नोवल कोरोना संक्रमणले सार्सलाई उछिन्यो

९१० को मृत्यु, ४० हजारभन्दा बढी संक्रमित
एजेन्सी

बेइजिङ — नोवल कोरोना भाइरसका कारण मृत्यु हुनेको संख्या आइतबार साँझसम्म ९१० पुगेको छ । यो संख्या सन् २००२–२००३ मा फैलिएको ‘सार्स’ बाट मृत्यु हुनेको भन्दा धेरै हो ।

कोरोनाकै कारण आइतबारसम्ममा ४० हजारभन्दा बढी संक्रमित पाइएका छन् । अधिकांश संक्रमित चीनकै छन् । चीनमा मात्रै ४१ हजार १ सय ७१ जना संक्रमित छन् । चीनबाहिर ३८३ जनामा भाइरस संक्रमण पाइएको छ । चीनबाटै फैलिएको सार्स महामारीका कारण ७७४ जनाको मृत्यु भएको थियो भने आठ हजार ९८ मा संक्रमण पुष्टि भएका थियो ।


गत डिसेम्बरमा भाइरस संक्रमण देखिएयता पहिलोपटक शनिबार मृत्यु दरमा कमी आएको चिनियाँ अधिकारीले बताएका छन् । यो सकारात्मक संकेत भएको उनीहरूको भनाइ छ । अन्य देशमा पनि संक्रमणको दरमा कमी आएको छ । त्यस्तै चिनियाँ अधिकारीले कोरोना संक्रमितमध्ये निको हुनेको संख्या पनि बढिरहेको बताएका छन् । आइतबार साँझसम्म ३ हजार ३ सय ४२ जना कोरोना संक्रमित निको भएको चीनको राष्ट्रिय स्वास्थ्य आयोगले जनाएको छ ।


पछिल्लो २४ घण्टामा मात्र ३ हजार ६२ नयाँ संक्रमित थपिएका छन्, जसमध्ये अधिकांश हुवेई प्रान्तकै हुन् । शनिबारभन्दा आइतबार संक्रमितको संख्या भने बढेको हो ।


चीनबाहिर नयाँ संक्रमित

जापान, दक्षिण कोरिया, भियतनाम, मलेसिया, स्पेनमा कोरोना भाइरसका नयाँ संक्रमित पाइएका छन् ।

डाइमन्ड प्रिन्सेस क्रुज सिपमा रहेका ‘क्रु सदस्य’ सहित ३ हजार ७ सय यात्रुलाई क्वारेन्टाइनमा राखिएपछि जापानमा ६ जनामा कोरोना संक्रमण पाइएको छ ।


दक्षिण कोरियामा एक ७३ वर्षीया महिलामा भाइरस संक्रमण पुष्टि भएसँगै संक्रमितको संख्या २७ पुगेको छ । भियतनामले देशमा १४ औं संक्रमित पाइएको जनाएको छ । राजधानी हनोईबाट उत्तरपश्चिममा पर्ने भिन्ह फुक प्रान्तकी एक ५५ वर्षीया महिला कोरोना भाइरसबाट संक्रमित पुष्टि भएसँगै संक्रमितको संख्या १४ पुगेको हो । मलेसियाले पनि १७ औं व्यक्तिमा संक्रमण पाइएको जनाएको छ । स्पेनले कोरोना भाइरसको दोस्रो संक्रमितको पुष्टि गरेको छ ।


क्रुज सिप छोडियो

हङकङले क्रु सदस्यसहित १ हजार ८ सय बढी यात्रु बोकेको ड्रिम वर्ल्ड क्रुज सिपलाई क्वारेन्टाइनबाट रिहा गरेको छ । जहाजमा रहेका कसैमा पनि भाइरस संक्रमण नपाइएपछि छोडिएको अधिकारीले बताएका छन् । गत महिना मुख्यभूमि चीनका आठ यात्रुमा संक्रमण पाइएपछि उक्त जहाजलाई अलग्गै राखिएको थियो ।


नयाँ अस्पताल सञ्चालनमा

मात्र दुई सातामा निर्माण सम्पन्न भएको वुहानस्थित १ हजार ५ सय शय्याको अस्पताल शनिबारदेखि सञ्चालनमा ल्याइएको छ । हजार शय्याको अस्पताल गत साता नै सञ्चालन गरिएको थियो । हुबेईका ग्रामीण क्षेत्रमा समेत सरकारले स्वास्थ्य सेवा पुर्‍याएको छ ।


यसैगरी, हुबेई प्रान्तका किसान, खाद्य उत्पादक र सुपरमार्केटलाई सरकारले राहत उपलब्ध गराउने भएको छ । भाइरसविरुद्धको अभियानमा सहयोग गरेका कम्पनीलाई सरकारले कर छुट दिन लागेको चिनियाँ समाचार एजेन्सी सिन्ह्वाले उल्लेख गरेको छ । मेडिकल उपकरण बनाउने कम्पनीका कामदारलाई ओभरटाइम दिने तयारी पनि सरकारले गरिरहेको अधिकारीले बताएका छन् । प्रकाशित : माघ २७, २०७६ ०८:४०

प्रतिक्रिया
पठाउनुहोस्

सरकार उपस्थिति देखाऊ

सम्पादकीय

गत डिसेम्बर अन्तिम सातादेखि संक्रमणका रूपमा देखा परिसकेको नोवल कोरोना भाइरसको उद्गम स्थल चीनको हुबेई प्रान्तको वुहान सहर अहिले निर्जन र एकान्तिकझैं बनिसकेको छ । यो संक्रमणको सन्त्रासका माझ वुहानसहित आसपासका तीन सहरमा बसोबास गर्ने अधिकांश मुलुकका आप्रवासी नागरिक अहिले घरफिर्ता भइसकेका छन्, यी सहरहरूमा चीन सरकारले सम्पूर्ण रूपका आवागमन बन्द गरेको छ । वुहान र आसपासका सहर बाहिरी विश्व र चीनको आन्तरिक सम्पर्क–संवादबाटै एक्लिएको यो अवस्था तत्कालै सहजीकरणको दिशामा जाला भन्ने स्थिति छैन । संख्याका आधारमा झन्डै ८ सय संक्रमितको ज्यान गइसकेको र ३० हजारभन्दा बढी संक्रमणमा परेर उपचाररत रहेको स्थितिलाई सामान्य मान्न मिल्दैन ।

वुहान र आसपासका सहरमा रहेका विश्वविद्यालय, अध्ययन संस्थान र अन्यत्र रहेका गरेर अहिलेसम्म सूचीकृत १८० जना विद्यार्थीले घर फर्कनका लागि नेपाल सरकारसँग बिन्तीभाउ गरेको पनि एक साता भइसकेको छ । संक्रमणको गम्भीर अवस्थासँगै मनोवैज्ञानिक सन्त्रासले घेरिएर बसेका नेपालीका लागि उनीहरूको अन्तिम इच्छास्वरूप घर फर्काउने दिशामा नेपाल सरकारले भने देखावटी र आश्वासनकारी उपायमात्रै अवलम्बन गर्दै आएको देखिन्छ ।

कतिसम्म भने कुनै संक्रमणमा नपरेका र बिरामी अवस्थामा नरहेका विद्यार्थीलाई चीनबाट सिधै ल्याएर अस्पताल भर्ना गर्नुपर्नेझैं गरेर यही कारण अस्पतालमा बेड व्यवस्थापन गरिँदैछ भनेरै सरकारले झन्डै १० दिनको समय गुजारिसकेको छ । संक्रमणको सम्भावना अवधि पार गर्न कम्तीमा १४ दिन ‘आइसोलेसन’मा राख्नुपर्ने चिकित्सकीय अभ्यास र सुझावमा पछिल्ला दिनमा यस्तो एकान्तिक स्थल खोजिरहेका छौं भनेर सरकारले अर्को आलटालको जवाफ दिइरहेको छ । सरकारका उच्च पदाधिकारीहरू ती विद्यार्थीलाई नेपाल ल्याउनुभन्दा चिनियाँ सेवा, सुविधा र सुरक्षामा उतै रहन दिनु उपयुक्त भन्ने भावको सन्देश सुनाइरहेका छन् । अझ केही राजनीतिक दलका वरिष्ठ नेताहरू चीनबाट विद्यार्थी काठमाडौं ल्याउनु हुन्छ कि हुन्न भन्ने बहसमा उत्रिएका छन्, केही स्थानीय समुदायले भक्तपुरमा ‘आइसोलेसन सेन्टर’ राख्न नदिनेसम्मको नारा–जुलुस गरिसकेका छन् । यसबेला राज्य संवेदना, संयन्त्र र अठोटको प्रश्न त पूरै अर्थहीन बनेको छ नै, त्यसमाथि आफ्ना नागरिकको जीवनरक्षा एवं यो संकटको घडीमा राज्यले आफ्ना नागरिकप्रति देखाउनुपर्ने अपनत्वबोध पनि खोजीको विषय बनेको छ ।

स्थिति कस्तो लज्जास्पद देखिन्छ भने प्रधानमन्त्री, परराष्ट्रमन्त्री र उच्चपदस्थ पदाधिकारीले समेत सार्वजनिक मञ्चमा उभिएर ‘हामी चीनमा रहेका विद्यार्थी एक/दुई दिनमै ल्याउँछौं’ भनिरहेका छन्, तर यो प्रक्रियामा जोडिनैपर्ने नागरिक उड्डयन प्राधिकरण, हवाई सेवा, बेइजिङस्थित कूटनीतिक नियोग भने उद्धार प्रक्रिया र संयन्त्रका बारेमा पूरै ‘बेखबर’ छन् । चीनको वुहानबाट स्वास्थ्य संवेदनशीलताबारेको सबै प्रक्रिया पूरा गरेर नेपाली विद्यार्थी घरफिर्ता ल्याउनु भनेको इराक वा सिरियामा रहेका अलपत्र नेपाली कामदार फिर्ता ल्याउनुसरहको जटिल एवं मुस्किलको स्थिति हो भन्ने मानसिकताले सरकारी संयन्त्रमा पकड राखेको देखिन्छ । स्वभावतः यो भयावह संक्रमणसँग जुध्ने र सावधानी अपनाउने स्थिति आफैंमा निकै जोखिमयुक्त छ नै, तर यसो भन्दैमा आफ्ना नागरिकले एकान्तिक बन्दै गएको विदेशी भूमिबाट गरिरहेको घरफिर्तीको आर्तनाद र बिन्तीभाउ सुन्नै नचाहेको अवस्था भने मानवीय संवेदनहीन देखिन्छ र यो स्थिति निन्दनीयसमेत छ ।

यो संकटको घडीमा पक्कै पनि राजनीतिक तहमा भनिने गरेझैं आजको भोलि नै उद्धार र समन्वयको प्रक्रिया पार गर्न मुस्किल छ, यो सबैले मनन गर्ने तथ्य हो । तर, यो संक्रमण फैलिएको दुई महिना बितिसक्दा, वुहानमा रहेका भारतीय, बंगलादेशी, श्रीलंकालीसहित पश्चिमा मुलुकका विद्यार्थीहरूसमेत घरफिर्ती भइसक्दा नेपाल सरकारले गरेको तयारी र निर्देशनबाहेकको व्यावहारिक काम के थियो भनेर आम तहमा सोध्ने बेला आएको छ । बेइजिङस्थित नेपाली राजदूतले गरेको अपिलमा ‘संकटको यो घडीमा धैर्य तथा संयम अपनाउनु हुन, भाइरस संक्रमणको नियन्त्रणका लागि चीन सरकारले दिने सुझाव पालना गर्नुहुन, भ्रमपूर्ण वा अतिशयोक्तिपूर्ण समाचार वा सूचनासँग सावधान रहनुहुन’ भनेरै मृत्यु मुखैमा आएर पनि धैर्यधारण गरिरहने हो कि ? अथवा, नेपालीसमेत संक्रमणको चपेटामा परेर मृत्युसंख्या गन्ने स्थिति आइहालेमा यो बहुमतीय सरकारको साख र अस्तित्व कहाँ खोज्न सकिएला ? यसकारण अब धैर्यधारणको मीठो मुखबोली मात्रै होइन, नेपाली विद्यार्थीको आर्तनाद सुनेर जतिसक्दो चाँडो उद्धार–संयन्त्र व्यवहारमा देख्न पाइयोस्, आग्रह छ ।

प्रकाशित : माघ २७, २०७६ ०८:२६
पूरा पढ्नुहोस्
प्रतिक्रिया
पठाउनुहोस्
×