कोरोनाबाट मृत्यु हुनेको संख्या ७ लाख नाघ्यो, प्रत्येक १५ सेकेन्डमा एक जनाको मृत्यु- विश्व - कान्तिपुर समाचार
कान्तिपुर वेबसाईट
AdvertisementAdvertisement

कोरोनाबाट मृत्यु हुनेको संख्या ७ लाख नाघ्यो, प्रत्येक १५ सेकेन्डमा एक जनाको मृत्यु

कान्तिपुर संवाददाता

काठमाडौँ — कोरोना भाइरस(कोभिड–१९) बाट विश्वभर मृत्यु हुनेको संख्या ७ लाख नाघेको छ । जोन्स होप्किन्स विश्वविद्यालयको कोरोनाभाइरस रिसोर्स सेन्टरका अनुसार बुधबार बिहानसम्म कोरोनाबाट मृत्यु हुनेको संख्या ७ लाख ६ सय ४७ पुगेको छ ।

कोरोनाबाट अमेरिका, ब्राजिल, मेक्सिको, बेलायत र भारतमा सबैभन्दा बढी मृत्यु भएको छ । अमेरिकामा सबैभन्दा बढी एक लाख ५६ हजारभन्दा बढीको मृत्यु भएको छ । अमेरिकामा अहिलेसम्म ४७ लाख ७१ हजारभन्दा बढीमा कोरोना संक्रमण देखिएको छ ।

पछिल्लो २ हप्ताको तथ्यांक हेर्दा प्रत्येक २४ घण्टामा कोरोना भाइरसबाट करिब ५ हजार ९ सय जनाको मृत्यु भएको अन्तर्राष्ट्रिय समाचार संस्था रोयटर्सले जनाएको छ । त्यस्तै एक घण्टामा २ सय ४७ जना र प्रत्येक १५ सेकेन्डमा एक जनाको मृत्यु भएको देखिन्छ ।

पछिल्लो समय अमेरिका र ल्याटिन अमेरिकी देशहरु कोरोना भाइरसको इपिसेन्टर बनेका छन् । सुरुमा ल्याटिन अमेरिकी देशहरुमा संक्रमण कम भए पनि पछिल्लो समय ब्राजिललगायतका देशमा संक्रमण तीव्र गतिमा बढिरहेको छ ।

हालसम्म विश्वभर संक्रमितको संख्या एक करोड ८५ लाख नाघेको छ । संक्रमण पुष्टि भएकामध्ये अहिलेसम्म एक करोड ११ लाखभन्दा बढी निको भएका छन् ।

यसैबीच विश्व स्वास्थ्य संगठन(डब्लूएचओ)ले कोरोना भाइरसविरुद्धको खोप निर्माणमा विभिन्न मुलुकले गरेका अनुसन्धानहरुमा आशा गर्ने ठाउँ भए पनि कहिले बन्छ भनेर भन्न नसकिने बताएको छ । डब्लूएचओका महानिर्देशक डाक्टर टेड्रोस अडहानोम गेहब्रेयससले कोरोनाको खोप निर्माण ‘जादुको छडी’ नभएको बताएका छन् । उनले कोरोनाविरुद्धको खोप कहिल्यै नबन्ने सम्भावना पनि रहेको उल्लेख गर्दै मास्कको प्रयोग र सामाजिक दूरी भौतिक दूरी नै संक्रमण रोकथामको उत्तम विकल्प भएको बताएका छन् ।

प्रकाशित : श्रावण २१, २०७७ ११:५८
प्रतिक्रिया
पठाउनुहोस्

पर्साको पोखरियाबाट  ३६ किलो चरेस बरामद

भूषण यादव

वीरगन्ज — पर्साको सशस्त्र प्रहरी बेस क्याम्प पोखरियाको टोलीले बुधबार बिहान ३६ किलो चरेस बरामद गरेको छ । प्रहरी टोलीलाई देखेर कारोबारीले टाउकोमा बोकेको चरेस खेतमा फ्याँकेर भागेका थिए ।

बेस क्याम्पका सशस्त्र प्रहरी निरीक्षक हरित बडुवालका अनुसार पोखरिया नगरपालिका– २ झाखरा टोलबाटबाट बिहान ४ बजेको समयमा ७० प्याकेट चरेस बरामद गरिएको हो । विशेष सुराकीका आधारमा सशस्त्रको टोलीले ठूलो परिमाणमा चरेस बरामद गरेको बडुवालले जनाए ।

‘विगत लामो समयको प्रयासपछि ३६ किलो चरेस बरामद भएको हो,’ सशस्त्र इन्सपेक्टर बडुवालले भने, ‘हाम्रो टोलीलाई देख्नेबित्तिकै कारोबारी टाउकोमा बोकेको चरेस फ्यालेर भागेका थिए ।’

आधा किलोको हिसाबले एउटा प्याकेट भरिए पनि तौल गरेपछि ७० प्याकेटमा ३६ किलो चरेस रहेको पाइएको उनले बताए ।

प्रकाशित : श्रावण २१, २०७७ ११:१८
पूरा पढ्नुहोस्
प्रतिक्रिया
पठाउनुहोस्
×