खालिद बिन खालिफा बिन थानी बने कतारका नयाँ प्रधानमन्त्री

गृहमन्त्रीसमेतको जिम्मेवारी सम्हाल्दै आएका प्रधानमन्त्री शेख अब्दुल्लाह बिन नासर अल थानीले अमिरसमक्ष राजीनामा दिएपछि कतारमा प्रधानमन्त्री पद रिक्त थियो ।

अमेरिका–इरानबीचको पछिल्लो तनाव र छिमेकी राष्ट्रसँगको कूटनीतिक समस्याबाट गुज्रिरहेको कतारमा नयाँ प्रधानमन्त्री ल्याइएको छ । यसअघि अमिरको कार्यालय ‘अमिरी दिवान’को प्रमुख रहिसकेका नवनियुक्त ५१ वर्षीय प्रधानमन्त्री शेख खालिदले गृहमन्त्रीको जिम्मेवारी पनि सम्हाल्नेछन् । विदेश, ऊर्जा, अर्थ, रक्षा र व्यापार जस्ता प्रमुख मन्त्री पद भने यथावत् नै राखिएका छन् ।

कतारले सन् २०२२ को विश्वकप फुटबल आयोजना गर्दै छ । अर्थतन्त्र र अन्तर्राष्ट्रिय प्रभावमा वृद्धि गर्ने उद्देश्यले उसले विश्वकपको आयोजना गर्न लागेको हो । विश्वकपलाई सफलतापूर्वक सम्पन्न गराउन पनि प्रधानमन्त्री बदलिएको हुन सक्ने अन्तर्राष्ट्रिय सञ्चारमाध्यमले जनाएका छन् ।