इरानद्वारा अमेरिकी राष्ट्रपति ट्रम्पविरुद्ध पक्राउ पुर्जी जारी

रेड नोटिस जारी गर्न इन्टरपोलसँग आग्रह
एजेन्सी

तेहरान — इरानले अमेरिकी राष्ट्रपति डोनाल्ड ट्रम्पविरुद्ध पक्राउ पुर्जी जारी गरेको छ । इरानले अमेरिकी राष्ट्रपति ट्रम्प र दर्जनौँ अमेरिकी अधिकारीविरुद्ध जर्नेल कासिम सुलेमानीको हत्यामा संलग्न भएको भन्दै पक्राउ पुर्जी जारी गरेको हो ।

साथै इरानले अमेरिकी राष्ट्रपति ट्रम्पलगायतको पक्राउमा सहयोग गर्न इन्टरपोलसँग आग्रह गरेको अन्तर्राष्ट्रिय सञ्चारमाध्यमले जनाएका छन् ।

तेहरानका अभियोक्ता अली अलाकसिमेरका अनुसार सोमबार अमेरिकी राष्ट्रपति ट्रम्पसहित अन्य ३० जनाविरुद्ध गत जनवरी ३ मा भएको आक्रमणमा जर्नेल कासिम सुलेमानीको हत्याका साथै हत्या र आतंकवादी गतिविधि गरेको अभियोग लगाइएको छ । अलीले ट्रम्पबाहेक कस–कसलाई आरोप लगाइएको हो भन्नेबारेमा केही खुलाएका छैनन् । उनले ट्रम्पको राष्ट्रपतीय कार्यकाल सकिएपछि पनि कानुनी कारबाहीका लागि इरान लड्ने बताए ।

इरानका लागि अमेरिकी दूत ब्रायन हूकले भने इरानी कदमलाई ‘प्रचारबाजी फन्डा’ को संज्ञा दिएका छन् । ‘इन्टरपोलले राजनीतिक प्रकृतिका विषयमा हस्तक्षेप गर्दैन र रेड नोटिस जारी गर्दैन भन्ने हाम्रो ठम्याइ छ,’ अमेरिकी दूत हूकले साउदी अरबमा भएको पत्रकार सम्मेलनमा भने । ‘यो विषय राजनीतिक प्रकृतिको रहेको छ । राष्ट्रिय सुरक्षा, अन्तर्राष्ट्रिय शान्ति र स्थायित्वको प्रवर्द्धनमा यसको कुनै सम्बन्ध छैन । यो केबल प्रचारबाजी र फन्डा मात्रै हो । यसलाई कसैले पनि गम्भीरताका साथ लिँदैनन्,’ हूकले भने ।

तेहरानका अभियोक्ता अलीले भने अमेरिकी राष्ट्रपति ट्रम्प र अन्यविरुद्ध रेड नोटिस जारी गर्न इन्टरपोलसँग आग्रह गरेको दाबी गरेका छन् ।

फ्रान्सको लियोनमा रहेको इन्टरपोलले भने इरानको आग्रहलाई विचार नगर्ने बताएको बीबीसीले उल्लेख गरेको छ । इन्टरपोलले आफूलाई राजनीतिक, सैन्य, धार्मिक र नश्लीय प्रकृतिको चरित्रका गतिविधिमाथि कारबाही गर्ने अधिकार नभएको बताउँदै इरानको आग्रहमाथि केही नगर्ने बताएको छ ।

राजनीतिक विश्लेषकहरुले इरानले पक्राउ पुर्जी जारी गर्नु एउटा सांकेतिक प्रतिक्रियाभन्दा केही बढी मात्रै भएको बताएका छन् । तर यसले अमेरिकी राष्ट्रपति ट्रम्पप्रति इरानको वैरभाव निकै बढेको देखिने उनीहरुले बताएका छन् ।

प्रकाशित : असार १५, २०७७ २२:१२
प्रतिक्रिया
पठाउनुहोस्

पाकिस्तानको कराँचीस्थित स्टक एक्सचेन्जमा आक्रमण, कम्तीमा ७ जनाको मृत्यु

एजेन्सी

कराँची — पाकिस्तानको कराँचीस्थित स्टक एक्स्चेन्जको भवनमा बन्दुकधारीले सोमबार आक्रमण गरेका छन् । आक्रमणमा कम्तीमा सात जनाको मृत्यु भएको पाकिस्तानी सञ्चार माध्यमले जनाएका छन् ।

मृत्यु हुनेमा दुई सुरक्षागार्ड, एक प्रहरी र चार जना आक्रमणकारी छन् । घटनामा सात जना घाइते भएको जनाइएको छ । स्थानीय सञ्चारमाध्यमका अनुसार आक्रमणकारीहरू कार्यालयको मूलढोकामा ग्रिनेड विस्फोट गराएपछि भवनमा प्रवेश गरेका थिए ।

प्रहरीका अनुसार विद्रोहीले आक्रमण गरेलगत्तै सुरक्षाकर्मीले प्रतिकार गरी चार जनालाई मारिदिएका हुन् । घाइते हुनेमा तीन जना प्रहरी छन् । उनीहरूको स्थानीय अस्पतालमा उपचार भइरहेको जनाइएको छ ।

आक्रमणको सुरुमा स्वचालित राइफल बोकेका लडाकुहरूले ग्रिनेड प्रहार गरेका थिए । त्यसपछि उनीहरूले उक्त भवनबाहिर अवस्थित सुरक्षाकर्मीको चौकीमा गोली हाने । आक्रमणकारीहरू एउटा कारमा आएका कराँची प्रहरी प्रमुखले समाचार संस्था रोएटर्सलाई बताए ।

‘एउटा खैरो रङको कारमा आएका आक्रमणकारीहरूलाई कार्यालयको गेटमा प्रहरीले रोकेका थिए । त्यसलगत्तै उनीहरूले अन्धाधुन्ध गोली प्रहार गर्न सुरु गरेपछि केहीबेर दोहोरो भिडन्त भएको हो,’ सिन्ध प्रान्तका प्रहरी अतिरिक्त महानिरीक्षक नाबी मेननले भने । प्रहरीको जवाफी कारबाहीका कारण आक्रमणकारीहरू कार्यालयको मुख्य भवनभित्र पस्न नपाएको उनको दाबी छ ।

स्टक एक्सचेन्जका निर्देशक अबिद अलि हबिबले बन्दुकधारीहरू कारबाट बाहिर निस्कनेबित्तिकै वरपर देखेका सबैलाई लक्षित गरी गोली प्रहार गरेको जनाए । उनका अनुसार आक्रमणकारीबाट ठूलो परिमाणमा विस्फोटक पदार्थ तथा हतियार बरामद भएको छ ।

आक्रमणपछि कार्यालय परिसरमा रहेका अधिकांश मानिसहरू भागेका थिए । कार्यालयभित्र पसेर ज्यान जोगाएका केहीलाई पछि उद्धार गरिएको जियो न्युजले जनाएको छ ।

‘हामीहरू कोठाभित्र पसेर ढोका बन्द गरेर बस्यौं,’ एक प्रत्यक्षदर्शी असाद जाभेदले समाचार संस्था रोयटर्ससँग भने । अत्यन्त्रै कडा सुरक्षा रहेको स्टक एक्सचेन्ज परिसरमा सयौं वित्तीय संस्थाहरू रहेका छन् । ती कार्यालयहरूमा करिब ८ हजार जनाले काम गर्दै आएका थिए । तर कोरोना भाइरसका कारण कतिपयलाई घरबाटै काम गर्न भनिएकाले आक्रमणको समयमा भने कर्मचारीको संख्या कम रहेको थियो ।

घटनाको बलोच लिबरेसन आर्मीले जिम्मेवारी लिएको छ । बलोचिस्तान प्रान्तका विभिन्न स्रोतहरूको हिस्सा आफूले पाउनुपर्ने बलोच विद्रोहीहरूको माग रहेको थियो तर पछिल्ला दिनमा उनीहरूको पृथकतावादी विद्रोह गर्दै आएका छन् । त्यसका साथै उनीहरूले बलोचिस्तान प्रान्तमा चिनियाँ लगानीको कडा विरोध भएको जनाएका छन् । पछिल्ला दिनहरूका हिंसात्मक आक्रमणहरू गर्न थालेपछि बलोच समूहलाई पाकिस्तान, बेलायत र अमेरिकाले आतंककारी घोषित गरिसकेका छन् ।


प्रकाशित : असार १५, २०७७ २०:३८
पूरा पढ्नुहोस्
प्रतिक्रिया
पठाउनुहोस्
×