अस्ट्रेलियाको भिक्टोरियाका ३६ गाउँमा पुन: लकडाउन

नारायण खड्का

अस्ट्रेलिया — कोरोना भाइरस संक्रमितको संख्या अचानक बढेपछि अस्ट्रेलियाको भिक्टोरिया राज्यका केही क्षेत्रलाई एक महिनाका लागि पुन: लकडाउन गरिएको छ । उक्त राज्यका प्रिमियर ड्यानिल एन्ड्रुजले ३६ गाउँका बासिन्दालाई बुधबारदेखि अत्यावश्यकबाहेक घरबाट निस्कन नपाउने नियम लागू गरेका छन् ।

भिक्टोरियाको सडकमा कोभिड–१९ टेस्ट गर्दै स्वास्थ्य अधिकारी । तस्बिर : एएपी 

६ राज्य तथा दुई टेरिटोरी रहेका अस्ट्रेलियामा कोरोना भाइरस संक्रमण करिब नियन्त्रणमा आइसकेको भए पनि केही दिनदेखि भिक्टोरियामा पुन: नयाँ संक्रमण देखिएको हो । उक्त राज्यमा विगत दुई दिनमै १ सय ५० भन्दा बढी नयाँ संक्रमित पाइएपछि नियन्त्रण स्वरुप ३६ गाउँमा पुन: लकडाउन घोषणा गरिएको प्रिमियर एन्ड्रुजले बताएका छन् ।

राज्यका अधिकारीले संक्रमण भित्रिएको स्थानलाई (हट स्पट) का रुपमा पहिचान गरेर नियन्त्रणको प्रयास गरिएको बताएका छन् । स्थानीय समाचार माध्यमका अनुसार प्रिमियर एन्ड्रुजले उक्त राज्यमा व्यवस्था गरिएको होटल क्‍वारेन्टाइनलाई लिएर न्यायिक छानबिनको समेत घोषणा गरेका छन् ।

राज्य सरकारले घोषणा गरेको लकडाउनमा स्थानीयले अत्यन्तै आवश्यकबाहेक अन्य कारणले घर छोड्न पाउने छैनन् । यसपहिले लागू गरिएको 'स्टेज तीन' अन्तर्गतकै लकडाउन स्थानीयले सामना गर्नुपर्नेछ । जसअन्तर्गत परिवारबाहेक दुई जनाभन्दा बढी भेला हुन नपाउने, क्याफे तथा रेस्टुरेन्ट टेकअवेमा सीमित हुनुपर्नेछ । लकडाउन घोषणा गरिएको क्षेत्रमा पालना भए/नभएको प्रहरीले जाँच गर्ने स्थानीय समाचारमा जनाइएको छ । एन्ड्रुजले मेलबर्नमा उत्रने अन्तर्रास्ट्रिय उडानलाई समेत अन्य राज्यमा अवतरण गर्न आग्रह गरेका छन् ।

अस्ट्रेलियाका अन्य राज्यले भने लकडाउनलाई खुला गर्दै लगेका छन् । दक्षिण अस्ट्रेलिया, क्युन्सल्यान्ड, न्यु साउथ वेल्स लगायतका राज्यले आन्तरिक हवाई सेवालाई समेत सुचारु गर्ने निर्णय गरिसकेका छन् । तर पनि अधिकांश राज्यले भने भिक्टोरियाको सीमाना तत्काललाई खोल्ने निर्णय गरेका छैनन् ।

संक्रमण बढेपछि केन्द्र सरकारले केही दिनअघि नै यसको नियन्त्रणका लागि १ हजार सैनिक भिक्टोरियामा परिचालन गरिसकेको छ भने मंगलबार पुन ८ सय कर्मचारी पठाएको छ । उनीहरुले टेस्टिङ, समुदायलाई संक्रमणबाट बच्नका लागि जानकारी दिने र संक्रमण धेरै देखिएको स्थानमा जनतालाई सुसूचित गर्ने जनाइएको छ ।

भिक्टोरियाका मुख्य स्वास्थ्य अधिकारी ब्रेट सटनले अवस्था अझ बिग्रन सक्ने सञ्चारमाध्यमलाई बताएका छन् । उनले युवाहरुमा संक्रमण देखिएको बताउँदै चिसो मौसम पनि यसको कारण हुनसक्ने जनाएका छन् । लकडाउन घोषणा गरिएका क्षेत्रहरु नेपालीको बाक्लो बसोबास भएको स्थानमा पर्दछ ।

मेलबर्नमा बस्दै आएका एनआरएन अस्ट्रेलियाका अध्यक्ष केशव कँडेलले उक्त क्षेत्रमा अधिकांश नेपाली बस्ने भए पनि अहिलेसम्म कुनैमा संक्रमण नपाइएको जानकारी दिए । उनले स्थानीयसँग नियमित सम्पर्कमा रहेको र आवश्यक्ताअनुसार सहयोग पुर्‍याइने बताए ।

न्यु साउथ वेल्स, दक्षिण अस्ट्रेलिया लगायतका केही राज्यमा सानो संख्यामा नयाँ संक्रमित देखिए पनि उनीहरु सबै विदेशबाट उद्धार गरेर क्‍वारेन्टाइनमा राखिएका नागरिक छन् ।

अस्ट्रेलियामा अहिलेसम्म ७ हजार ७३४ जनामा भाइरसको संक्रमण देखिएको छ भने ७ हजार ३७ संक्रमित निको भएर घर फर्किसकेको स्वास्थ्य मन्त्रलायले जनाएको छ । कोरोनाबाट अस्ट्रेलियामा १ सय ४ ले ज्यान गुमाइसकेका छन् ।


प्रकाशित : असार १६, २०७७ १६:०९
प्रतिक्रिया
पठाउनुहोस्

'महिला विश्‍वकप फुटबल-२०२३' अस्ट्रेलिया र न्युजिल्यान्डमा हुने

नारायण खड्का

काठमाडौँ — सन २०२३ मा हुने महिला विश्वकप फुटबल प्रतियोगिता अस्ट्रेलिया तथा न्युजिल्याण्डमा आयोजना गरिने भएको छ । स्विजरल्याण्डमा भएको मतदानमार्फत अस्ट्रेलिया र न्युजिल्यान्डलाई संयुक्त रुपमा प्रतियोगिता आयोजनाको अधिकार दिइएको हो ।

अस्ट्रेलिया तथा न्युजिल्याण्डले संयुक्त रुपमा उक्त प्रतियोगिता आयोजनाका लागि दाबी प्रस्तुत गरेका थिए । शुक्रबार बिहान भएको निर्वाचनमा दुई देशले अर्काे दाबेदार देश कोलम्बियालाई ९ मतले पछाडि पार्दै प्रतियोगिता आयोजनाको अधिकार पाउन सफल भएका हुन् । ३७ सदस्य रहेको फिफाले आयोजना गरेको मतदानमा झरेको ३५ मतमा अस्ट्रेलिया र न्युजिल्याण्डको पक्षमा २२ मत परेको सञ्चारमाध्यमले जनाएका छन् । त्यस्तै कोलम्बियाको पक्षमा १३ मत आएको थियो । सन २०२३ को जुलाई र अगस्टमा आयोजना गरिने प्रतियोगितामा विश्वभरिबाट ३२ टिमले सहभागिता जनाउँदैछन । यसअघि आयोजना गरिएको प्रतियोगितामा जम्मा २४ टिममात्र सहभागी भएकोमा यो संख्या बढाएर ३२ पुरयाइएको हो ।

अस्ट्रेलियाली प्रधानमन्त्री स्कट मरिसन र न्युजिल्याण्डका प्रधानमन्त्री जसिन्था आर्डनले संयुक्त विज्ञप्ति जारी गर्दै प्रतियोगिता आयोजनाका लागि आफूहरुलाई चयन गरेकोमा धन्यवाद दिएका छन् । उनीहरुले यो निर्णय यस क्षेत्रको महिला फुटबलका लागि उत्कृष्ट भएको दाबी गरेका छन् । यो निर्णयले कोरोना भाइरसका कारण असरमा परेको खेलक्षेत्रमा परेको असरलाई पुन:स्थापित गर्न सहयोग पुग्ने बताएका छन् । अस्ट्रेलियाका सरकारी अधिकारीहरुले महिला विश्वकपले स्थानीय अर्थतन्त्रलाई सहयोग पुग्ने जनाएका छन् ।

प्रतियोगिता आयोजना गर्न पाउने अधिकार पाउनेबित्तिकै यहाँस्थित चर्चित ओपेरा हाउस र न्युजिल्याडको स्काई टावरमा आफ्नो टिमको फोटोसहित खुसीयाली मनाइएको थियो । फिफाले नतिजा सुनाएसँगै प्रत्यक्ष प्रसारण हेरिरहेका अस्ट्रेलियाली फुटबलका अधिकारी तथा महिला खेलाडीले एकापसमा खुसीयाली बाँडेका थिए । ‘हामी यसमा सफल भएका छौं ’ अस्ट्रेलियाली फुटबल टिम (मटिल्डा) की क्याप्टेन साम केरले भनिन् । अस्ट्रेलिया तथा न्युजिल्याण्डका १ दर्जन बढी सहरमा विश्वकप प्रतियोगिता आयोजना गरिनेछ । विश्वकप आयोजना गर्ने देश बनेपछि अस्ट्रेलिया तथा न्युजिल्याण्डले छनोट प्रतियोगिता खेल्नुपर्ने छैन ।

गत वर्ष फ्रान्समा आयोजना गरिएको महिला विश्वकप फुटबलको उपाधि अमेरिकाले जितेको थियो भने नेदरल्याण्ड्स उपविजेता बनेको थियो । फिफा काउन्सिल अध्यक्ष जियानी इन्फान्टिनोले प्रतियोगितामा सहभागी हुने टिमको संख्या वृद्धि हुनु सकारात्मक भएको बताउँदै यसले महिला फुटबलको विकासमा सकारात्मक सन्देश दिने बताएका छन् ।

प्रकाशित : असार १२, २०७७ १२:०५
पूरा पढ्नुहोस्
प्रतिक्रिया
पठाउनुहोस्
×