हङकङमा सुरक्षा कानुनको विरोधमा प्रदर्शन- विश्व - कान्तिपुर समाचार
कान्तिपुर वेबसाईट
AdvertisementAdvertisement

हङकङमा सुरक्षा कानुनको विरोधमा प्रदर्शन

प्रहरीद्वारा अश्रुग्यास प्रहार, १२० प्रदर्शनकारी पक्राउ
एजेन्सी

हङकङ — चीनद्वारा प्रस्तावित सुरक्षा कानुनको विरोधमा हङकङमा आइतबार विरोध प्रदर्शन गरिएको छ । मास्क लगाएर विरोधमा उत्रेका प्रदर्शनकारीमाथि प्रहरीले अश्रुग्यास प्रहार गरेको बीबीसीले जनाएको छ । कोरोना भाइरस (कोभिड–१९) को प्रकोपका कारण भेला हुन प्रतिबन्ध लगाइएको भए प्रदर्शनकारी पनि मास्क लगाएर सडकमा ओर्लिएका थिए ।

सहरका मुख्य भागमा गरिएको प्रदर्शनमा हजारौं सहभागी भएका थिए । प्रहरीले एक सय २० जनालाई पक्राउ गरेको जनाएको छ । चीनले प्रस्ताव गरेको कानुनमा ‘देशद्रोह, राज्यद्रोह, विद्रोह र राज्य विध्वंस’ माथि प्रतिबन्ध लगाइने उल्लेख छ । लोकतन्त्र पक्षधरहरूले नयाँ कानुनले स्वतन्त्रता गुम्ने र हङकङको अस्तित्व नै खतरामा पर्ने भन्दै विरोध जनाएका हुन् । कार्यकारी प्रमुख क्यारी लामले प्रस्तावित कानुनको समर्थन गर्दै हङकङमा स्वतन्त्रता परिवर्तन नहुने दाबी गरेकी छन् ।

चीनले हङकङका लागि ल्याउन लागेको सुरक्षा कानुनको भत्र्सना गर्दै विश्वभरका करिब २ सय वरिष्ठ राजनीतिज्ञहरूले संयुक्त वक्तव्य जारी गरेका छन् । हङकङस्थित चिनियाँ विदेश मन्त्रालयको शाखाले विदेशी लगानी प्रभावित पार्ने भन्ने त्रास अस्वीकार गर्दै पश्चिमा देशले चलखेल सुरु गरेको भन्दै आलोचना गरेको छ ।

एसिया, अस्ट्रेलिया, युरोप र उत्तर अमेरिकाका राजनीतिज्ञहरूले चीनले हङकङको स्वायत्तता, विधिको शासन र आधारभूत स्वतन्त्रतामाथि योजनाबद्ध रूपमा आक्रमण गरेको जनाएका छन् । अभियानकर्ताहरूको आह्वानअनुसार आइतबार लोकतन्त्र पक्षधरहरूले विरोध प्रदर्शन गरेका जनाइएको छ ।

विभिन्न २३ देशका १ सय ८६ जना राजनीतिज्ञले हस्ताक्षर गरेको विज्ञप्ति हङकङका पूर्वगभर्नर क्रिस्टोफर पाटेन र ब्रिटिस पूर्वविदेश सचिव माल्कोम रिफकिन्डले तयार पारेका हुन् । विज्ञप्तिमा ४४ जना बेलायती सांसद र १७ जना अमेरिकी कंग्रेसका सदस्यले हस्ताक्षर गरेका छन् ।

बेइजिङले हङकङमा गुप्तचर कार्यालय खोल्ने योजना चीन र बेलायतबीच भएको संयुक्त घोषणाविपरीत रहेको विज्ञप्तिमा जनाइएको छ । सन् १९९७ मा हङकङ स्वतन्त्र भएका बेला दुई देशबीच सहमति भएको थियो । चीनले अन्तर्राष्ट्रिय समुदायमाझ आफ्ना प्रतिबद्धता कायम राख्न नसके अन्य कुरामा पनि उसलाई विश्वास गर्न नसकिने विज्ञप्तिमा जनाइएको छ ।

केही दिनअघि अमेरिकी विदेशमन्त्री माइक पोम्पियोले चीनको कदमप्रति आपत्ति जनाउँदै त्यसले हङकङको स्वतन्त्रतामाथि प्रहार गर्ने जनाएका थिए । त्यसैगरी, बेलायत, अस्ट्रेलिया र क्यानडाले पनि चिनियाँ कदमप्रति विरोध जनाएका छन् ।

पछिल्लो समय हङकङमा चीन विरोधी प्रदर्शनहरू तीव्र हुँदै गएका छन् । लोकतन्त्र र कानुनी शासनको माग गर्दै गतवर्षदेखि सुरु भएको आन्दोलन कोभिड–१९ को महामारीका कारण रोकिएको थियो ।

उक्त प्रदर्शन हङकङबाट चिनियाँ मुख्य भूमिमा सुपुर्दगी गर्न सकिने कानुनको विरोधमा भएको थियो । चीन सरकारले भविष्यमा हुन सक्ने त्यस्ता विरोध प्रदर्शन रोक्न र दण्ड दिन नयाँ कानुन आवश्यक रहेको बताउने गरेको छ ।

हङकङमा गत सेप्टेम्बरमा भएको स्थानीय चुनावमा लोकतन्त्र पक्षधर नेताहरूले अभूतपूर्व सफलता हासिल गरेका थिए । जसका कारण बेइजिङ सेप्टेम्बर महिनामा हुने हङकङको चुनावी नतिजाप्रति सशंकित भएको अनुमान गरिएको छ । त्यस्तो सफलता फेरि दोहोरियो भने नयाँ कानुन ल्याउन कठिन हुने चीनको बुझाइ छ ।

उक्त कानुनमाथि चिनियाँ कम्युनिस्ट पार्टीको वार्षिक अधिवेशनको अन्त्यतिर २८ मेमा मतदान हुने ठानिएको छ । त्यसपछि पार्टीको स्थायी कमिटीले पारित गर्ने र जुन महिनाको अन्त्यदेखि कार्यान्वयनमा आउने ठानिएको छ ।

प्रकाशित : जेष्ठ १२, २०७७ ०८:३२
प्रतिक्रिया
पठाउनुहोस्

पेरिसका स्वास्थ्यकर्मीमा मानसिक समस्या

आफूलाई कोरोना भाइरस सर्न सक्ने चिन्ता, परिवार र प्रियजनको चिन्ता र व्यक्तिगत सुरक्षा उपकरणको अभावक प्रमुख कारण
ददि सापकोटा

पेरिस — कोरोना भाइरस (कोभिड–१९) को उपचारमा संलग्न पेरिस अस्पतालका अधिकांश नर्स, चिकित्सक र अन्य स्वास्थ्यकर्मीहरू मानसिक रोगको सिकार भएका छन् ।

कोभिड–१९ को महामारीका बेला अन्य समयमा भन्दा बढी तनाव र चिन्ता भएका कारण उनीहरूमा मानसिक स्वास्थ्य अवस्था खराब देखिएको नर्सिङ टाइम्सको गरेको सर्वेक्षणले देखाएको हो । स्वास्थ्यकर्मीहरूलाई प्रदान गरिएको सेवा सुविधा र उनीहरूको अवस्थाबारे सोधिएका प्रश्नमा ३३ प्रतिशतले आफ्नो स्वास्थ्य र मानसिक अवस्था धेरै नराम्रो रहेको जनाएका छन् ।

अध्ययनमा संलग्नमध्ये ८७ प्रतिशतले पहिलेको तुलनामा कोभिड–१९ का बिरामीको उपचारका क्रममा निकै तनाव थपिएको र आफूहरू विचलित भएका बताएका छन् । ५० प्रतिशतले भने कोरोना प्रकोपका कारण आफूहरू चिन्तित बनेको उल्लेख गरेका छन् । उक्त सर्वेक्षण पेरिस क्षेत्रका ३ हजार ५ सय नर्स तथा स्वास्थ्यकर्मीमा गरिएको हो ।

सर्वेक्षणमा सहभागीमध्ये अधिकांशले स्वास्थ्य र सामाजिक क्षेत्रमा क्रियाशील कर्मचारीलाई दिइएको सेवा सुविधा र प्रोत्साहन अपर्याप्त भएको गुनासोसमेत गरेका छन् । सर्वेक्षणमा संलग्न केहीले आफूहरूलाई सहयोग आवश्यक भएको बेलासमेत बेवास्ता भएको जनाएका छन् ।

आफूलाई भाइरस सर्न सक्ने चिन्ता, परिवार र प्रियजनहरूको अवस्था तथा व्यक्तिगत सुरक्षा उपकरणको अभावका कारण मानसिक समस्या देखिन थालेको उत्तरदाताहरूको भनाइ छ । सहभागीमध्ये ९७ प्रतिशतमा भाइरस सर्न सक्ने तनाव वा चिन्ता देखिएको छ । त्यस्तै ५३ प्रतिशतले पीपीई अभावका कारण तनाव र चिन्ता थपिएको बताए ।

‘मृत्यु हेरिरहन, सहन गाह्रो महसुस भयो । किनभने हामीले कोरोना भाइरस फैलिनुअघि मृत्युका घटना अति न्यून देख्थ्यौं । त्यसले पनि हामीलाई मानसिक चिन्ता थप्यो,’ सर्वेक्षणमा सहभागी एक नर्सले भनिन् ।

सामाजिक दूरीका कारण मृत्युको मुखमा पुगेका बिरामीमाझ आफूहरूमात्र हुने, आराम गर्न नपाई काम गर्नुपर्ने, तनावले भोक हराउने, खानाको उचित प्रबन्ध नहुने, परिवारबाट टाढा रहनुपर्ने, बिरामीको चापले गर्दा समयको अभाव र अन्य कर्मचारीको दबाबका कारण उच्च तनाव र चिन्ता बढेको उनीहरूले बताएका छन् ।

कतिपय चिकित्सक र नर्सले आफूमा तनाव बढी भएको बताउँदा काममा बाधा पुग्ने देखिने भएकाले अन्यलाई समस्या सुनाउन नसकेको उल्लेख गरेका छन् । कतिपयले भने फ्रान्सका अस्पतालहरूमा अझै पनि पीपीई अभाव रहेको जनाएका छन् ।

सर्वेक्षणमा सहभागी ५४ प्रतिशतले हाल उपलब्ध सुविधा निकै कम भएको जवाफ दिएका छन् । २० प्रतिशतले सेवासुविधा ठीकै रहेको र ११ प्रतिशतले राम्रो रहेको जवाफ दिएका नर्सिङ टाइम्सले जनाएको छ ।

प्रकाशित : जेष्ठ १२, २०७७ ०८:२७
पूरा पढ्नुहोस्
प्रतिक्रिया
पठाउनुहोस्
×