हिमालतिर उक्लँदै गाई

ग्रीष्म ऋतुमा आफ्ना हिमाली चरनहरूतिरको यात्रा गर्नु स्विट्जरल्यान्डका गाईहरूको परम्परागत चलन हो । पहाडी चरनहरूमा गाईलाई पुर्‍याउन यस वर्ष पनि उत्तर–पूर्वी स्विट्जरल्यान्डको अप्पेन्जलमा गाईहरूको लस्कर लगाइएको छ ।

हिमाली क्षेत्रको प्रसिद्ध आरोहणमा विगतका वर्षहरूमा पर्यटक र गाईहरूको लाम लाग्ने गथ्र्यो । तर भाइरसको संक्रमणका कारण पर्यटक लक्षित प्रचारप्रसार नगरिएकाले यसपालि भने गाईको लाम लागेको छ ।

हिमाली हावा, खनिज र पौष्टिक तत्त्वले भरिएका घाँस खाएका, चिसो पानी पिएका गाईहरूको दूध बढी पौष्टिक हुन्छ । त्यसका साथै चर्को घाममा हिमाली क्षेत्रको शीतल हावा र चिसो पानीले गाई पनि स्वस्थ र पुष्ट हुन्छन् । हिमालमा चरेका गाईको दूधबाट बनेका परिकार बढी पौष्टिक हुनाले नै स्विट्जरल्यान्डमा वर्षौं वर्षदेखि गाईहरूलाई हिमाली क्षेत्रका चरनमा लैजाने गरिएको हो ।

मे महिनाको सुरुदेखि जुन महिनाको मध्यसम्म स्विस कृषकहरू आफ्ना फार्मबाट हजारौं गाईलाई हिमाली क्षेत्रका उकाल्छन् । यी गाई २ सय मिटरबाट बिस्तारै उकालो चढ्दै २ हजार मिटरसम्म पुग्छन् । शरद ऋतुको सुरुमा भने ती गाई फेरि ओरालो लाग्छन् ।

मानिसलाई जस्तै गाईहरूलाई पनि हिमाल चढ्नभन्दा ओर्लिन कठिन हुन्छ । त्यसैले हिमाल चढाउने बेलामा भन्दा ओराल्दा स्विसहरूले उत्सवका रूपमा मनाउँछन् । कान, सिङ र टाउकामा फुलैफूलका माला र गुच्छाहरू पहिराइदिने गर्छन् ।

तिनको शरीर अनेक रङ र झल्लरले सिँगारिदिन्छन् । गाईले पुष्पको मुकुट लगाएका हुन्छन् । डोरी बाँधेका किसान परम्परागत पोसाक लगाएर गाई धपाइरहेका हुन्छन् । गाईका घाँटीमा बाँधिएका ठूला घण्टा टुर्लुङ टुर्लुङ बज्दा गाउँमा रोमाञ्चकता थपिन्छ ।

यस वर्ष भाइरस नियन्त्रणका लागि फेडरल अफिस अफ पब्लिक हेल्थ (एफओपीएच) ले जारी गरेका नियमहरूको पालना गर्नुपर्ने भएकाले हिमालबाट तल झर्दै गर्दा पनि पर्यटक र दर्शकहरूको भीड लाग्ने छैन । भाइरसका कारण ५ जनाभन्दा बढीको समूहमा गाई फार्म वा हिमाली चरनमा भेट्न निषेध गरिएको छ ।