चीनमा कोरोना भाइरसबाट मृत्यु हुनेको संख्या ९ पुग्यो, उत्तर कोरियामा विदेशीलाई प्रतिबन्ध

एजेन्सी

बेइजिङ — चीनमा कोरोना भाइरसको संक्रमणबाट मृत्यु हुनेको संख्या ९ पुगेको छ । बुधबार चीनका स्वास्थ्य मन्त्री ली बिनले कोरोना भाइरसका हुबेई प्रान्तमा ९ जनाको ज्यान गएको जानकारी दिएका हुन् । मृत्यु हुनेमध्ये धेरै पाका उमेरका व्यक्ति रहेको पनि जनाइएको छ । त्यस्तै ४४० जनामा यसको संक्रमण देखिएको छ । 

कोरोना भाइरस संक्रमणको ‘इपिसेन्टर’ मानिएको हुबेई प्रान्तको वुहान सहरमा पशुबजार र जंगली जनावरमाथि कडा नियमन गर्न पनि स्थानीय प्रशासनलाई निर्देशन दिएको मन्त्री बिनले बताए । मानिसहरुको बढी आवतजावत हुने विमानस्थल, बसपार्क, रेल्वे स्टेसन, बन्दरगाहहरुमा स्वास्थ्य जाँचका लागि थर्मल बडी स्क्यानर राखिएको मन्त्री बिनले जानकारी दिए ।

अहिलेसम्म कहाँ कहाँ फैलियो ?

चीनको हुबेई प्रान्तको वुहानबाट फैलिएको कोरोना भाइरसको संक्रमण चीनका १३ प्रान्तमा फैलिएको छ । चीनको वुहानमा भन्डै एक करोड जनसंख्या रहेको छ । बुधबार अमेरिकाको सियाटलमा एक जना व्यक्तिमा कोरोना भाइरसको संक्रमण भएको अमेरिकी अधिकारीले जनाएका छन् । वुहानबाट केही दिनअघि अमेरिका फर्किएका अमेरिकी नागरिकमा यसको कोरोना भाइरसको संक्रमण भेटिएको हो ।

चिनियाँ स्वास्थ्यमन्त्री ली बिन तस्बिर : रोयटर्स

जापानको टोकियोमा पनि एक जना व्यक्तिमा पनि कोरोना भाइरसको संक्रमण देखिएको छ । दक्षिण कोरियाको राजधानी सोल, ताइवान र मकाउमा पनि एक–एक जनामा यसको संक्रमण भेटिएको छ । त्यस्तै थाइल्याण्डको बैंककमा २ जना व्यक्तिमा कोरोना भाइरसको संक्रमण भेटिएको छ ।

विश्व स्वास्थ्य संगठनले नेपालमा पनि यसको उच्च जोखिम रहेको भन्दै सतर्कता अपनाउन चेतावनी दिएको छ । वुहानबाट फर्किएका एक जना नेपाली विद्यार्थीमा कोरोना भाइरसको संक्रमणको शंका गरिए पनि त्यसको औपचारिक पुष्टि भएको छैन ।

उत्तर कोरियामा विदेशी नागरिकलाई प्रतिबन्ध

चीनको वुहान फैलिएको कोरोना भाइरसको संक्रमणलाई रोक्न भन्दै उत्तर कोरियाले बुधबारबाट विदेशी पर्यटकमाथि प्रतिबन्ध लगाएको छ । सीएनएनले उत्तर कोरियाली ट्राभल एजेन्सी ‘योङ पायोनियर टुर्स’ लाई उद्धृत गर्दै बुधबारबाट उत्तर कोरियाले विदेशी पर्यटकमाथि प्रतिबन्ध लगाएको जनाएको छ । मंगलबार उत्तर कोरियाली समाचार एजेन्सी केसीएनएले पनि कोरोना भाइरसको संक्रमणको जोखिम रोक्नका लागि देशव्यापी अभियान सुरु गरेको जनाएको थियो ।

उत्तर काेरिया र चीनकाे सीमा छुट्याउने यालु नदीमा रहेकाे मितेरी पुल फाइल तस्बिर : रोयटर्स

उत्तर कोरियामा विदेशी नागरिकको आउजाउ एकदमै न्यून हुने गरेको छ । उत्तर कोरियाली पयर्टन उद्योगमा विशेषगरी चिनियाँ पर्यटकको विशेष योगदान रहेको छ । चिनियाँ सञ्चार माध्यम ग्लोबल टाइम्सका अनुसार उत्तर कोरियाली अर्थतन्त्रमा पयर्टन उद्योगबाट वार्षिक ४४ मिलियन अमेरिकी डलरको योगदान रहेको छ ।

तर उत्तर कोरियामा कति विदेशी पर्यटकले भ्रमण गर्छन् भन्ने यकिन विवरण भने उपलब्ध छैन । ग्लोबल टाइम्सका अनुसार हरेक वर्ष उत्तर कोरियामा एक लाख पर्यटकले भ्रमण गर्छन् । त्यसमध्ये ८० प्रतिशत पर्यटक चिनियाँ नागरिक रहेको ग्लोबल टाइम्सले लेखेको छ ।

प्रकाशित : माघ ८, २०७६ १४:११

ADVERTISEMENT
प्रतिक्रिया
पठाउनुहोस्

केजरीवाललाई 'टक्कर' दिन यादव र सबरवाल चुनावी मैदानमा

एजेन्सी

नयाँदिल्ली — दिल्लीका मुख्यमन्त्री अरविन्द केजरीवालविरुद्ध भरतीय जनता पार्टी(भाजपा)ले उम्मेदवार घोषणा गरेको छ । भाजपाले जनता युवा मोर्चा दिल्लीका अध्यक्ष सुनिल यादवलाई नई दिल्ली क्षेत्रबाट उम्मेदवार बनाएको छ ।

सुनिलले वेबसाइटमा आफू पेसाले वकिल र सामाजिक कार्यकर्ता भएको बताएका छन् । उनले राजनीतिक करियर युवा मोर्चाबाट सुरु गरेका थिए ।

नई दिल्ली क्षेत्रबाट २०१५ मा अरविन्द केजरीवालले भाजापाकी उम्मेदवार नुपुर शर्मालाई झन्डै ३१ हजार मतले हाराएका थिए । सन् २०१३ मा भएको विधानसभा चुनावमा केजरीवालले दिल्लीकी तीन पटककी मुख्यमन्त्री शीला दीक्षितलाई २५ हजार मतले हराएका थिए । केजरीवालको लोकप्रियता अगाडि सुनिल यादव फिक्का पर्ने भारतीय सञ्चारमाध्यमले बताएका छन् । सामाजिक सञ्जाल फेसबुकमा केजरीवाललाई पछ्याउनेको संख्या ७५ लाख रहेको छ । सुनिल यादवका भने झन्डै एक लाख फलोअर्स रहेका छन् । त्यस्तै ट्विटरमा केजरीवाललाई १ करोड ६३ लाख र सुनिललाई १६ हजारले पछ्याएका छन् ।

त्यस्तै नई दिल्ली सिटमा भारतीय कांग्रेसले रोमेश सबरवाललाई उम्मेदवार बनाएको छ । कांग्रेसको भातृ संगठन भारतीय राष्ट्रिय विद्यार्थी युनियनका पूर्वअध्यक्ष रहेका सबरवाल पहिलो पटक चुनावी मैदानमा उत्रिएका हुन् ।

७० सिट रहेको दिल्ली विधानसभाको चुनावका लागि मंगलबार उम्मेदवार मनोनयन दर्ता गर्ने अन्तिम दिन हो । झन्डै एक करोड ४७ लाख मतदाता रहेको दिल्लीमा फेब्रुअरी ८ मा मतदान हुँदैछ । ११ फेब्रुअरीमा मतगणना हुनेछ ।

२०१५ मा भएको दिल्ली विधानसभा चुनावमा आम आदमी पार्टी(आप) ले ७०मध्ये ६७ सिटमा ऐतिहासिक जित हात पारेको थियो । भाजपाले तीन सिटमा जित हात पार्दा कांग्रेस भने खाली हात भएको थियो । यस पटक पनि विभिन्न एक्जिट पोलको सर्वेक्षणमा आम आदमी पार्टीले नै बहुमत प्राप्त गर्ने देखाइएको छ ।

प्छिल्ला ५ वर्षमा मुख्यमन्त्री अरविन्द केजरीवाल नेतृत्वको सरकारले दिल्लीमा खानेपानी, बिजुली, शिक्षा र स्वास्थ्य क्षेत्रमा उल्लेखनीय काम गरेको छ । त्यसको फाइदा यो चुनावमा आपलाई पुग्ने राजनीतिक विश्लेषकहरु बताउँछन् ।

प्रकाशित : माघ ७, २०७६ ११:०२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×