कोरोना संक्रमणमा भारतले चीनलाई उछिन्यो

सुरेशराज न्यौपाने

नयाँदिल्ली — भारतले कोरोना भाइरसको संक्रमणमा चीनलाई उछिनेको छ । शनिबार बिहानसम्ममा भारतमा संक्रमितको संख्या  ८५ हजार ९ सयभन्दा बढी पुगेको छ ।

कोरोना भाइरसको उद्‍गमस्थथल मानिएको चीनमा अहिलेसम्म ८४ हजार ३८ जनामा कोरोना संक्रमण पुष्टि भएको छ । चीनमा कोरोना स‌ंक्रमणबाट हालसम्म ४ हजार ६ सय ३७ जनाको मृत्यु भएको छ । केही हप्तायता चीनमा संक्रमित थपिने क्रम नगण्य छ भने संक्रमणबाट कसैको मृत्यु भएको छैन ।

भारतमा पहिलो कोरोना भाइरसको संक्रमण चीनमा पहिलो संक्रमण पुष्टि भएको करिब अढाई महिनापछि मात्र ३० जनवरीमा देखिएको थियो । विश्व स्वास्थ्य संगठनका अनुसार चीनमा कोरोना भाइरसको पुष्टि ८ डिसेम्बर, २०१९ मा भएको थियो । भारतमा विगत केही दिनयतासंक्रमणको दरमा उच्च वृद्धि देखिएको छ ।

पछिल्लो चौबीस घन्टामा मात्रै चार हजारभन्दा बढीमा संक्रमण देखिएको छ । भारतमा सबैभन्दा बढी संक्रमण महाराष्ट्रमा देखिएको छ । महाराष्ट्रमा संक्रमितको संख्या २९ हजार १ सय नाघेको छ । त्यहाँ मात्र १ हजार ६८ जनाले कोरोना भाइरसको संक्रमणबाट ज्यान गुमाइसकेका छन् । त्यसपछि उच्च संक्रमण देखिनेमा क्रमशः गुजरात, दिल्ली र मध्यप्रदेश राज्यहरु छन् । भारतमा हालसम्म २ हजार ७ सय ५२ जनाले ज्यान गुमाएका छन् ।

कोरोना संक्रमणको नियन्त्रणमा सबैतिरबाट प्रशंसा पाइरहेको केरलामा समेत विगत तीन दिनमा ५२ जना नयाँ बिरामी थपिएका छन् । नयाँ बिरामीमध्ये २२ जना विदेशबाट फर्किएकाहरु भएको बताइएको छ ।

त्यसैगरी गएको एक महिनामा एउटा पनि नयाँ संक्रमित नथपिएको गोवामा पछिल्लो दुई दिनमै आठ जनामा कोरोना भाइरसको संक्रमण पुष्टि भएको छ । त्यस्तै अवस्था हिमाचल र असमलगायतका राज्यको पनि छ ।

कोरोना भाइरसको संक्रमणलाई केही हदसम्म नियन्त्रणमा राख्न सफल भएका यी राज्यहरुमा समेत विगत केही दिनयता संक्रमणमा एकाएक वृद्धि देखिएपछि भारतमा संक्रमणको दोस्रो चरण सुरु भएको हो कि भन्ने आशंका पनि गर्न थालिएको छ । लकडाउनका खुकुलो भएसँगै रेललगायतका सार्वजनिक यातायातका कारण पनि संक्रमण फैलिएको अनुमान गरिएको छ । सँगै विदेशमा अलपत्र परेका भारतीयहरुलाई विशेष अभियानमार्फत् स्वदेश ल्याउने क्रम पनि जारी छ । ओडिशा, बिहार, केरलामा विगत केही दिनयता संक्रमितको संख्यामा भएको उच्च वृद्धिले पनि केही हदसम्म त्यो पुष्टि गर्छ ।

प्रकाशित : जेष्ठ ३, २०७७ १४:५८
प्रतिक्रिया
पठाउनुहोस्
ADVERTISEMENT
ADVERTISEMENT

भारतमा मझौला उद्योगलाई सुविधैसुविधा

बिनाधितो ऋणदेखि सार्वजनिक खरिदमा विशेष सहुलियत
सुरेशराज न्यौपाने

नयाँदिल्ली — भारतले कोरोना (कोभिड–१९) का कारण समस्यामा परेका साना तथा मझौला उद्योग (एसएमई) लाई लक्ष्य गर्दै विभिन्न वित्तीय सहुलियत तथा सुविधा दिने भएको छ । भारतकी वित्तमन्त्री निर्मला सीतारमणले एसएमईलाई लक्ष्य गरी बिनाधितो ऋणको सहुलियतदेखि सार्वजनिक खरिदमा विशेष सुविधासहित आधा दर्जन सहुलियत र सुविधा घोषणा गरेकी हुन् ।


सहुलियत मंगलबार भारतीय प्रधानमन्त्री नरेन्द्र मोदीले गरेको विशेष आर्थिक प्याकेजअन्तर्गतको हो । मोदीले कोरोना महामारीका कारण संकटमा परेको अर्थतन्त्रलाई उकास्न २ सय खर्बको विशेष आर्थिक प्याकेज घोषणा गरेका थिए । उनले सम्बोधनमा कोरोना महामारीको संकटका बीच भारतलाई आत्मनिर्भर बनाउने लक्ष्यका साथ करोडौं नागरिकलाई राहत पुग्ने गरी आर्थिक प्याकेज ल्याइएको दाबी गरेका थिए । मोदीका अनुसार प्याकेज भारतको कुल गार्हस्थ्य उत्पादनको १० प्रतिशत बराबर हो । साथै उनले सरकारले स्वदेशी उद्योगलाई प्रवद्र्धन गर्दै भारतलाई आत्मनिर्भर बनाउनेमा आफ्नो प्राथमिकता रहेको घोषणासमेत गरेका थिए ।

अर्थमन्त्री सीतारमणले बुधबार सार्वजनिक गरेको वित्तीय राहतका योजना मोदीको त्यही घोषणाबाट प्रेरित देखिन्छ । सीतारमणले बुधबार एसएमईलक्षित आधा दर्जन योजना घोषणा गरेकी छन् । जसअन्तर्गत यी उद्योगलाई बिनाधितो ऋणका लागि ३० खर्ब भारु छुट्याइएको छ । यसबाट २५ लाख व्यवसाय लाभान्वित हुने दाबी गरिएको छ । ऋण भुक्तानीका लागि पनि विशेष सुविधा दिइएको छ । यसअनुसार चार वर्षभित्र ऋण भुक्तानी गरे हुन्छ भने पहिलो एक वर्ष साँवा भुक्तानी गर्नुपर्दैन । त्यसैगरी २ लाख एसएमईलाई लक्ष्य गर्दै २० हजार करोड भारुको विशेष कोष गठन गरिएको छ । यसबाट दबाबमा रहेका र खराब ऋणीमा सूचीकृत उद्योगले नगद प्रवाहमा राहत पाउनेछन् । राम्रो व्यवसाय गरिरहेको र सम्भावना भएका तर कोभिड–१९ का कारण समस्यामा परेका उद्योगलाई व्यवसाय विस्तारमा सघाउन १० हजार करोड भारुको अर्को बेग्लै कोष पनि घोषणा गरिएको छ । एसएमईले पाउने सुविधा पाउनेहरूको दायरा विस्तार गर्न लगानी र कारोबारको आकारका आधारमा त्यसको परिभाषालाई पनि परिमार्जन गरिएको छ ।

वित्तमन्त्री सीतारमणले स्वदेशी उद्योगको प्रवद्र्धन गर्ने लक्ष्यसहित एउटा विशेष नीति पनि सार्वजनिक गरेकी छन् । अबदेखि २ अर्ब भारुभन्दा कमको सार्वजनिक खरिदमा ग्लोबल टेन्डर नहुने भएको छ । यसबाट सीमित पुँजी भएका स्वदेशी उद्योगले विदेशी ठूला उद्योगसँग प्रतिस्पर्धा गर्नुपर्ने अवस्थाबाट राहत पाउने मन्त्री सीतारमणको दाबी छ । उनले एक सय जनाभन्दा कम कर्मचारी र मासिक १५ हजार भारु तलब लिने ९० प्रतिशत कर्मचारी भएका संस्थाका कर्मचारीको सञ्चयकोषमा कामदार र रोजगारदाताका तर्फबाट जम्मा हुने रकम थप तीन महिनाका लागि सरकारले नै तिरिदिनेसमेत बताएकी छन् । यसअघि यस्तो सुविधा मे महिनासम्मका लागि मात्र घोषणा गरिएको थियो । यसबाट ३.६ लाख संस्थाभन्दा बढी संस्था लाभान्वित हुनेछन् ।

गैरबैंकिङ वित्तीय संस्थाका तर्फबाट हुने लगानी विस्तार सहज बनाउन ३० हजार करोड भारु छुट्याइएको सीतामरणले उल्लेख गरिन् । त्यसैगरी केही समययता विद्युत् वितरण कम्पनीहरूले नगद प्रवाहमा व्यापक समस्या बेहोरिरहेकाले उनीहरूलाई १९ हजार करोड भारुको अनुदानसमेत दिने घोषणा गरिएको छ ।

कोभिड–१९ का कारण निर्माण क्षेत्र पनि त्यत्तिकै प्रभावित छ । निर्माणाधीन परियोजना रोकिएका छन् । यो पृष्ठभूमिमा ठेकेदार कम्पनीलाई परियोजना सम्पन्न गर्न छ महिना बढाउनेसमेत घोषणा गरिएको छ । करदाताहरूका लागि पनि सहुलियत दिइएको छ । यसअन्तर्गत टीडीएस वा टीसीएसमा २५ प्रतिशत छुट दिइएको छ । आयकर तिर्नेदेखि लेखापरीक्षण प्रतिवेदन बुझाउने समयसीमा पनि बढाइएको छ ।

प्रकाशित : जेष्ठ १, २०७७ ०८:२२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×