अन्टार्क्टिकाको तापक्रम पहिलो पटक २०.७५ डिग्री सेल्सियस

एजेन्सी

काठमाडौँ — वैज्ञानिकहरुले अन्टार्क्टिकामा अहिलेसम्मकै उच्च तापक्रम मापन गरिएको बताएका छन् । अन्टार्क्टिका महाद्वीपमा पहिलो पटक २०.७५ डिग्री सेल्सियस (६९.३५ डिग्री फहरेनहाइट) मापन गरिएको अनुसन्धानकर्ताहरुले बिहीबार जानकारी दिएका छन् ।

ZenTravel

‘हामीले अन्टार्क्टिकामा यत्रो तापक्रम बढेको कहिल्यै थाहा पाएका थिएनौं,’ ब्राजिली वैज्ञानिक कार्लोस सेफरले एएफपीसँगको कुराकानीमा भनेका छन् । कार्लोसका अनुसार फेब्रुअरी ९ मा सेमोर आइल्यान्डबाट २०.७५ डिग्री सेल्सियस तापक्रम मापन गरिएको हो ।

अर्जेन्टिनाका वैज्ञानिकहरुले यसअघि फेब्रुअरी ६ मा अन्टार्क्टिकाको तापक्रम १८.३ डिग्री सेल्सियस पुगेको बताएका थिए । मानवीय गतिविधिका कारण विश्वमै जलवायु परिवर्तनको असर देखिएको र अन्टार्क्टिकामा पनि त्यसको प्रभाव परेको वैज्ञानिकहरुले जानकारी दिएका छन् । अन्टार्क्टिकाको ‘ग्लेसियर’ र ‘आइस शीट’ पग्लिँदै जाँदा समुद्री सतह बढ्दै गएको र त्यसको प्रत्यक्ष प्रभाव समुद्री किनारमा रहेका सहरहरु र साना टापु देशहरुमा परेको पनि वैज्ञानिकले बताएका छन् ।

यसअघि मार्च २४, २०१५ मा अन्टार्क्टिकाको तापक्रम १७.५ डिग्री सेल्सियस मापन गरिएको थियो । सन् १९६१ देखि अन्टार्क्टिकाको तापक्रम मापन सुरु गरिएको हो ।

प्रकाशित : फाल्गुन २, २०७६ १०:५१
ADVERTISEMENT
ADVERTISEMENT
प्रतिक्रिया
पठाउनुहोस्

कोरोना प्रकोप : बिहीबार १२४ को मृत्यु, संक्रमित पुष्टि गर्न नयाँ विधि

एजेन्सी

बेइजिङ — नोवल कोरोना भाइरसका कारण बिहीबार चीनमा १२३ र जापानमा एक जनाको मृत्यु भएको छ । शुक्रबार बिहानसम्म कोरोना भाइरसका कारण मृत्यु हुनेको संख्या एक हजार ३ सय ८३ पुगेको छ । त्यसमध्ये हङकङ, फिलिपिन्स र जापानमा एक-एक जनाको मृत्यु भएको छ ।

बुधबारको तुलनामा भने बिहीबार मृत्यु हुने र संक्रमितको संख्यामा कमी आएको छ। बुधबार मात्रै डिसेम्बरमा संक्रमण देखिएयताकै सबैभन्दा धेरै २४२ जनाको मृत्यु भएको थियो भने करिब १५ हजार संक्रमित थपिएका थिए।

त्यस्तै बिहीबार चीनमा मात्रै थप चार हजार ८ सय ५४ जनामा संक्रमण देखिएको छ। बिहीबार नै जापानमा ५०, सिंगापुरमा ८, हङकङमा ३, अमेरिकामा २ र मलेसिया र भियतनाममा १-१ जनामा संक्रमण देखिएको छ।

शुक्रबार बिहानसम्म विश्‍वरभर संक्रमितको संख्या ६५ हजार २४७ पुगेको छ । उपचारमा नयाँ विधि लागू गरिएपछि थप संक्रमित पहिचान भएको स्वास्थ्य आयोगका प्रवक्ता मीले बताए । प्रयोगशालामा पुष्टि भएका मात्रै नभई लक्षण र जोखिमका आधारमा ‘क्लिनिकल्ली पुष्टि भएका’ लाई पनि संक्रमितमा राखिएकाले यो संख्या पुगेको उनको भनाइ छ ।

संक्रमित पुष्टि गर्न नयाँ विधि

चीनले नोवल कोरोना संक्रमित पुष्टि गर्न नयाँ विधि लागू गरेको छ । संक्रमितको अवस्था हेरेर वर्गीकरणको नयाँ प्रणाली लागू गरिएको चिनियाँ स्वास्थ्य आयोगले जनाएको छ ।

यसअघि ‘न्युक्लेइक एसिड’ परीक्षणका आधारमा संक्रमित पुष्टि गरिन्थ्यो । नयाँ विधिअनुसार संक्रमणका लक्षण तथा सीटी स्क्यान गर्दा फोक्सोमा असर देखिए मात्र रोग लागेको पुष्टि गरिनेछ । भाइरसको

उद्गमस्थल हुबेई प्रान्तमा लागू गरिएको विधिले संक्रमण निदानको दायरा फराकिलो बनाउने दाबी छ । भाइरस प्रकोप नियन्त्रणमा उचित कार्य गर्न नसकेको भन्दै हुबेई र वुहानका उच्च अधिकारी हटाइएकै दिन मंगलबार संक्रमण पहिचानका लागि नयाँ विधि लागू गर्ने घोषणा गरिएको थियो । संक्रमण नियन्त्रणमा काम गर्न नसकेको भन्दै व्यापक आलोचना भएपछि ती अधिकारी बर्खास्तमा परेका थिए ।

हुबेईले संक्रमितको पहिचान र उपचारलाई तीव्रता दिन संशोधित निदान र उपचार योजना अपनाएको चिनियाँ राष्ट्रिय स्वास्थ्य आयोगका प्रवक्ता मी फेङले बताएका छन् । निमोनिया भएका संदिग्धको पहिचान गर्न ‘क्लिनिकल डाइग्नोसिस केस’ नयाँ उपचार प्रणालीमा राखिएकाले जतिसक्दो चाँडो बिरामीबारे जानकारी हुने र संक्रमण पुष्टि भए उपचार गर्न सकिने उनले बताए । नयाँ प्रक्रियाले बिरामीको संख्या र मृत्युदर घटाउन सहयोग पुग्ने प्रवक्ता मीको भनाइ छ ।

वुहानस्थित दुई अस्पतालमा उपचाररत बिरामीको उपचार गर्ने जिम्मेवारीसहित थप दुई हजार ६०० सैन्य स्वास्थ्य अधिकारी पनि खटाइएको चिनियाँ स्वास्थ्य अधिकारीले जानकारी दिएका छन् । यसबाहेक चीनका अन्य सहरबाट १८९ स्वास्थ्य टोलीमा रहेका २१ हजार ५६९ अधिकारी पनि हुबेई पठाइएको स्वास्थ्य आयोगले उल्लेख गरेको छ । थप सहयोगका लागि १७ प्रान्तबाट एक हजार चिकित्सक, एक हजार ६८१ नर्स र २१३ विज्ञ बुधबार वुहान पुगेका छन् । त्यसैगरी तीनटा मोबाइल पी थ्री प्रयोगशाला पनि वुहान पुर्‍याइएको छ ।

पर्यटकका गतिविधि नियाल्दै इन्डोनेसिया

इन्डोनेसियाले कोरोना भाइरस संक्रमण भएको हुन सक्ने भन्दै चिनियाँ पर्यटकका गतिविधि नियाल्ने भएको छ ।

स्वास्थ्य मन्त्रालयका अधिकारीले बिहीबार जनाएअनुसार रिसोर्ट टापु बालीबाट फर्कने सबै चिनियाँ पर्यटक निगरानीमा हुनेछन् । २६ करोड जनसंख्या रहेको विश्वकै चौथो ठूलो देश इन्डानेसिया चिनियाँ पर्यटकका लागि लोकप्रिय गन्तव्य हो । इन्डोनेसियामा हालसम्म कोरोना संक्रमित व्यक्ति भेटिएका छैनन् ।

चिनियाँ पर्यटक गएका होटल र अन्य गन्तव्यमा भाइरस परीक्षण भइरहेको तर हालसम्म कही पनि संक्रमणका लक्षण नपाइएको स्वास्थ्य मन्त्रालयले जनाएको छ ।

विश्व स्वास्थ्य संगठनले चीनमा देखापरेको भाइरस प्रकोपलाई अति सावधानीपूर्वक लिनुपर्ने धारणा राखेको छ । स्विट्जरल्यान्डको जेनेभामा आयोजित एक कार्यक्रममा संगठनका प्रमुख टेड्रोस एड्हानोम घेब्रेयसुसले कोरोना भाइरसबारे भ्रम फैलाइँदा त्यसले प्रकोप न्यूनीकरणमा असर पर्ने भन्दै सावधानीपूर्वक लिन सबैमा आग्रह गरेका हुन् ।

कहाँ कति संक्रमित?

चीन – १३८३ मृत्यु, ६४,६५८ संक्रमित

हङकङ – १ मृत्यु, ५३ संक्रमित

फिलिपिन्स – १ मृत्यु, ३ संक्रमित

जापान - १ मृत्यु, २५२ संक्रमित

संक्रमित मात्रै

सिंगापुर – ५८

थाइल्याण्ड – ३३

दक्षिण कोरिया – २८

ताइवान – १८

अस्ट्रेलिया – १५

मलेसिया – १९

जर्मनी – १६

भियतनाम – १६

अमेरिका – १५

फ्रान्स – ११

मकाओ – १०

बेलायत – ९

क्यानडा – ७

यूएई – ८

इटाली – ३

भारत – ३

रुस – २

श्रीलंका – १

कम्बोडिया – १

फिनल्याण्ड – १

नेपाल – १

स्विडेन – १

स्पेन – १

बेल्जियम – १


प्रकाशित : फाल्गुन २, २०७६ ०८:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×