भारतमा घरेलु उडान खुला- विश्व - कान्तिपुर समाचार
कान्तिपुर वेबसाईट
AdvertisementAdvertisement

भारतमा घरेलु उडान खुला

सुरेशराज न्यौपाने

नयाँदिल्ली — कोरोना संक्रमण तीव्र रूपमा फैलिरहे पनि भारतमा करिब दुई महिनायता बन्द रहेको आन्तरिक हवाई सेवा सोमबारदेखि नियमित गरिएको छ । तर, पश्चिम बंगाल र आन्ध्र प्रदेश राज्यले केही दिनपछि मात्र उडान खुला गर्ने भएका छन् ।


भारतमा कोरोना महामारी नियन्त्रण र रोकथामका लागि भन्दै २५ मार्चदेखि आन्तरिक र अन्तर्राष्ट्रिय उडान बन्द गरिएका थिए । संक्रमण फैलने क्रम जारी रहे पनि लामो समय उडान बन्द गर्दा अर्थतन्त्रमा धक्का पुग्ने भएपछि खोल्ने निर्णय गरिएको हो ।

हाललाई केही सीमित उडान मात्र सञ्चालन हुने भएका छन् । जस्तै, महाराष्ट्र सरकारले मुम्बईबाट दैनिक ५० उडान र हैदरावादले दैनिक ३० उडान मात्र गर्ने भएको छ । उडानका लागि भारतको गृह मन्त्रालयद्वारा जारी गरिएको दिग्दर्शनअनुसार यात्रुहरूले दुई घण्टाअगावै एअरपोर्ट पुग्नुपर्नेछ भने काउन्टर चेकइन नगरी अनलाइनबाट हुनेछ । उडानमा खाना/नास्ता र पत्रपत्रिका दिइने छैन । सामाजिक दूरी र यात्राका क्रममा मास्क अनिवार्य गरिएको छ । उडान गर्नुअघि र ओर्लेपछि थर्मल स्क्रिनिङ हुनेछ । साथै यात्रुलाई घरमै १४ दिन क्वरेन्टाइनमा बस्न भनिएको छ ।

गृह मन्त्रालयले राज्य तथा केन्द्रशासित सरकारलाई आफूअनुकूल मापदण्ड बनाउन पनि छुट दिएको छ । त्यहीअनुसार कतिपय राज्य तथा केन्द्रशासित सरकारले कोरोना संक्रमणको जोखिम गर्न भन्दै यात्रुका लागि विभिन्न मापदण्ड बनाएका छन् । ११ वटा राज्य तथा केन्द्रशासित प्रदेश सरकारले हवाई यात्रुका लागि क्वारेन्टाइन अनिवार्य गरेका छन् ।

त्यसै गरी अन्तर्राष्ट्रिय उडानका लागि पनि तयारी सुरु गरिएको छ । सरकारले आधिकारिक घोषणा नगरे पनि भारतीय सञ्चारमाध्यमले १ अगस्टदेखि अन्तर्राष्ट्रिय उडान नियमित हुने उल्लेख गरेका छन् । त्यसका लागि आवश्यक मापदण्ड पनि जारी गरिएका छ जसअनुसार यात्रुहरुले अनिवार्य १४ दिन क्वारेन्टाइन बस्नै पर्नेछ । सात दिन सरकारले तोकेको कुनै क्वारेन्टाइन सेन्टर र बाँकी सात दिन घरमै क्वारेन्टाइनमा बस्नुपर्ने व्यवस्था गरिएको छ । क्वारेन्टाइन सेन्टरमा बसेको खर्च यात्रु आफैंले बेहोर्नुपर्नेछ । तर, गर्भवती, गम्भीर बिरामी, परिवारमा कसैको निधन भएको अवस्थामा र दस वर्षभन्दा मुनिका छोराछोरीका बुबाआमाका लागि घरमै क्वारेन्टाइनमा बस्ने सुविधा दिइएको छ ।

भारतमा सोमबार बिहानसम्म १ लाख ३८ हजारभन्दा बढी व्यक्ति संक्रमित भइसकेका छन् भने ४ हजारभन्दा बढीले ज्यान गुमाएका छन् ।

प्रकाशित : जेष्ठ १२, २०७७ ०८:२६
प्रतिक्रिया
पठाउनुहोस्

ईपीएलमा फर्कन चाहन्छन् पोचेटिनो 

एएफपी

लन्डन — माउरिसियो पोचेटिनोले आफ्नो प्राथमिकता इंग्लिस प्रिमियर लिग (ईपीएल) मा फर्कनु नै रहेको बताएका छन् । टोटेनहमले बर्खास्तको ६ महिनायता उनको यो इच्छा बाहिर आएको हो । उनले साढे ५ वर्ष टोटेनहममा बिताए र त्यसक्रममा कुनै पनि उपाधि जित्न सकेन । तर यी ४८ वर्षीय प्रशिक्षकले टोटेनहमको भाग्य भने फेरे र टिमले गत वर्ष युरोपेली च्याम्पियन्स लिगको फाइनल यात्रा तय गरेको थियो ।

त्यसको एक वर्षभन्दा कम समयमा उनी बर्खास्तगीमा परेका थिए । अर्जेन्टिनी प्रशिक्षकले ६ महिना बिनाकाम बिताइसकेका छन् र अब नयाँ क्लबसँग आबद्ध हुन तयार भएको संकेत दिएका छन् । साउदी अरेबियाको लगानी हुन सक्ने न्युकासलको व्यवस्थापक पदका लागि उनलाई बलियो प्रत्याशी मानिएको छ । म्यानचेस्टर युनाइटेडमा पनि उनको सम्भावना रहेको बताइएको छ । पोचेटिनोले भनेका छन्, ‘६ महिनाको अन्तरमा म पूर्णतः ताजा महसुस गरिरहेको छु ।’

उनले थपेका छन्, ‘पछिल्लो सात वर्षयता हामी निकै व्यस्त रह्यौं, विश्रामको मौका नै पाएनौं । त्यसैले मैले आफ्ना सहयोगीलाई यो समयमा के गरेका थियौं, त्यसको विवेचना गर्न भनेको छु ।’

त्यो समयको एकवर्ष पोचेटिनो

साउथह्याम्पटनमा थिए । अहिले उनी लन्डनमा बस्छन् र आफूलाई इंग्ल्यान्ड तथा ईपीएल दुवैको माया रहेको पनि बताएका छन् । टोटेनहमबाट तलब थाप्न छाडेको कारणले पनि उनलाई अन्य ईपीएल क्लबमा जान सहज छ । उनको भनाइ छ, ‘म अझै पनि भन्छु, ईपीएल विश्वकै सबैभन्दा उत्कृष्ट लिग हो । हामी यस लिगमा खुबै रमाउने गर्छौं । तर मेरोसामु अन्य देश जाने मौका छ ।’ कोरोना भाइरस संक्रमणको महामारीका कारण आफूले यस्तै गर्ने हो भनेर दाबी गर्न सक्ने अवस्था भने नभएको मान्छन् । उनी कम्तीमा के मान्छन् भने अहिलेको आधुनिक फुटबलमा सबैले कडा मिहिनेत गर्नुपर्छ । त्यतिमात्र होइन, उत्कृष्ट नतिजा निकाल्न पनि उत्तिकै गाह्रो छ ।

मोउरिन्होप्रति खुसी

पोचेटिनोले आफू गएयता टोटेनहमको जिम्मेवारी जोसे मोउरिन्होले पाएकामा पनि खुसी व्यक्त गरेका छन् । मोउरिन्होले नोभेम्बरयता क्लब सम्हालिरहेका छन् । ‘मेरो स्थानमा मोउरिन्हो आएकोमा म खुसी छु । म अब औपचारिक ढंगले क्लबबाट छुटिएको छु । अहिले टोटेनहममा उपलब्धि सुविधा विश्वस्तरीय छ । अब टोटेनहमको जिम्मा मोउरिन्होले पाएका छन् र उनी पनि जुन स्थितिमा क्लब रहेको छ, त्यसमा पक्कै पनि खुसी होलान्,’ उनले भनेका छन् ।

उनले थपेका छन्, ‘मेरो र मोउरिन्होबीच राम्रो चिनजानी छ । म इस्पनयोलमा प्रशिक्षक रहेका बेला उनी रियल म्याड्रिडमा थिए । त्यही बेला हामीबीच राम्रो सम्बन्ध कायम भएको हो । उनी उच्चस्तरीय प्रशिक्षक हुन् । इस्पानयोलमा रहेका बेला मेरो सपना थियो, उनको स्थानमा रियलको टिम हेर्ने । अहिले समय फेरिएको छ, अब मेरो स्थानमा उनले टोटेनहममा प्रशिक्षकको काम गरिरहेका छन् । यो वास्तवमै मेरा लागि पनि अविश्वसनीय छ ।’

प्रकाशित : जेष्ठ १२, २०७७ ०८:१९
पूरा पढ्नुहोस्
प्रतिक्रिया
पठाउनुहोस्
×