फ्रान्समा डिसेम्बरको अन्तिममै कोरोना भाईरस फेला परेको अस्पतालको दाबी

ददि सापकोटा

फ्रान्स — फ्रान्स सरकारको अहिलेसम्मका दाबीलाई चुनौती दिँदै पेरिसको एक अस्पतालले डिसेम्बरको अन्तिममै फ्रान्समा कोरोना भाइरस भेटिएको दाबी गरेको छ । पेरिसको सेन्ट सँदेनी क्षेत्रको बोन्डिस्थित जँ भेर्दिए अस्पतालका प्रमुख प्राध्यापक ईभ कोहेनले उक्त कुरा सार्वजनिक गरेका हुन् ।

कोहेनका अनुसार अस्पतालको हाइजिन प्रमुख प्राध्यापक जँ राल्फ जाहारले डिसेम्बर र जनवरीमा केही बिरामीहरुको परीक्षण गरेका थिए । परीक्षण गरिका १४ जनामध्ये निमोनिया र दमका बिरामी पनि थिए । तिनको परीक्षण गर्दा एकजनामा कोरोना भाइरसको लक्षण देखिएको थियो । ती बिरामीलाई २७ देखि २९ डिसेम्बरसम्म अस्पतालमा राखिएको प्रध्यापक कोहोनले उल्लेख गरेका छन् ।

चिकित्सकहरुका अनुसार ती बिरामी डिस्चार्ज भएर हिँडिसकेको र पछि प्राप्त रिपोर्टमा कोरोना संक्रमण देखिएपछि फेरि अस्पताल बोलाइएको हो । उनका बालबालिकामा समेत भाइरस संक्रमण भएको थियो । सुपरमार्केटको माछा बिक्री स्टलमा काम गर्ने उनकी पत्नीमा भने संक्रमण भएको थिएन । अस्पतालले चीनबाट ल्याइएका माछाबाट उनमा स‌ंक्रमण भएको हुनसक्ने आशंका व्यक्त गरेको छ ।

'हामीलाई के अचम्म लागेको छ भने ती संक्रमित बिरामी कतै घुम्न गएका थिएनन् । घरमा बसिरहेको ब्यक्तिलाई कसरी कोरोना लाग्यो भनेर हामीलाई आश्चर्य लागेको छ,' कोहेनलाई उद्रित गर्दै फ्रान्स २४ टिभीले जनाएको छ । कोहेनले भने बिरामीको पत्नीसँगै कुनै चिनियाँ मूलका नागरिकले काम गरेको हुनसक्ने र चिनियाँ नागरिकबाट सरेको हुनसक्ने आशंका गरेका छन् । 'तर, ठोस प्रमाण नभएको हुँदा लाक्षणिक संकेतकै आधारमा किटान गर्न सकिएन,' उनले भनेका छन् । हाल ती संक्रमित व्यक्ति पूर्णरुपमा निको भइसकेका र उनको परिवारका सबै सदस्य स्वस्थ रहेको समाचारमा उल्लेख छ ।

यसअघि फ्रान्समा कोरोना संक्रमण जनवरीको अन्त्यमा मात्रै फेला परेको फ्रान्सेली अधिकारीहरुले बताउँदै आएका थिए ।

प्रकाशित : वैशाख २३, २०७७ २०:०१
प्रतिक्रिया
पठाउनुहोस्

फ्रान्सको दुग्ध व्यवसाय धराशायी

दूध, क्रिम, नौली, घ्यू, आइसक्रिम र चिजको उत्पादन बढेसँगै व्यवस्थापनमा झन् समस्या
ददि सापकोटा

पेरिस — कोरोना भाइरस (कोभिड–१९) को संकटसँगै फ्रान्सको दुग्ध व्यवसाय धराशायी भएको छ । कृषकहरूको दबाब धान्न नसकेर कृषिमन्त्री डिडिय गियोमले युरोपेली युनियनसँगको सहयोगको याचनासमेत गरिसकेका छन् ।

उत्पादनका आधारमा फ्रान्स दुग्धजन्य पदार्थमा युरोपकै जर्मनीपछि दोस्रो हो । बढी उत्पादन हुने यो मौसममा माग भने लगभग शून्य छ । जसका कारण कृषकहरू निकै मारमा परेका छन् । दूध, क्रिम, नौली, घ्यू, आइसक्रिम र चिजको व्यवस्थापन कसरी बन्ने भन्ने उनीहरूमा चिन्ता छ ।

कृषि मन्त्रालयका अनुसार फ्रान्समा ३ हजार ५ सय दुग्ध पदार्थसम्बन्धी उद्योग छन् । फ्रान्सका १ हजार ५ सय कम्पनीमा १ हजार ६ सय प्रकारका चिज बन्छन् । फ्रान्सको चिज विश्व बजारमा निकै लोकप्रिय छ । यहाँको चिजका मुख्य ग्राहक पर्यटक हुन् । तर भाइरसको संक्रमणसँगै पर्यटन व्यवसाय पनि बन्द भएपछि चिजको व्यवस्थापन हुन सकेको छैन ।

त्यसैगरी, जर्मनी अर्को मुख्य बजार हो । फ्रान्सको सबैभन्दा बढी नौनी इटालीले किन्ने गरेको थियो । त्यस्तै फ्रान्सले उत्पादितमध्ये ६७ प्रतिशत दुग्धजन्य पदार्थ युरोपेली मुलुकभित्रै निकासी गर्छ । चर्चा कम नभए पनि फ्रान्सले दुग्धजन्य उत्पादनले ठूला बोइङ र जेट विमानहरूको हाराहारीमै आम्दानी गर्छ ।

रेन क्षेत्रको कन्स्टेन्ट ह्यामेल डेरी प्रोडक्टका पास्कल जोइसको कृषि फार्मले हरेक महिना ३५ हजारदेखि ४० हजार लिटर दूध उत्पादन गर्छ । तर बजारमा पठाउने कुनै अवस्था छैन । सबै दूध आफंैले उपयोग गर्ने क्षमता पनि छैन । ‘यही साता मात्रै ३ हजार लिटरभन्दा बढी दूध रोकियो । अब के गर्ने सोचिरहेको छु,’ उनले टेलिफोनमा भने ।

जोइसका अनुसार एउटा गाईले एकै दिन ८० देखि सय लिटर त पानी नै पिउँछ । ७० किलो घाँस र दाना चाहिन्छ । उनीजस्ता सयौं किसानले हजारौं गाई पालेका छन् । दाना दिन, भकारो सोहोर्न मान्छे चाहिने नै भयो । वसन्त ऋतु सुरु हुन लागेकाले अहिले त झन् गाईहरूलाई चरनमा लैजानुपर्छ । ‘गाई पाल्ने खर्च उस्तै छ । तर दूध, चिज, नौनीको बिक्री स्वाट्टै घट्यो । सरकारले अनुदान दिएन भने त धेरै किसानको बिजोग हुने स्थिति छ,’ जोइसको गुनासो छ ।

त्यस्तै, संकलन केन्द्रमा दूध पुर्‍याउने गाडी पनि विभिन्न समस्याका कारण अनियमित छन् । जसका कारण यस्तो बेला कृषकहरूले दूध फाल्नुपर्ने अवस्था आउँछ । ‘जनस्वास्थ्य संकटकाल घोषणा गरिएको छ । समस्या देखाएर आउन सकिएन भन्ने खबर आयो भने केही गर्न सकिन्नँ । दूध मिल्काउने हो,’ जोइसको भनाइ छ । त्यसका साथै उत्पादन घटाउने र त्यसको सदुपयोग कसरी गर्ने भन्ने उपाय पनि कृषकले गरिरहेका छन् ।

कृषिमन्त्री गियोमले कृषकहरूलाई दुग्धजन्य पदार्थको उत्पादन घटाउन र भण्डारण गर्न सकिने सामग्री बनाउन आह्वान गरेका छन् । कृषकहरूले पनि चिज, मखन, दूध पाउडरको उत्पादन बढाएका छन् । त्यस्तै, कतिपयले वृद्धाश्रम, अनाथालय र स्वास्थ्यकर्मीलाई बाँडिरहेका पनि छन् ।

प्रकाशित : वैशाख २०, २०७७ ०७:४८
पूरा पढ्नुहोस्
प्रतिक्रिया
पठाउनुहोस्
×