मेलबर्नमा ६ साता लामो रात्रिकालीन कर्फ्यु- विश्व - कान्तिपुर समाचार
कान्तिपुर वेबसाईट
AdvertisementAdvertisement

मेलबर्नमा ६ साता लामो रात्रिकालीन कर्फ्यु

‘स्टेट अफ डिजास्टर’ घोषणा
हजारौं नेपालीसमेत प्रभावित
नारायण खड्का

अस्ट्रेलिया — कोरोना भाइरस (कोभिड–१९) को संक्रमण लगातार बढेपछि अस्ट्रेलियाको भिक्टोरिया राज्यमा ‘स्टेट अफ डिजास्टर’ घोषणा गरिएको छ । आइतबार साँझ ६ बजेदेखि सुरु हुने यो घोषणासँगै मेलबर्नमा ६ साताका लागि रात्रिकालीन कर्फ्युको समेत घोषणा गरिएको छ । सरकारद्वारा घोषणा गरिएको यो कडा नियमले मेलबर्नमा रहेका ५० हजार बढी नेपालीसमेत प्रत्यक्ष प्रभावित बनेका छन् ।

आइतबार लागू गरिएको नयाँ नियमबारे जानकारी दिँदै भिक्टोरियाका प्रिमियर ड्यानियल एन्ड्रुज । तस्बिर : एजेन्सी

अस्ट्रेलियाका अन्य राज्यहरुमा भाइरस संक्रमण कम भइरहेको भए पनि भिक्टोरियामा करिब एक महिनादेखि पुनः ठूलो संख्यामा कोरोना भाइरसका संक्रमित देखिएका छन् । आइतबार पत्रकार सम्मेलनमा प्रिमियर ड्यानियल एन्ड्रुजले बढिरहेको संक्रमण नियन्त्रणमा लिनका लागि उच्चस्तरको लकडाउन घोषणा गर्नुपरेको सुनाए । उनले मेलबर्नलगायतका सहरी क्षेत्रमा लेभल– ४ अन्तर्गतको पूर्ण लकडाउन र ग्रामीण क्षेत्रमा लेभल–३ अन्तर्गतको लकडाउन घोषणा गरिएको जानकारी दिए । उनले अत्यावश्यकबाहेक आफ्नो घर क्षेत्रभन्दा ५ किलोमिटर टाढा यात्रा गर्न प्रतिबन्ध लगाएका छन् भने सम्पूर्ण शैक्षिक संस्थामा अनलाइन अध्यापन सुरु हुने भएको छ । उनले संक्रमणको स्रोत पत्ता लगाउन नसकिएका करिब ७ सय केसहरु रहेको भन्दै यसलाई थप फैलन नदिनसमेत यो निर्णय आवश्यक भएको बताएका छन् ।

भिक्टोरियामा मात्र अहिलेसम्म ६ हजार ३ सय बढी सक्रिय संक्रमणका विरामी रहेका छन् । ६ सय ७१ जनामा बितेको २४ घण्टामा संक्रमण पत्ता लागेको हो । यस राज्यमा मात्र अहिलेसम्म १ सय २३ जनाले ज्यान गुमाइसकेका छन् भने ३ सय ८५ जना अस्पतालमा छन जसमध्ये ३८ को आईसीयूमा उपचार भइरहेको छ । भिक्टोरियामा सबैभन्दा बढी वृद्धवृद्धालाई रेखदेख गरिने नर्सिङ होम पछिल्लो समयमा पीडित बनेको छ । करिब ११ सय संक्रमणका बिरामी सोही क्षेत्रमा देखिएको छ । करिब ७ सय स्वास्थ्यकर्मीसमेत संक्रमणमा परेका छन् । ‘स्वीकार गर्नै नसकिने संख्यामा संक्रमण देखिएको र केही संक्रमणको स्रोत पत्ता नलागेका केसहरुसमेत देखिएकाले यो निर्णय लिन बाध्य हुनुपरेको हो,’ एन्ड्रुजले पत्रकार सम्मेलनमा भने ।

मेलबर्नमा एकाउन्टिङ व्यवसाय गर्दै आएका योगेन अधिकारीले सोमबारदेखि कार्यलय पूर्णतः बन्द हुने जनाए । उनी आफ्ना दर्जनौं ग्राहकको काम भए पनि लकडाउनका कारण कार्यालय जान नपाएपछि आफ्नो व्यवसाय प्रभावित हुने सुनाउँछन् । अधिकारीजस्तै सयौं नेपाली व्यवसायीको व्यवसाय बन्द मात्र हुने छैन कि उनीहरुले रातको ८ बजेदेखि बिहानको ५ बजेसम्म लगाइएको कर्फ्युका कारण सहजै बाहिर निस्कनसमेत पाउने छैनन् । ‘सरकारले जे गरिरहेको छ त्यो सबै सर्वसाधारणको सुरक्षाका लागि भएकाले समेत हामीले सरकारको निर्णयलाई पालना गरेर सहयोग गर्नु आवश्यक छ,’ उनीहरु भन्छन् ।

मेलबर्नका स्थानीय बासिन्दा प्रवासी नेपालीको संगठन एनआरएनए अस्ट्रेलियाका अध्यक्ष केशव कँडेल सरकारले यो निर्णयले यहाँ रहेका अनुमानित ५० हजार बढी नेपाली प्रत्यक्ष प्रभावित हुने सुनाउँछन् । ‘हामी सरकारले प्रदान गर्ने जबकिपर, जबसिकरलगायतका सुविधा पाउन सक्ने नागरिकलाई केही नहोला तर विद्यार्थीलाई यसले धेरै असर पार्ने पक्का छ ।’ उनले कान्तिपुरसँग भने । उनका अनुसार एनआरएनएले यसपहिले समस्यामा परेका विद्यार्थीलाई खानालगायतका केही सेवासुविधा दिइरहेको भए पनि पूर्ण लकडाउनका कारण यो सेवा प्रभावित हुने बताउँछन् । उनले प्रत्यक्ष उनीहरुको बसेको स्थानमा गएर खानालगायतका सेवा दिन नसके पनि खानाको अनलाईन भौचर भए पनि उपलब्ध गराउन पहल गरिरहेको सुनाउँछन् । ‘हामीले अस्ट्रेलियामा रहेका विभिन्न संघसंस्थाको पहलमा समस्यामा परेका विद्यार्थीलाई सहयोग पुरयाउन पहल गरिरहेका छौं ।’

भिक्टोरियामा अहिलेसम्म करिब ३ दर्जन नेपालीमा समेत कोरोना संक्रमण देखिएको छ । अध्यक्ष कँडेलले यो संख्या अझ धेरै हुन सक्ने बताउँछन् । ‘अहिले भिक्टोरियामा धेरै संक्रमण बढिरहेका कारण नेपालीमा समेत संक्रमणको संख्या धेरै हुन सक्छ तर हाम्रो सम्पर्कमा आएकामध्ये करिब ३ दर्जन नेपालीको स्वास्थ्य राम्रो छ र उनीहरु आइसोलेसनमा छन्,’ कँडेलले भने ।

प्रकाशित : श्रावण १८, २०७७ २१:४६
प्रतिक्रिया
पठाउनुहोस्

वीरगन्ज महानगरका वडाध्यक्षसहित थप ३८ जनामा कोरोना

भूषण यादव

वीरगन्ज — नारायणी अस्पतालको प्रयोगशालमा आइतबार साँझ गरिएको परीक्षणमा वीरगन्ज महानगरपालिकाका– १२ का वडाध्यक्ष रामदरस कुशवाहासहित थप ३८ जनामा कोरोना संक्रमण पुष्टि भएको छ । वडाध्यक्ष कुशवाहाले साउन १५ मा वीरगन्ज– ११ स्थित श्रीपुर स्कुलमा स्वाब दिएका थिए ।

‘केही दिन पहिले ज्वरो आएकोले स्वाब परीक्षणको लागि दिएको थिएँ,’ कान्तिपुरसँग वडाध्यक्ष कुशवाहाले भने, ‘आइतबार पीसीआर रिपोर्टमा कोरोना पोजिटिभ आएको जानकारी पाएको छु ।’

नारायणी अस्थायी कोरोना अस्पतलाका इन्चार्ज डा. निरज सिंहका अनुसार आइतबार साँझ गरिएको परीक्षणमा ४ जना महिलासहित २६ देखि ६४ वर्ष उमेर समूहका ३८ जनामा कोरोना संक्रमण पुष्टि भएको छ । संक्रमित ३ जना बाराका बासिन्दा हुन् ।

३८ जना संक्रमितमध्ये वडा ११ श्रीपुरका २७ जना रहेका छन् । शनिबारमात्र सोही वडामा १३ जनामा कोरोना संक्रमण पुष्टि भएको थियो ।

वडा ११ का अध्यक्ष प्रदम्‍न सेढाईंका अनुसार साउन १५ मा भएको भएको मास ट्रेसिङमा २ सय ५२ जनाको स्वाब संकलन भएको थियो जसमध्ये २५ जना कन्ट्याक्ट ट्रेसिङका थिए ।

पोजिटिभ आएका संक्रमित पनि आइसोलेसनमा जान नमानेको उनले बताए । ‘मुर्ली चोकका ६ जना संक्रमितको घरमा आइसोलेट भएर बस्ने अवस्था छैन,’ सेढाईंले भने, ‘जति सम्झाउँदा पनि कोरोना अस्पताल जान मानेका छैनन् ।’ आइतबार वीरगन्जको घडीअर्वापोखरी र विर्तामा पनि संक्रमित थपिएका छन् ।

पर्साको सखुवाप्रसौनी गाउँपालिका, वीरगन्जको आर्मी ब्यारेक र जिल्ला प्रहरी कार्यालयमा पनि कोरोना संक्रमित देखिएका छन् । साउनयता पर्सामा ३ सय ९० नयाँ संक्रमित थपिएका छन् ।

प्रकाशित : श्रावण १८, २०७७ २१:३३
पूरा पढ्नुहोस्
प्रतिक्रिया
पठाउनुहोस्
×