हङकङमा ‘एक देश, दुई प्रणाली’ सन् २०४७ पछि पनि कायम रहन सक्छ : नेतृ लाम
हङकङ — हङकङकी नेतृ क्यारी लामले बेइजिङप्रति इमान्दार भए ‘एक देश, दुई प्रणाली’ सन् २०४७ को समयसीमापछि पनि कायम रहने बताएकी छिन् ।
बिहीबार हङकङको विधान परिषद्मा सम्बोधन गर्दै नेतृ लामले ‘एक देश, दुई प्रणाली’ ले हङकङका नागरिकलाई चीनका अन्य भूभागमा भन्दा धेरै स्वतन्त्रता दिएको बताएकी हुन् ।
सन् १९९७ मा बेलायतले आफ्नो उपनिवेश रहेको हङकङ चीनलाई हस्तान्तरण गरेको थियो । बेलायतसँग सम्झौतामा चीनले हङकङमा सन् २०४७ सम्म पश्चिमा शैलीकै संस्थागत संरचना हुने प्रतिबद्धता जनाएको थियो । अहिलेको व्यवस्थाबमोजिम अन्तर्राष्ट्रिय मञ्चमा 'हङकङ, चीन'को रुपमा उपस्थिति जनाउँछ । यसअन्तर्गत मुख्य भूमि चीनको तुलनामा हङकङका जनताले उच्च स्वतन्त्रता अभ्यास गर्दै आएका छन् ।
‘हामीले एक देश, दुई प्रणाली’ सिद्धान्तको पालना र अभ्यास गर्यौँ भने सन् २०४७ पछि पनि यसले निरन्तरता पाउनेछ,’ नेतृ लामले भनिन् ।
गत वर्षको जुनदेखि लोकतन्त्र र पूर्ण स्वायत्तता माग गर्दै प्रदर्शन भइरहेको छ ।
प्रकाशित : माघ २, २०७६ १०:३७