इमरानले फेरि गरे भाजपा र नाजी पार्टीको तुलना 

कश्मीर प्रकरणमा भारत सरकारको व्यवहार नाजी पार्टीले म्युनिखमा गरेजस्तै भएको बताउँदै उनले भने, ‘भारतीय शासन अहिले पनि अतिवादी विचारधाराबाट चलिरहेको छ । जसको नाम हो आरएसएस । सन् १९२५ मा नाजी पार्टीको प्रेरणामा आरएसएसको स्थापना भएको थियो ।’

उनले वर्तमान भारतीय प्रधानमन्त्री नरेन्द्र मोदी आरएसएसको आजीवन सदस्य भएको बताए । उनले कश्मीरको विशेष राज्यको दर्जा खोसिएपछि ५ महिनादेखि ८० लाख मानिस जेलमा जस्तै बस्न बाध्य भएको आरोप पनि लगाए ।

भारत–पाकिस्तान विवाद र कश्मीर समस्या समाधानका लागि संयुक्त राष्ट्र संघ वा अमेरिका जस्ता शक्तिले दबाब नदिई यो मुद्दा नसुल्झिने पनि उनले बताए । अमेरिकी राष्ट्रपति डोनाल्ड ट्रम्पले भारत–पाकिस्तान शान्ति वार्ताका लागि मध्यस्तकर्ता बन्न आफू तयार रहेको पनि इमरानले बताए ।

उनले अमेरिका–इरान तनाव बढ्दै जाँदा विकासशील अर्थव्यवस्थामा नराम्रो असर पुर्‍याउने पनि बताए । कुनै प्रकारको लडाइँ भएमा पाकिस्तानको मात्रै होइन, पुरै विश्वअर्थतन्त्र नै डामाडोल हुने इमरानले बताए ।