सावधानी नअपनाए कोरोना महामारीले भयावह रुप लिन सक्छ : डब्लुएचओ
काठमाडौँ — विश्व स्वास्थ्य संगठनले कोभिड–१९ (कोरोना भाइरस) अझै भयानक हुन सक्ने चेतावनी दिएको छ । सोमबार संगठनले राष्ट्रहरुले कोरोना भाइरसका लागि सावधानी नअपनाए अवस्था भयावह हुने सक्ने बताएको हो ।
संगठनका महानिर्देशक डा टेड्रोस अधानोमले भने,‘म सिधा कुरा भन्छु, धेरै राष्ट्रहरु गलत दिशातिर गइरहेका छन्, यो भाइरस आम मानिसको शत्रु बनिरहेको छ ।’
‘कोरोना भाइरस रोकथामका लागि राष्ट्रहरुले उचित सावधानी नअपनाए संक्रमित अझै बढ्नेछन्’, उनले थपे ।
‘धेरै राष्ट्रहरुले कोराेना रोकथामका लागि प्रगति गरेका छन् तर विश्वभर हेर्दा खासमा यो बढिरहेको देखिन्छ’, उनले भने,‘हामी सबैलाई यो हराओस्जस्तो लागेको छ । हामी आफ्नो सामान्य जीवनमा फर्किन चाहन्छौँ तर दु:खको कुरा यो महामारी अहिले सकिँदैन ।’
रोकथामका लागि उनले टेस्ट, ट्रेस, आइसोलेसन र क्वारेन्टाइन बढाउनु पर्नेमा जोड दिए ।
विश्वभरकाे तथ्यांक हेर्दा काेराेना महामारीका कारण अमेरिका र ब्राजिल सबैभन्दा बढी प्रभावित देश बन्न पुगेका छन् ।
प्रकाशित : असार ३०, २०७७ १२:५१