कोरोना भाइरसको संक्रमण बढ्दो : चीनले बिदा लम्ब्यायो
बेइजिङ — चीनमा नोवल कोराना भाइरसको संक्रमण थप फैलिन नदिन बिदा लम्ब्याइएको छ । मानिसहरू घरमै बसून् र संक्रमण नफैलियोस् भनेर चिनियाँ नयाँ वर्षको बिदा लम्ब्याइएको हो । ‘मानिसको भीड रोक्न र प्रकोप नफैलियोस् भनेर यसअघि बिहीबारसम्म दिइएको बिदा आइतबारसम्म पुर्याइएको छ,’ मन्त्रिपरिषद्को बैठकपछि जारी विज्ञप्तिमा उल्लेख छ, ‘अर्को सूचना नआएसम्म विद्यालयहरू पनि बन्द रहनेछन् ।’
भाइरसका कारण मृत्यु हुनेको संख्या सोमबार ८१ पुगेसँगै बिदा लम्ब्याइएको हो । ३ हजारभन्दा बढी संक्रमित भेटिएको राष्ट्रिय स्वास्थ्य आयोगले जनाएको छ । भाइरस उद्गमस्थल हुबेईको वुहानमा मात्रै ७६ जनाको मृत्यु भएको चिनियाँ स्वास्थ्य मन्त्रालयले जनाएको छ । सांघाई, हेबेई, हेइलङजियाङ र हेनानमा पनि १/१ जनाको मृत्यु भएको छ । सोमबार हैनानमा पनि ८० वर्षीया महिलाको ज्यान गएको छ ।
चीन शासित हङकङले वुहानबाट आउने सबैलाई प्रवेश निषेध गर्ने भएको छ । भाइरसको फैलन सक्ने क्षमता बढिरहेको भन्ने चीन सरकारको जानकारीसँगै हङकङको पछिल्लो घोषणा आएको हो । सबै ट्राभल एजेन्सीलाई देशभित्रका यात्रा रद्द गर्न भनिएको छ ।
हुबेई प्रान्तको वुहानमा जनवरी २२ बाट स्थगन गरिएको विमान, रेल र बस सेवा अझै खुलाइएको छैन । १७ सहरमा पनि यी सेवा बन्द गरिएका छन् । यसले ५ करोडभन्दा बढी जनता प्रभावित भएका छन् । विश्व व्यापारको केन्द्र सांघाईले बिदा लम्ब्याएर फेब्रुअरी ९ सम्म पुर्याएको छ । उसले खेलकुद रंगशाला बन्द गर्न र धार्मिक गतिविधिसमेत नगर्न भनेको छ ।
अन्य देशमा पनि भाइरस संक्रमण भेटिएका छन् । दक्षिण कोरियाले सोमबार कोरोना भाइरसको चौथो संक्रमित भेटिएको जनाएको छ । कम्बोडियाले पहिलोपटक सोमबार एकजनामा संक्रमण पाइएको उल्लेख गरेको छ । थाइल्यान्ड, ताइवान, जापान, अमेरिका, भियतनाम, सिंगापुर, मलेसिया, नेपाल, फ्रान्स, क्यानाडा र अस्ट्रेलियामा पनि संक्रमित भेटिएका छन् । हङकङमा ५ र मकाउमा २ जना संक्रमित भेटिएको चीनले पुष्टि गरेको छ ।
प्रधानमन्त्री ली वुहानमा
चीनका प्रधानमन्त्री ली खछ्याङले सोमबार भाइरस प्रभावित वुहानको भ्रमण गरेका छन् । संक्रमण रोकथामका लागि भइरहेका कामको अनुगमन गर्दै आवश्यक निर्देशन दिन उनी त्यहाँ पुगेको मन्त्रिपरिषद्को वेबसाइटमा उल्लेख छ । उनले अस्पतालका कर्मचारीसँग पनि भेटेका छन् । लीले भाइरस नियन्त्रणका लागि सरकारले आवश्यक सबै कदम चाल्ने प्रतिबद्धता व्यक्त गरेका छन् ।उनले सहरका केही सुपरमार्केटको अनुगमन पनि गरेका छन् । ‘भाइरस नियन्त्रणमा ल्याउनु समग्र देशका लागि सुखद् समाचार हुनेछ,’ लीले भने, ‘हामी वुहानका जनताको सुरक्षा, स्वास्थ्य र लामो जीवनको कामना गर्छौं ।’
पर्यटकीय क्षेत्र बन्द
यसैबीच, भाइरसको संक्रमण फैलन सक्ने भन्दै चीनका कैयौं पर्यटकीय क्षेत्र बन्द गरिएका छन् । तिब्बतको राजधानी ल्हासास्थित प्रख्यात पोताला दरबार पनि सोमबार बन्द गरिएको छ । बेइजिङस्थित पूर्वशाही दरबार पनि अर्को सूचना नभएसम्मका लागि शुक्रबारै बन्द गरिएको थियो । हङकङमा पनि मुख्य पर्यटकीय क्षेत्र बन्द गरिएको छ ।
विदेशी नागरिक फिर्ता लगिँदै
वुहानस्थित अमेरिकी महावाणिज्य दूतावासले आफ्ना कूटनीतिज्ञ र नागरिकलाई मंगलबार फिर्ता लाने तयारी भइरहेको बताएको छ । फ्रान्सले पनि आफ्ना नागरिकलाई स्वदेश लगेर छुट्टै निरीक्षणमा राख्ने जनाएको छ । त्यसैगरी, जापान र जर्मनीले पनि वुहानबाट आफ्ना नागरिकलाई फिर्ता लान खोजिरहेको अन्तर्राष्ट्रिय सञ्चारमाध्यमले जनाएका छन् ।
अर्थतन्त्रमा धक्का
भाइरसका कारण चीनमा यातायात, मनोरञ्जनका क्षेत्रसहित कलकारखाना पनि बन्द भएका छन् । घरमै बस्नुपर्ने भएकाले उपभोक्ताले खर्च गर्ने दर घटेको छ । यी कारणले खस्कँदो चिनियाँ आर्थिक दरलाई झनै समस्या हुने देखिएको छ ।
पयर्टक र आयात बजारका लागि चीनमा भर पर्ने एसियाली अर्थतन्त्र पनि समस्यामा पर्न सक्ने देखिएको छ । चीनका अनुगमनकर्ताले बैंक र इन्स्योरेन्स कम्पनीलाई भाइरस प्रभावित मानिस र कम्पनीलाई सहयोग गर्न सोमबार विज्ञप्तिमार्फत आग्रह गरेका छन् । भाइरस संक्रमण यसरी नै बढ्दै गए पर्यटन, होटल र रेस्टुरेन्टसहित उद्योगमा समेत असर पर्ने अर्थविद्ले बताएका छन् ।
प्रकाशित : माघ १४, २०७६ ०७:३०