हङकङले कोरोना भाइरस संक्रमितलाई नयाँ अपार्टमेन्टमा राखेर उपचार र निगरानी गर्ने
हङकङ — हङकङले कोरोना भाइरसबाट संक्रमित र संक्रमणको आशंका गरिएकाहरुलाई नयाँ अपार्टमेन्टमा राखेर उपचार र निगरानी गर्ने भएको छ । प्रयोगमा नआएको हङकङको फानलिङमा रहेको ‘फाई मिङ इस्टेट’ भवनमा कोरोना संक्रमितलाई राख्ने हङकङका अधिकारीले जनाएका छन् ।
वुहानबाट फैलिएको कोरोना भाइरसको संक्रमणका कारण चीनमा कम्तीमा ८० जनाको ज्यान गइसकेको छ । त्यस्तै चीनमा मात्रै २ हजार ७ सयभन्दा बढीमा यसको संक्रमण देखिएको छ । सोमबार बिहानसम्म हङकङमा ८ जनामा कोरोनाभाइरसको संक्रमणको पुष्टि भएको छ ।
चीनको वुहानबाट फैलिएको कोरोनाभाइरस विश्वका विभिन्न देशमा समेत फैलिइसकेको छ । चीन बाहेक विश्वका विभिन्न देशका ५० भन्दाबढीमा यसको संक्रमण देखिएको छ ।
वुहानबाट आउनेलाई हङकङमा रोक
यसैबीच हङकङ सरकारले वुहान प्रान्तबाट आउनेमाथि प्रतिबन्ध लगाउने भएको छ । सोमबार रातिदेखि वुहानबाट हङकङ प्रवेश गर्न रोक लगाइने भएको हो । गत १४ दिनभित्र वुहानको भ्रमण गरेकालाई प्रवेश निषेध गरिएको हङकङका अधिकारीले जनाएका छन् ।
प्रकाशित : माघ १३, २०७६ १४:०४