'गैंडा पार्क'मा नेपाल-चीन दौत्य सम्बन्धको कार्यक्रम- विश्व - कान्तिपुर समाचार
कान्तिपुर वेबसाईट
AdvertisementAdvertisement

'गैंडा पार्क'मा नेपाल-चीन दौत्य सम्बन्धको कार्यक्रम

लक्ष्मी लम्साल

बेइजिङ — नेपाल-चीन दौत्य सम्बन्ध स्थापनाको ६५ औं वार्षिकोत्सव कार्यक्रम चीनको क्वाङ्तोङ प्रान्तस्थित नेपालले उपहारस्वरुप चीनलाई दिएका एकसिंगे गैंडा राखिएको निकुञ्जमा आयोजना गरिएको छ ।

आयोजक क्वाङतोङ् प्रान्तीय वैदेशिक मामिला कार्यालयले क्वाङ्चौस्थित नेपाली महावाणिज्य दूतावासका पदाधिकारीहरूलाई शुक्रबार एकजोडी गैंडा राखिएको निकुञ्जमा निम्त्याएर शुभकामना आदानप्रदान तथा गैंडा अवलोकन गराएका हुन् । २०७५ असारमा नेपाल सरकारले भद्र र रूपसी नाम गरेका एकजोडी गैंडा चीनलाई उपहारस्वरूप प्रदान गरेको थियो । उनीहरूलाई अहिले क्वाङतोङ प्रान्तको छाङलोङ निकुञ्जमा राखेर हुर्काइँदैछ ।

कार्यक्रममा महावाणिज्यदूत हरिशरण पुडासैनीसहित वाणिज्य दूतावासका पदाधिकारीहरू, क्वाञ्चौस्थित उपलब्ध केही नेपालीहरू सहभागी भएको त्यहाँ लिटिल पापा इण्डियन नेपाली रेस्टुरेन्टका संचालक प्रमोद घिमिरेले जानकारी दिए । कोरोना महामारीका कारण नेपालमा रहेका अधिकांश नेपाली व्यापारीहरू नेपालमै अड्किएकाले व्यस्त व्यापारिक सहर क्वाङ्चौमा नेपालीको उपस्थिति अहिले पातलो छ । ‘कार्यक्रमको मुख्य विषय दौत्य सम्बन्ध भए पनि एकसिंगे गैंडा नेपाल र चीनबीच मित्रताका सेतु भएकाले गैंडा पार्कमा यो कार्यक्रम गरिएको हो,’ क्वाङ्चौस्थित महावाणिज्य दूतावासका कन्सुलेट कुञ्जन साहले भने ।

दौत्य सम्बन्ध स्थापनाको ६५औं वार्षिकोत्सवको शुभकामना दिँदै महावाणिज्यदूत पुडासैनीले इतिहासकालदेखि नै नेपाल-चीन मैत्री सम्बन्ध मजबुत रहेको बताए। उनले भने, ‘आपसी सम्बन्ध निरन्तर गर्नका लागि कन्सुलेट र चिनियाँ पक्ष मिलेर सहकार्य गर्नुपर्छ।’ उनले नेपाली गैंडाको राम्रो संरक्षण गरेकोमा प्रशंसा गरे। नेपाल र चीनबीच सन् १९५५ अगष्ट १ तारिखमा दौत्य सम्बन्ध स्थापना भएको थियो ।

कार्यक्रममा क्वाङ्तोङ वैदेशिक मामिला कार्यालयका उपमहानिर्देशक छन क्वान् च्युनले चिनियाँ राष्ट्रपति सी चिनिफिङले नेपाली समकक्षी विद्यादेवी भण्डारीसँग टेलिफोन गर्नेदेखि प्रधानमन्त्री ली खछ्याङ र नेपालका प्रधानमन्त्री केपी शर्माओलीबीच दौत्य सम्बन्ध स्थापनाको शुभकामना आदानप्रदानबाट भएबाट अन्तरदेशीय सम्बन्ध निकै घनिष्ठ रहेको झल्किने बताए ।

गैंडा राखिएको छाङलोङ सफारी पार्कका महाप्रबन्धक चाङ स्येलीले नेपाली गैंडाको हुर्काइ र जीवनशैलीबारे जानकारी दिए । उनले नेपाली पाहुना आएको बेला अवसर मिलाएर एकसिंगे गैंडाको भ्रमण गराउने गरेको सुनाए ।

नेपालले सोही वर्षको भदौमा चीनलाई उपहारस्वरूप दिएको अर्को एक जोडी गैंडा सोल्टी र मितिनीलाई शाङ्हाईको पुतोङस्थित वन्यजन्तु पार्कमा राखिएको हो । तर सोल्टीको गत वर्ष माघमै मृत्यु भएपछि हाल पोथी गैंडा मात्रै एक्लै हुर्किरहेकी छ ।

प्रकाशित : श्रावण २४, २०७७ १७:२९
प्रतिक्रिया
पठाउनुहोस्

चीनमा ६ महिनाअघि मृत्यु भएका नेपालीको शव न‍ेपाल पठाइयो

लक्ष्मी लम्साल

बेइजिङ — चीनमा माघ दोश्रो साता निधन भएका एक नेपालीको शव शुक्रबार नेपाल फर्काइएको छ । कोभिड-१९ महामारीका कारण गत जनवरी २३ तारिख वुहानमा लकडाउन गरिएपछि त्यहाँस्थित एउटा होटलका ‘सेफ’ पुष्कर खड्काको शव अस्पतालमै रहेको थियो ।

हुबेई प्रान्तको वुहानस्थित इण्डियन मार्का होटलमा काम गर्ने दोलखाका ३८ वर्षीय नेपाली कामदार पुष्कर खड्काको जनवरी १९ तारिख राति आफू बसेकै होटलमा मृत्यु भएको थियो।

बेइजिङस्थित नेपाली राजदूतावासका अनुसार शव नेपाल फर्काउने क्रममा वैदेशिक रोजगार प्रवर्द्धन बोर्डको ३९ हजार आरएमबी सहयोग र चीनस्थित नेपाली समुदायबाट संकलित ७३ हजार आरएमबी गरी १ लाख १२ हजार चिनियाँ युआन खर्च लागेको छ। दूतावासको समन्वयमा वुहानबाट मृतक खड्काको शव १६ सय किलोमिटर टाढा युनान प्रान्तको राजधानी खुनमिङस्थित छाङ्श्वे विमानस्थलमा शव वाहनद्वारा पुर्‍याइएको दूतावासका मिनिस्टर सुशील लम्सालले जानकारी दिए।

अस्पतालले जनाएअनुसार खड्कामा कोरोना भाइरसको संक्रमण थिएन। मृतकका आफन्‍त धनबहादुर कार्कीका अनुसार खड्का एक दशकदेखि चीनमा ‘सेफ’सम्बन्धी काम गर्दै आएका थिए।

चीनबाट ९७ नेपाली फर्किए

कोरोना महामारीका कारण अड्किएर बसेका ९७ जना नेपालीहरू शुक्रबार हिमालय एयरलाइन्सको फ्लाइटबाट नेपाल फर्किएका छन्। उनीहरूमध्ये अधिकांश अध्ययन पूरा गरेका विद्यार्थीहरू छन् भने कतिपय आफन्त भ्रमणको सिलसिलामा थिए।

खुनमिङ विमानस्थलबाट नेपालीहरू सहितको विमान बेइजिङ समयअनुसार दिउँसो सवा १ बजे काठमाडौंका लागि प्रस्थान गरेको छ। यसअघि गत असार २५ मा १०५ जना नेपाली स्वदेश फर्किएका थिए।

सम्बन्धित समाचार

प्रकाशित : श्रावण १६, २०७७ ११:१५
पूरा पढ्नुहोस्
प्रतिक्रिया
पठाउनुहोस्
×