निको भइन् ११३ वर्षीया- विश्व - कान्तिपुर समाचार

निको भइन् ११३ वर्षीया

(एएफपी)

मड्रिड — स्पेनकै सबैभन्दा वृद्ध ठानिएकी वृद्धा कोरोना भाइरस (कोभिड–१९) को संक्रमणबाट निको भएकी छन् । स्पेनी अधिकारीले ११३ वर्षीया ब्रानयास पूर्णरूपमा निको भएकी बताएका छन् ।

ब्रानयासलाई गत मार्चमा संक्रमण पुष्टि भएको थियो । त्यसलगत्तै उनलाई आइसोलेसनमा राखिएको थियो । चिकित्सकहरुका अनुसार उनलाई कोभिड–१९ का मध्यम खालका लक्षणहरु देखिएका थिए ।

‘उहाँ अब स्वस्थ हुनुहुन्छ । उहाँ सुन्दर देखिनुभएको छ । उहाँले आफ्नो अनुभवन बताउन चाहनुहुन्छ,’ उनकी छोरीले सामाजिक सञ्जाल ट्वीटरमा लेखेकी छन् । ब्रानयासले सन् १९१८–१९ को स्पेनिस फ्लु, १९३६–३७ को स्पेनी गृहयुद्ध र सन् २०२० को कोभिड–१९ बाट बाँच्न सफल भएकी छन् ।

केयर होमकी प्रवक्ताले ब्रानयास बाँच्न सफल भएकी र अहिले स्वास्थ्य अवस्था निकै राम्रो रहेको बताएका छन् । ‘ब्रानयासको गतसाता स्वास्थ्य परीक्षण गरिएको थियो र उहाँको नतिजा नेगेटिभ देखियो,’ प्रवक्ताको भनाइ छ ।

ब्रानयासलाई केही साता उनकै कोठामा आइसोलेसनमा राखिएको थियो । उनको रेखदेख गर्न एक जना कर्मचारीलाई व्यक्तिगत सुरक्षा सामग्री लगाएर खटाइएको थियो ।

एक स्पेनी टेलिभिजनले शताब्दी वृद्धाको समाचार कथा प्रसारण गरेको छ । टेलिभिजन फुटेजमा ब्रानयासले आफूलाई केयर होमका कर्मचारीले निकै माया गरेको बताएकी छन् ।

मेक्सिकोमा सन् १९०७ मार्च ४ मा जन्मिएकी ब्रानयासलाई उनका पिताले २ वर्षपछि अमेरिकाको सानफ्रान्सिस्को लगेका थिए । उनी आफ्ना पत्रकार पितासहित पहिलो विश्वयुद्धताका स्पेनको क्याटालान क्षेत्रमा पुगेकी हुन् । त्यसताका उनी डुंगा चढेर स्पेन फर्केकी थिइन् ।

तीन सन्तानकी आमा ब्रानयासका पहिलो सन्तान हालै ८६ वर्षका पुगेका छन् । ब्रानयास दुई दशकदेखि क्याटालोनिया क्षेत्रको ओलट सहरस्थित केयर होममा बस्दै आएकी थिइन् ।

केयर होमका एक कर्मचारीले यति दीर्घजीवनको रहस्य के होला भनेर सोधेको प्रश्नको जवाफमा उनले भनिन्, ‘त्यो त थाहा छैन । तर म स्वस्थ रहन पाएकामा आफूलाई निकै भाग्यमानी सम्झन्छु ।’ प्रवक्ताका अनुसार केयर होममा भाइरसका कारण कैयौंले ज्यान गुमाइसकेका छन् ।

स्पेनमा कोभिड–१९ का कारण २७ हजारभन्दा बढीको ज्यान गइसकेको छ । स्पेनी स्वास्थ्य मन्त्रालयका अनुसार संक्रमितको संख्या २ लाख २८ हजार नाघिसकेको छ ।

प्रकाशित : वैशाख ३१, २०७७ २२:४४
प्रतिक्रिया
पठाउनुहोस्

आईपीएल नभए ठूलो घाटा

(एएफपी)

मुम्बई — इन्डियन प्रिमियर लिग (आईपीएल) को यो सिजन रद्द भएमा भारतीय क्रिकेटले ठूलो रकम गुमाउने त्यहाँको बोर्ड बीसीसीआईले मंगलबार भनेको छ । विश्वकै सबैभन्दा ठूलो ट्वान्टी ट्वान्टी क्रिकेट लिग सुरुआतको १२ वर्षयता पहिलोपल्ट स्थगित हुने स्थितिमा छ ।

पूर्वनिर्धारित कार्यक्रमअनुसार प्रतियोगिता मार्च २८ बाट सुरु हुनु पर्ने हो, बीसीसीआईले दोहोर्‍याएर यसलाई पछाडि सारेको निर्णय गरिसकेको छ । प्रतियोगिता नभएमा कम्तीमा ५३ करोड डलर गुमाउने बीसीसीआईका कोषाध्यक्ष अरुण धुमलले भनेका छन् ।

भारतसँग अन्य सबै क्रिकेट खेल्ने देश आईपीएल र समग्रमा यो खेल फेरि कहिलेदेखि सुरु हुने हो भनेर प्रतीक्षा गरिरहेका छन् । तर यसक्रममा प्रत्येक देशको सरकारी निर्णय र यसले तयार पार्ने नियम पछ्याउनु पर्नेछ ।

धुमलले एएफपीलाई भनेका छन्, ‘यसपल्टको आईपीएल कहिले सुरु हुनेछ, त्यो हामी पनि भन्न सक्ने स्थितिमा छैनौं र प्रतियोगिना नभए ठूलो घाटा हुने निश्चित छ ।’

प्रकाशित : वैशाख ३०, २०७७ १५:३७
पूरा पढ्नुहोस्
प्रतिक्रिया
पठाउनुहोस्
×