गोली प्रहारबाट जर्मनीमा ६ को मृत्यु- विश्व - कान्तिपुर समाचार

गोली प्रहारबाट जर्मनीमा ६ को मृत्यु

एजेन्सी

काठमाडौँ — जर्मनीको दक्षिण–पश्चिमी सहर रोट आम सीमा शुक्रबार एक बन्दुकधारीले अन्धाधुन्ध प्रहार गरेको गोली लागेर ६ जनाको मृत्यु भएको छ ।

गोली प्रहारबाट कैयौं घाइते भएको जर्मन प्रहरीले बताएको छ । स्थानीय समयअनुसार सहरको रेल स्टेसननजिकै शुक्रबार १२ बजेर ४५ मिनेटमा बन्दुकधारीले अन्धाधुन्ध गोली प्रहार गरेको थियो । घटनालगत्तै प्रहरीले शंकास्पद बन्दुकधारीलाई पक्राउ गरेको थियो । प्रहरीका अनुसार यस घटनामा एकजनाको मात्रै संलग्नता देखिन्छ ।


‘मेरो जानकारीमा भएसम्म गोली लागेर ६ जनाको मृत्यु भएको छर कैयौं घाइते भएका छन्,’ आलेनका प्रहरी प्रवक्ता रुडल्फ बेहाल्मरले जर्मन प्रसारण संस्था एन–टीभीसँग बताए ।


‘एकजना मात्रै आक्रमणकारी रहेको हामीले प्रारम्भिक अनुसन्धानबाट पत्ता लगाएका छौं,’ उनले भने । उनका अनुसार आक्रमणकारी जर्मन नागरिक नै भएको र हताहत भएका केहीसँग उसको व्यक्तिगत परिचय रहेको खुलेको छ ।


पीडितमध्ये केही एकै परिवारको रहेको अनुसन्धानबाट पत्ता लागेको प्रहरीको भनाइ छ । घटनास्थल म्युनिख सहरबाट १ सय ७० किलोमिटर उत्तर–पश्चिममा पर्ने अधिकारीहरुले बताएका छन् ।

प्रकाशित : माघ १०, २०७६ २१:४६
प्रतिक्रिया
पठाउनुहोस्

तीन महिनाभित्र माग सम्बाेधन नभए निगममा २२ पाइलटले राजीनामा दिने

कान्तिपुर संवाददाता

काठमाडौँ — करारमा ल्याइने विदेशी विज्ञ पाइलटसरह सेवा सुविधा पाउनुपर्ने माग राख्दै ध्वजाबहाक नेपाल वायुसेवा निगमको अन्तर्राष्टिय उडानतर्फका २२ जना नेपाली पाइलटले बिहीबार तीन महिनाको अल्टिमेटमसहितको राजीनामा सूचना बुझाएका छन् ।निगमका ती स्थायी पाइलटहरुले करारमा राखिने विदेशी विज्ञसरह सेवा सुविधा हुनुपर्ने वा आफूहरुलाई पनि उनीहरुलाई जस्तै करारमा अनुबन्ध गरीनुपर्ने माग राखेका छन् । यदि तीन महिनाभित्र यी माग सम्बाेधन नभएमा निगमबाट बाहिरिन बाध्य हुने उनीहरुले बुझाइएको पत्रमा उल्लेख छ ।

यो राजिनामाको सूचना निगमका कार्यकारी अध्यक्ष मदन खरेलले छाडेको ५ दिनपछी उनैलाई सम्बाेधन गर्दै उनकै सचिवालयमा दर्ता भएको नायव महाप्रबन्धक गणेश चन्दले बताए । ‘निगम नेतृत्वविहीन भएको अवस्थामा सय हाराहारी पाइलटहरुमध्येबाट २२ ले तीन महिनाको भाका राखेर राजिनामा दिन बाध्य हुने सूचना दर्ता गराएका हुन,’ निगमका प्रवक्ता समेत रहेका चन्दले भने, ‘जस्ले विदेशी विज्ञ, प्रशिक्षक पाइलट, क्याबिन क्र्रु ल्याउन सुरुवात गरेका थिए उनीहरु नै यस्को विपक्षमा हस्ताक्षरमा देखिए ।’

उनले सेवा सुविधाको विषयलाई राजनीतिकरण गरिएको बताए । करिब ४१ अर्ब ऋणमा डुबेको निगममा १६ महिनाअघि मात्रै प्रधानमन्त्री केपी शर्मा ओलीले सञ्चालक समितिको अध्यक्षबाट पर्यटन सचिवलाई हटाई आफ्नै गृह जिल्लाका मदन खरेललाई नियुक्त गरेका थिए । वाइडबडी ल्याइएपछी चुस्त व्यवस्थापन र आम्दानी गर्न नसकेपछी खरेल राजिनामा बुझाई अष्ट्रेलियातर्फ ‘भागेका’ छन् ।
मन्त्रीपरिषदले बिहीबारको बैठकबाट संस्कृती पर्यटन तथा नागरिक उड्डयन सचिवलाई निगमको संचालक समितिको अध्यक्षमा नियुक्त गरेको छ । निगम व्यवस्थापनले आइतबार पाइलटहरुको मागबारे नयाँ अध्यक्षका रुपमा तोकिएका सचिव केदार बहादुर अधिकारीसमक्ष पेस गर्ने जनाएको छ ।
यसैबिच सामूहिक राजीनामा सूचनामा राजनीतिकरण गरेको जनाउँदै उक्त हस्ताक्षर अभियानमा संलग्न चार जना वरिष्ठ पाइलटहरुले शुक्रबार आफ्नो राजिनामा सूचना फिर्ता लिएका छन् । अपरेसन विभागका अनुसार, हस्ताक्षर फिर्ता लिनेमा वाइडबडीका क्याप्टेन समज कुमार श्रेष्ठ, न्यारोबडीका क्याप्टेन नर बहादुर विश्वकर्मा, कोपाइलट राजेश कुशवाह र अपरेसन विभागका निर्वतमान निर्देशक रविन्द्र शेरचन छन् । विभागले अरु ५ जनाले फोनबाट फिर्ता लिएको जनाएको छ ।

‘हामीले गरेको हस्ताक्षर विदेशी विमानचालक र स्वदेशीबिचको सेवा सुविधाको असमानता घटाउने अभिप्रायमा आएको थियो,’ हस्ताक्षरमा अभियानमा संलग्न एक वरिष्ठ पाइलटले भने, ‘तर उक्त हस्ताक्षर विभिन्न व्यक्तिद्धारा दुरुपयोग गरी सहमति विपरित विभिन्न संचारमाध्यममार्फत निगमका विमानचालकद्वारा सामूहिक राजीनामा दिएको भनी दुस्प्रचार गरिएकोमा खेद प्रकट गर्दै उक्त राजीनमाको सूचना केवल नेपाली विमानचालकको सेवा सुविधा बढाउने प्रयोजनकालागि मात्रै हो’ ती वरिष्ठ क्याप्टेनले लेखेको पत्रमा छ । उनले राजीनामा पनि फिर्ता लिएको जनाउँदै शुक्रबार छुटै निवेदन दर्ता गराएको बताए ।

निगमको पाइलटहरु हेर्ने अपरेशन विभागका प्रमुख दिपुराज जुआर्चनले पाइलटहरुले बुझाएको विषयबारे अध्ययन गरिने बताए । ‘निगमको मानव संसाधन, अर्थ, अपरेसन विभाग र सेवा सुविधा माग गर्ने पाइलटहरुमध्येबाट दुई जना प्रतिनिधि राखेर कार्यदल बनाई अध्ययन गरीने छ,’ उनले भने ।

सामूहिक राजीनामा सूचनामा हस्ताक्षर गर्ने २२ मध्ये ९ जना वाइडबडीका र १३ जना न्यरोबडीका पाइलट छन् । जस्मा १२ जना क्याप्टेन हुन भने १० जना कोपाइलट हुन । यी अधिकाशं निगमको आन्तरिक उडानमा रहेको क्यानेडियन टुइनअटर विमानबाटै बढुवा भई जेट विमानसम्म पुगेका पाइलट हुन । निर्देशक जुआर्चनका अनुसार, निगमसंग आन्तरिक र अन्तर्राष्टिय उडानमा स्वदेशी विदेशीगरी १ सय १० हाराहारी पाइलट छन । जस्मा १३ जना विदेशी विज्ञ पाइलट छन् । विदेशी प्रशिक्षक पाइलटले नेपाली पाइलटलाई क्लियर गरेपछी निगमले उनीहरुको करार अवधि थप्ने गरेका छैन ।

प्रकाशित : माघ १०, २०७६ २१:३६
पूरा पढ्नुहोस्
प्रतिक्रिया
पठाउनुहोस्
×