उत्तरी भारतमा प्रचण्ड गर्मी

राजस्थान राज्यको चुरुमको तापक्रम ५० डिग्री सेल्सियस पुगेको छ । अधिकारीहरूका अनुसार यो भारतकै सबैभन्दा बढी हो । हिन्दुस्तान टाइम्सका अनुसार राजस्थान र मध्यप्रदेश राज्यका पश्चिमी क्षेत्र, हरियाणा र उत्तर प्रदेशका दक्षिणी भेगमा पनि तापक्रम कम्तीमा ४७ डिग्री पुगेको छ ।

यस वर्ष मापन भएको तापक्रम विगतका वर्षहरूको तुलनामा कम्तीमा ५/६ डिग्री सेल्सियस बढी हो । सरकारी मौसमविद्हरूका अनुसार भारतमा गत साता आएको चक्रवात अम्फानका कारण अहिले गर्मी बढेको हो ।

बंगालको खाडीमा उत्पन्न अम्फान समुद्री आँधीले पूर्वी भारत र बंगलादेशमा निकै ठूलो धनजनको क्षति पुर्‍याएको थियो । आँधीका कारण भारतमा ७२ र बंगलादेशमा १२ जनाको ज्यान गएको थियो ।

‘शक्तिशाली आँधी अम्फानले देशका अन्य स्थानबाट पूरै आद्रता सोसेर लग्यो । त्यसको असर अहिले देखिएको हो,’ भारतको क्षेत्रीय मौसम पूर्वानुमान केन्द्र प्रमुख कुलदीप श्रीवास्तवले भने । उनका अनुसार अर्को सातादेखि मौसममा केही सुधार देखिनेछ ।

अधिकारीहरूले प्रचण्ड गर्मीबाट जोगिन सर्वसाधारणलाई घरभित्रै बस्न आग्रह गरेका छन् । भारतमा दशकौंपछि मे महिनाको अन्तिम साता तापक्रम निकै उच्च भएको हो । मौसमको विवरण राख्ने वेबसाइट एल डोराडोले विश्वभरि नै मंगलबार निकै गर्मी भएको जनाएको छ ।

केही वर्षयता गर्मीका कारण भारतमा थुप्रै मानिसले ज्यान गुमाएका छन् । तर अहिलेको गर्मीका कारण कति मानिस प्रभावित भए भन्ने तथ्यांक भने उपलब्ध भइसकेको छैन । सन् २०१७ मा सार्वजनिक सरकारी तथ्यांकअनुसार भारतमा सन् १९९२ देखि २०१६ बीचमा २५ हजार ७ सय १६ जनाले गर्मीका कारण ज्यान गुमाएका थिए ।

कोभिड–१९ को महामारी नियन्त्रण रोक्न गरिएको देशव्यापी लकडाउन केही खुकुलो भएका कारण विभिन्न राज्यबाट लाखौं मानिसहरू घर फर्किरहेका छन् । तीमध्ये प्रवासी मजदुरहरू पैदल फर्किरहेका छन् । अत्यधिक गर्मीका कारण उनीहरू पनि प्रभावित भएका जनाइएको छ । कोभिड–१९ का कारण भारतमा बुधबार साँझसम्म ४ हजार ३ सय ३७ जनाले ज्यान गुमाइसकेका छन् ।

स्वास्थ्य तथा परिवार कल्याण मन्त्रालयका अनुसार १ लाख ५१ हजार ७ सय ६७ जनामा भाइरसको संक्रमण पुष्टि भइसकेको छ । तीमध्ये ६४ हजार ४ सय २६ निको भइसकेका जनाइएको छ ।