लैंगिक समानताका लागि स्विजरल्याण्डमा पुरुष संकेतलाई महिला संकेतले प्रतिस्थापन गरिने
पेरिस — सार्वजनिक स्थलहरुमा लैंगिक समानता नभएको भन्ने व्यापक गुनासो आएपछि स्विजरल्याण्डको जेनेभा प्रान्तले पुरुष संकेतहरुलाई प्रतिस्थापन गर्दै महिला संकेत प्रयोग गर्ने भएको छ ।स्विजरल्याण्डका सार्वजनिक स्थलका खासगरी जेब्रा क्रसिङ र सडक पार गर्ने अन्य स्थलमा वर्षौंदेखि पुरुष संकेतहरुको मात्रै प्रयोग गरिँदै आएको थियो ।
महिला अधिकारकर्मीहरुले आफ्नो देशमा विविधिकरण नभएको र लैंगिक एकाधिकार भएको भन्दै विरोध जनाउँदै आएका थिए । महिलाकर्मीहरुको मागलाई ध्यानमा राखेर स्विजरल्याण्डको जेनेभा प्रान्तले करिब पाँच सय पुरुष संकेतहरुलाई प्रतिस्थापन गरी महिला संकेत प्रयोग गर्ने निर्णय गरेको हो ।
अब जेनेभाले विविधीकरण देखाउन अफ्रिकी मूलका महिलाको जस्तो कुर्लुङ कुर्लुङ परेको (घुम्रिएको) कपाल, गर्भवती महिला, लठ्ठी टेकेकी महिला, वृद्ध महिला, हात समातेका दुई महिला, चुल्ठो राखेकी महिलासहित ६ थरी महिला संकेत राख्न लागेको हो ।
परम्परागत रुपमा सडकको ढाँचा पुरुषहरुले निर्माण गरेकाले पुरुषहरुलाई नै महत्व दिँदा लैंगिक असमानता देखिएकाले हाल त्यसलाई आफूले बदल्न लागेको जेनेभाका मेयर सँद्रिन सालेमोले स्विस टेलिभिजन आरटीएसलाई बताएकी छिन् । उनका अनुसार यो संकेत प्रतिस्थापनले अब महिलालाई सार्वजनिक स्थलमा जाँदा सम्मान र अपनत्वको महसुस गराउने छ ।
पाँच सय पुरुष सडक संकेतलाई महिला संकेतमा बदल्न जेनेभा प्रान्तलाई करिब ६६ लाख ५३ हजार रुपैयाँ लाग्ने भएको छ । गत साल जुरिच प्रान्तले अन्तर्राष्ट्रिय महिला दिवसका दिन गे परेड राखिएका बेला केही पुरुष संकेत बदल्न अल्पकालका लागि महिला संकेत राखेको थियो । तर स्विजरल्याण्डमा दीर्घकालीन रुपमा पुरुष संकेतहरुलाई महिला संकेतमा बदल्न लागिएको यो पहिलो घटना हो ।
प्रकाशित : माघ १०, २०७६ ०७:१९