकस्मिक बैठक नै बोलाइएको छ ।’ अब टोल सुधार समितिकै सिफारिसमा प्रशासनले एरिया सिल गर्ने उनले बताए । ‘प्रशासनले समन्वय गर्छ, स्थानीयकै माग र आग्रह अनि जोखिम मूल्यांकन गरेर एरिया सिल गर्नेदेखि निश्चित सेवा सुचारु गर्ने, नगर्नेबारे निर्णय लिन्छ,’ दाहालले भने, ‘संक्रटविरुद्ध जुध्न स्थानीयको भूमिका नै महत्त्वपूर्ण हुने देखियो ।’

आइतबार नै प्रशासनले काठमाडौंका उद्योग वाणिज्य संघ, गैरसरकारी संस्थाका प्रमुखलगायतसँग निजी र गैरसरकारी संघसंस्थाको सेवा प्रवाह र नियमनबारे छलफल गर्न बोलाएको छ । सचेतनासम्बन्धी माइकिङ, युवा परिचालन, मानवीय सहायता र समन्वय, व्यापार व्यवसाय सञ्चालनमा मापदण्ड पालनालगायत विषयमा छलफल गर्न निजी र गैरसरकारी संस्थाका प्रमुख र प्रतिनिधिहरूलाई बोलाइएको प्रजिअ दाहालले बताए । यसबारे भक्तपुर र ललितपुरका प्रजिअसँग पनि समन्वय गरिने उनले बताए ।

गहना पोखरी क्षेत्र सिल

प्रहरी र स्थानीयसहित १० जनामा कोरोना संक्रमण पुष्टि भएपछि काठमाडौं महानगरपालिका–५, हाँडीगाउँ–गहना पोखरी क्षेत्र शनिबार सिल गरिएको छ । जिल्ला प्रशासन कार्यालय काठमाडौं र महानगरीय प्रहरी परिसरसँग समन्वय गरेर वडा कार्यालयले टंगाल र छाते गणेशस्थानबाट गहनापोखरी हुँदै हाँडीगाउँतर्फ व्यापार–व्यवसाय, सवारी र मानिसको आवागमन अर्को निर्णय नभएसम्मका लागि रोकेको हो ।

प्रकाशित : श्रावण २५, २०७७ ०७:४९
पूरा पढ्नुहोस्
प्रतिक्रिया
पठाउनुहोस्
×