फ्रान्सका मेयरहरू लकडाउन खुकुलो पार्ने सरकारी निर्णयको विरोधमा- विश्व - कान्तिपुर समाचार
कान्तिपुर वेबसाईट
AdvertisementAdvertisement

फ्रान्सका मेयरहरू लकडाउन खुकुलो पार्ने सरकारी निर्णयको विरोधमा

निर्णय फिर्ता लिन माग गर्दै राष्ट्रपतिलाई पठाए खुला पत्र
ददि सापकोटा

पेरिस — फ्रान्सका मेयरहरू मे ११ देखि लकडाउन खुकुलो पार्ने सरकारी निर्णयको विरोधमा उत्रिएका छन् । पेरिसको प्रान्तीय क्षेत्र इल द फँसका तीन सयभन्दा बढी मेयरले सरकारी निर्णय बदर गरी लकडाउन अझ लम्ब्याउन माग गरेका छन् ।

उनीहरूले आफ्नो एसोसिएसनका तर्फबाट राष्ट्रपति एमानुयल माख्रोंलाई पठाएको खुलापत्रमा स्कुल पुनः खोल्ने निर्णय अस्थिर र अवास्तविक रहेको उल्लेख गरेको फ्रेन्च १ टिभीले जनाएको छ ।

मेयरहरूले स्वास्थ्यको दृष्टिले इल द फँस उच्च जोखिमपूर्ण क्षेत्रमा वर्गीकृत गरिएकाले त्यहाँका स्कुल खोल्ने निर्णय स्थगित गर्नुपर्ने बताएका छन् ।

राष्ट्रपतिलाई पठाइएको पत्रमा पेरिसकी महानगरकी आन हिडाल्गोसहित ३ सय १५ मेयर छन् । पत्रमा लकडाउनलाई मार्च महिनामै बाध्यात्मक तरिकाले लागू गरिएको, स्थानीयलाई लकडाउन खुला पार्न तयार बनाउनका लागि आफूहरूलाई कुनै जानकारी नगराइएको समेत मेयरहरूले गुनासो गरेका छन् ।

लकडाउन खुलेपछिको परिस्थितिमा शिक्षक व्यवस्थापन, पाठ्यक्रमबाहिरका गतिविधिका लागि ‘एनिमेटर’ निर्क्योल र कति अभिभावकले आफ्ना बालबालिका स्कुल पठाउन चाहन्छन् भन्ने स्पष्ट नभई स्कुल खोल्न नहुने मेयरहरूको तर्क छ ।

खोल्नै पर्ने भए स्कुलको पुनःसंरचनामा ध्यान दिएर सबैभन्दा पहिले विपन्न विद्यार्थीका लागि खुला गर्नुपर्ने खाँचो उनीहरूले औंल्याएका छन् ।

हरेक विद्यार्थी र तिनका परिवारको अवस्था बुझी कुन तहको स्कुल खोल्ने, कुन तहको नखोल्ने स्पष्ट गरेर स्कुल पठाउनै पर्नेहरूका लागि मात्रै खोल्न सकिने उनीहरूको सुझाव छ ।

लकडाउन खोल्नेबारे पटकपटक निर्णय हेरफेर गर्दै आएको सरकारलाई मेयरहरूको पत्रले थप अप्ठेरोमा पार्न सक्ने फ्रान्सेली सञ्चारमाध्यमले उल्लेख गरेका छन् ।

प्रकाशित : वैशाख २२, २०७७ ०७:४३
प्रतिक्रिया
पठाउनुहोस्

फ्रान्समा अझै एक महिना लकडाउन

फ्रान्स मे ११ सम्म लकडाउन
ददि सापकोटा

पेरिस — फ्रान्सका राष्ट्रपति इम्मानुएल म्याक्रोंले राष्ट्रका नाममा सम्बोधन गर्दै लकडाउनको समय ११ मे (वैशाख २९) सम्म बढाएका छन् । कोरोना भाइरसविरुद्ध मुलुकले लडिरहेको जनस्वास्थ्य युद्धमाथि विजय हासिल गर्न लकडाउन लम्ब्याउनु जरुरी भएको उनले बताए ।

म्याक्रोंले कोरोना संक्रमित पत्ता लगाउन आम नागरिकको स्वास्थ्य परीक्षण गराउने र मे ११ सम्म अनिवार्य रूपमा मास्क लगाउनु अनिवार्य भएको पनि घोषणा गरेका छन् ।

मे ११ पछि भने लकडाउन खुकुलो पारिने राष्ट्रपति म्याक्रोंले बताएका छन् । लकडाउन खुकुलो पार्ने पहिलो चरणमा चरणमा उद्योग, कलकारखाना, सामाजिक संस्था, प्राथमिक पाठशाला, नर्सरी, माध्यामिक विद्यालय र प्लस टूसम्मका कलेज खोलिने छन् । स्कुल र कलेज खुल्नाले बालबालिका स्कुल जाने र तिनका अभिभावक काममा जान पाउने हुँदा बिस्तारै रोजगार संरक्षण र अर्थतन्त्र धान्न सहयोग पुग्ने उनको भनाइ छ ।

विश्वभरिका मानिसहरूले कोरोना भाइरसविरुद्ध युद्ध लडिरहेकाले फ्रान्सेलीहरूले पनि राष्ट्रको सबै सामर्थ्य लगाएर यसमाथि विजय हासिल गर्नुपर्ने उनले बताए ।

राष्ट्रपति म्याक्रोंले फ्रान्समा थप १० हजार भेन्टिलेटरको व्यवस्था पनि जानकारी दिएका छन् ।

कोरोना भाइरसको प्रकोपले हाल ८० लाख नगरिक बेरोजगार बनेकोले उनीहरूलाई सरकारले भत्ता दिने र बन्द भएका उद्योग, कलकारखानालाई आर्थिक सहयोग गर्ने पनि राष्ट्रपतिले घोषणा गरेका छन् । खाद्य र कृषिमा संकट आउन नदिन युद्धकालझैं उत्पादन बढाउने पनि उनले बताए ।

'हामीले हाम्रा प्रयासहरूलाई आदर गर्नै पर्छ । जति तिनको पालना गर्यौं उतै धेरैको जीवन बचाउन सकिन्छ । त्यसैले लकडाउनको अवधि मे ११ सम्म बढाउनु जरुरी छ र यो समयमा लकडाउनलाई कडाइकासाथ सबैले पालना गर्नुपर्छ,' म्याक्रोंले भने ।

कोरोना भाइरस के हो भन्ने स्पष्ट भइनसकेको र विश्वभर यो रहस्यपूर्ण नै रहेकाले पनि विशेषज्ञहरूको सुझावलाई आदर गरेर क्वारेन्टाइनमा बस्नु र रोग निरोधक क्षमता बढाउनु नै स्वास्थ्य सुरक्षाको उपाय भएको उनले उल्लेख गरे । कोरोना भाइरसको प्रकोप सबै मुलुकलाई परेको बताउँदै म्याक्रोंले कमजोर मुलुकहरूलाई सहयोग गर्नुपर्ने धारणा राखेका थिए ।

यसैबीच देशको अर्थतन्त्र र बेरोजगारीलाई धान्न नाफामा गएका ठूला उद्योग तथा कलकारखाना निश्चित अवधिका लागि सरकारीकरण गर्न राष्ट्रपतिका आर्थिक सल्लाहकारहरूले सुझाव दिएको 'टीएफ वान' टिभीले जनाएको छ ।

फ्रान्समा मंगलबारसम्म १ लाख ३७ हजार ८ सय ७७ जना कोरोना भाइरसबाट संक्रमित भएकोमा १४ हजार ९ सय ८६ जनाको मृत्यु भइसकेको छ भने २८ हजार १ जना निको भएका छन् ।

प्रकाशित : वैशाख २, २०७७ ०७:४८
पूरा पढ्नुहोस्
प्रतिक्रिया
पठाउनुहोस्
×