भारतमा आँधीले दुई जनाको मृत्यु

आँधीले पुनेका करिब एक सय घरमा क्षति पुगेको छ । कतिपय घर भत्किएका छन् भने केहीमा आंशिक क्षति पुगेको बताइएको छ । मुम्बई र आसपासका क्षेत्रमा आँधी आउने अनुमानपछि कैयौं गाउँहरू खाली गराइएको थियो । त्यसका साथै बढी प्रभाव पार्ने अनुमान गरिएका गुजरातका ४७ वटा गाउँ पनि खाली गराइएको थियो । त्यहाँका हजारौं स्थानीयलाई सुरक्षाकर्मीको सहयोगमा अन्यत्रै सारिएको थियो ।

भारतको मौसम विभागले एक सय २० किलोमिटर प्रतिघण्टाको गतिमा आँधी आउने अनुमान गरेको थियो । तर अनुमान गरिएको भन्दा केही कमजोर आँधी आएका कारण बढी क्षति हुन नपाएको बताइएको छ ।

त्यसका साथै उच्च सतर्कता र सावधानीका कारण ठूलो क्षति नभएको मौसमविद्हरूले बताएका छन् । महाराष्ट्रको तटीय क्षेत्रमा उच्च सतर्कता अपनाइनुका साथै कतिपय क्षेत्रमा सडक तथा रेल यातायात बन्द गरिएको थियो ।