पेरिसमा पानीका पाइपमा पनि भेटियो कोरोना भाइरसको 'निसान'

ददि सापकोटा

पेरिस — फ्रान्सको राजधानी पेरिसको पाइपलाइनहरुमा कोरोना भाइरसको 'निसान' भेटिएको छ । सडक सफा गर्ने, भवन निर्माणमा प्रयोग गरिने, फूलबारी, बगैंचामा सिंचाइ गर्ने र आगजनी हुँदा प्रयोग गर्ने पानीमा कोरोना भाइरसको अंश फेला परेको हो ।

यस प्रकारका पानीका पाइपलाइनमा कोरोना भाइरसको अंश फेला परेपछि पेरिसका पिउने पानी बाहेक अन्य सबै पापलाइनहरुको सञ्‍जाललाई अनिश्चित कालका लागि विच्छेद गरिएको पेरिस महानगरपालिकालाई उद्धृत गर्दै फ्रान्सेली सञ्‍चारमाध्‍यम ले मोन्‍डेले जनाएको छ ।

'कोरोना भाइरसको सानो संकेत सडक सफा गर्ने, आगलागी निभाउने, बोटबिरुवामा सिंचाइ गर्ने, निर्माणमा प्रयोग गर्ने पानीको पाइपलाइनमा फेला परेको हो । तर पिउने पानीका लागि भने जोखिम छैन्,' पेरिस महानगरपालिका प्रमुख आन डिहाल्गोले मिडियाहरुसित भनिन् ।

महानगरपालिकाको खानेपानी विभागको प्रयोगशालाले २७ वटा नमुना परीक्षण गर्दा चार वटा नमुनामा कोरोना भाइरसको अंश फेला परेको हो । त्यसलगत्तै जनस्वास्थ्यलाई ख्याल गरेर अधिकारीहरुले पेरिसका पानीका सबै पाइपलाइनको सञ्जाल विच्छेद गर्न निर्देशन दिएका थिए । तर पिउने पानीका पाइपलाइन भने अलग्गै संयन्त्र, मार्ग र पाइपबाट आउने र तिनमा भाइरस फेला नपरेकाले सुरक्षित रहेको दाबी गरेका छन् ।

भाइरस फेला परेका पाइपबाट आउने पानी सेन नदी र ऊर्क नहरबाट बिनाप्रशोधन सिधै ल्याउने गरिन्छ । यो पानी बगैंचा, पार्क, उद्यानमा सिँचाइ गर्न, सडक सफा गर्न, भवन निर्माणलगायतका काममा प्रयोग गरिने हुनाले नागरिकमा संक्रमण हुन सक्ने हुँदा विच्छेद गरेको महानगरपालिकाका अधिकारीहरुले बताएका छन् ।

अधिकारीहरुले पानीका पाइपलाइनहरुमा कसरी कोरोना भाइरस संक्रमित भयो भन्ने बताउन सकेका छैन । प्रयोगशालामा हाल अनुसन्धान भइरहेको र त्यसको कारण पूर्ण अनुसन्धानपछि सार्वजनिक गरिने उनीहरुको भनाइ छ ।

प्रकाशित : वैशाख ९, २०७७ ०८:३२
प्रतिक्रिया
पठाउनुहोस्

स्विट्जरल्यान्ड ल्याइँदै गरेको कीटनाशक जेल इटालीद्वारा कब्जा

ददि सापकोटा

पेरिस — आफूले ल्याउँदै गरेका कीटाणुनाशक पदार्थ इटालीले जफत गरेको स्विट्जरल्यान्डले आरोप लगाएको छ । इटालीले दुई देशबीचको सिमानामा एउटा ट्रक अवरुद्ध गरेर कीटाणुनाशक पदार्थ कब्जा गरेको स्विट्जरल्यान्डका विदेशमन्त्री इग्नाजियो कासिसले आरोप लगाए ।

इटालीले सार्वभौम राष्ट्रमाथि हस्तक्षेपको प्रयास गरेको पनि उनले बताए । स्विस वाणिज्य यातायात संघले कीटाणुनाशक पदार्थ जफत गर्ने इटालीको कदमलाई ‘स्टेट थ्रेट’ को संज्ञा दिएको स्विस इन्फोले जनाएको छ ।

आफ्ना सामान स्विट्जरल्यान्ड भित्रिँदै गर्दा दुई देशबीचको सीमा क्षेत्र डोमोडोसलामामा इटालीले सामानसहितको ट्रकलाई गत सातादेखि रोकेर राखेको विश्वभरिबाट सामान आयात गर्ने स्विस कम्पनी भिक्टोरी स्विट्जरल्यान्डले जनाएको छ । स्विट्जरल्यान्डले पहिले नै ट्रकमा रहेका सामानको भुक्तानी गरिसकेको स्थानीय सञ्चारमाध्यमले उल्लेख गरेका छन् ।

भिक्टोरी स्विट्जरल्यान्डका प्रबन्ध निर्देशक डेनियल गेर्बरले स्विस इन्फोलाई बताएअनुसार स्विट्जरल्यान्डतर्फ ल्याइँदै गरेको रोगाणुनाशक जेल (डिसइन्फेक्टेन्ड ह्यान्ड जेल) इटालीका भन्सारका अधिकारीहरूले जफत गरेका हुन् ।

इटालीका भन्सार अधिकारीहरूले भने कोरोना भाइरसका कारण सिर्जित आपत्कालीन अवस्थामा कीटाणुनाशक पदार्थले भरिएको ट्रक कब्जा गर्नु उचित भएको तर्क दिएको छ । स्विस टोलीलाई दिइएको भन्सार कागजमा ती सामान डोमोडोसलामामा रहेको इटालीको भन्सार निकायलाई बुझाइने उल्लेख छ । त्यसपछि इटालीका अस्पताल र नगरपालिकामा वितरण गरिने जनाइएको छ । भिक्टोरी स्विट्जरल्यान्डले जर्मन कम्पनी गिफ्ट्स र ब्युटी ह्यान्डलबाट तीन साताअघि ३० हजार ८ सय डलर तिरेर कीटाणुनाशक सामग्री मगाए पनि उक्त सामग्री इटालीमै बनेका थिए ।

इटालीका अधिकारीहरूले भने जफत गरेका सामग्रीको मूल्य फिर्ता गर्न सकिने उल्लेख गरेका छन् । भिक्टोरी स्विट्जरल्यान्डले यसअघि मार्चको सुरुवातमा पनि जर्मनीमा यस्तै समस्या भोगेको थियो । चीनबाट जर्मनी हुँदै ल्याउन लागिएका ३ लाख १४ हजार मास्क जर्मनीको हेमबर्गमा रोकिएको थियो । दुई दिनपछि मात्र मास्क पठाइएको थियो ।

प्रकाशित : चैत्र २७, २०७६ ०८:३४
पूरा पढ्नुहोस्
प्रतिक्रिया
पठाउनुहोस्
×