भारतीय गृहमन्त्री अमित साहलाई कोरोना संक्रमण
भारतको केन्द्र सरकारका गृहमन्त्री अमित साहलाई कोरोना संक्रमण भएको छ । भारतीय जनता पार्टीका पूर्व अध्यक्षसमेत रहेका मोदी सरकारका शक्तिशाली मन्त्री साहले ट्विटमार्फत् आफूलाई कोरोना देखिएको सार्वजनिक गरेका हुन् ।
कोरोनाका लक्षणहरु देखिन थालेपछि मन्त्री साहले परीक्षण गराएका थिए । परीक्षणका क्रममा पोजिटिभ देखिएपछि गृहमन्त्री साह अस्पताल भर्ना भएका छन् ।
साहले केही दिनको अवधिमा आफूसँग सम्पर्कमा आएका सबै व्यक्तिहरुलाई कोरोना परीक्षण गराउनसमेत आग्रह गरेका छन् ।
कोरोना के शुरूआती लक्षण दिखने पर मैंने टेस्ट करवाया और रिपोर्ट पॉजिटिव आई है। मेरी तबीयत ठीक है परन्तु डॉक्टर्स की सलाह पर अस्पताल में भर्ती हो रहा हूँ। मेरा अनुरोध है कि आप में से जो भी लोग गत कुछ दिनों में मेरे संपर्क में आयें हैं, कृपया स्वयं को आइसोलेट कर अपनी जाँच करवाएं।
— Amit Shah (@AmitShah) August 2, 2020
यसैबीच, योगी आदित्यनाथ नेतृत्वको उत्तर प्रदेश सरकारकी एक मन्त्रीको कोरोनाका कारण निधन भएको छ । प्राविधिक शिक्षा मन्त्री कमलारानी वरुणको कोरोनाका कारण आइतबार लखनउमा निधन भएको भारतीय सञ्चारमाध्यमहरुले जनाएका छन् ।
६२ वर्षीय वरुणको लखनाउस्थित सञ्जय गान्धी पोस्टग्रायजुएट इन्स्टिच्युट अफ मेडिकल साइन्समा उपचारका क्रममा निधन भएको उत्तर प्रदेश सरकारले जनाएको छ ।
कोरोना संक्रमणपछि अस्पताल भर्ना भएका बलिउड अभिनेता अमिताभ बच्चन उपचारपछि घर फर्किएका छन् । उनले अस्पतालमा रहँदा उपचार संलग्न सबैलाई धन्यवाद समेत ज्ञापन गरेका छन् ।
प्रकाशित : श्रावण १८, २०७७ १७:३०