जब दिल्ली प्रहरीलाई अदालतले संविधान पढायो...

को हुन् चन्द्रशेखर आजाद ?
कान्तिपुर संवाददाता

काठमाडौँ — दिल्लीको तीस हजारी अदालतले भीम आर्मीका प्रमुख चन्द्रशेखर आजादविरुद्ध प्रमाण पेस गर्न नसकेकोमा दिल्ली प्रहरीकाे आलाेचना गरेकाे छ । चन्द्रशेखरको जमानत याचिकामा मंगलबार सुनुवाइ गर्दै अदालतले नागरिककाे विराेध गर्ने अधिकारमा हस्तक्षेप गर्न नहुने बताएकाे हाे ।

ZenTravel

न्यायाधीश कामिनी लाउले भीम आर्मीका प्रमुखलाई ‘विरोध गर्ने संवैधानिक अधिकार’ भएको बताइन्। डिसेम्बर २१ म नागरिकता संशोधन कानुनको विरोधमा प्रदर्शन गर्दा दरियागञ्जबाट चन्द्रशेखरलाई दिल्ली प्रहरीले पक्राउ गरेको थियो।

Meroghar

अदालतले संसदमा कुरा नउठेपछि मानिसहरु सडकमा ओर्लिएको पनि बताएको छ। न्यायाधीश लाउले नागरिकलाई विरोध गर्ने अधिकार भएको बताउँदै दिल्ली प्रहरीसँग सोधिन्, ‘धर्ना गर्नुमा के गलत हाे? विरोध जनाउनु के गलत हाे? सबैलाई विरोध गर्ने संवैधानिक अधिकार रहेको छ।’

चन्द्रशेखर नेतृत्वको सामाजिक संगठन भीम आर्मीले प्रहरीको अनुमतिबिना डिसेम्बर २० मा जामा मस्जिददेखि जन्तरमन्तरसम्म र्‍यालीकाे आयोजना गरेको थियो।

संसदले कुरा नसुनेपछि नागरिक सडकमा उत्रिने कुरालाई जोड दिँदै न्यायाधीश लाउले दिल्ली प्रहरीलाई भनिन्, ‘तपाईँहरु यस्तो व्यवहार गर्दै हुनुहुन्छ कि जामा मस्जिद पाकिस्तानमा छ। पाकिस्तानमा भएको भए पनि तपाईँ त्यहाँ गएर विरोध प्रदर्शन गर्न सक्नुहुन्छ। पाकिस्तान अभिवाजित भारतको एक हिस्सा थियो।’

जवाफमा सरकारी वकिलले विरोध प्रदर्शन गर्नुअघि अनुमति लिनुपर्ने तर्क प्रस्तुत गरे। यसको जवाफमा न्यायाधीश लाउले यस विषयलाई सर्वोच्च अदालतले कैयौँ पटक धारा १४४ को दुरुपयोगको संज्ञा दिएको बताइन्।

न्यायाधीश लाउले संसदबाहिर प्रदर्शन गर्ने कैयौँ व्यक्ति पछि नेता र मन्त्री बनेको देखेको बताइन्। संसदमा उठ्नुपर्ने कुरा नउठेपछि नागरिकले त्यस्ता कुरा सडकमा पोख्ने न्यायाधीश लाउले दोहोर्‌याइन्।
त्यसपछि सरकारी वकिलले चन्द्रशेखरको सामाजिक सञ्जालमा रहेको एउटा पोस्टका आधारमा उनलाई जमानत दिन नहुने तर्क राख्यो। सुरुमा सरकारी वकिलले चन्द्रशेखरको स्टाटस बताउन नमाने पनि न्यायाधीशको निर्देशनपछि उनीहरुले पढेका थिए। चन्द्रशेखरले सामाजिक सञ्जालमा नागरिकता कानुन र एनआरसीको विरोधमा जामा मस्जिदमा भेला हुन सबैलाई आह्वान गरेका थिए।

न्यायाधीश लाउले चन्द्रशेखरको स्टाटसमा हिंसा भड्काउने कुरा केही नभएको बताइन्, ‘हिंसा कहाँ छ? यी सबै पोस्टमा हिंसाको कुराचाहिँ कहाँ छ? कसले भन्यो कि विरोध गर्न पाइँदैन? के तपाईँले संविधान पढ्नु भएको छ?’ उनले प्रहरीसँग सोधिन्, ‘तपाईँ मलाई देखाउनुस् कि कुन कानुनबमोजिम धार्मिक स्थानबाहिर प्रदर्शन गर्न प्रतिबन्ध लगाइएको छ?’

न्यायाधीशले यसघटनामा चन्द्रशेखरले हिंसा गरेको केही प्रमाण छ भनेर पनि सरकारी वकिलसँग प्रश्न गरिन्। उनले भनिन्, ‘के तपाईँलाई लाग्छ दिल्ली प्रहरी यति निकम्मा छ कि उसँग केही प्रमाण नै छैन। स–साना घटनाका पनि प्रमाण जुटाउने दिल्ली प्रहरीसँग यस घटनाको प्रमाण किन छैन?’

दिल्ली प्रहरीले जवाफमा ड्रोन क्यामेराबाट लिएको एउटा तस्बिरबाहेक आफूहरुसँग केही प्रमाण नभएको बताएको छ। अदालतले चन्द्रशेखर आजादसँग कानुनको ड्रिगी भएकाले उनले अदालतभित्र पनि प्रदर्शन गर्न पाउने बताएको थियो। अदालतले चन्द्रशेखरको अम्बेडकरवादी विचारधाराका बारेमा पनि टिप्पणी गरेको थियो। ‘आजाद सम्भवतः अम्बेडकरवादी हुन्। अम्बेडकर मुसलमान, सिख, दलित तथा मुख्यतयाः समाजमा पछाडि पारिएका समुदायको नजिक थिए। उनमा आफ्नै प्रकारको विद्रोहीपन थियो। सायद आजादले गर्न चाहेको कुरा पनि पर्याप्त छैन होला। उनलाई पूरा जानकारी नहुन सक्छ। यदि तपाईँ कुनै मुद्दा चलाउँदै हुनुहुन्छ भने रिसर्च गर्नुहोस्। तपाईँका दलिलमा उनी परेका छैनन्।’

चन्द्रशेखर आजादका तर्फबाट दर्ता गरिएको याचिकामा महमूद प्राचाले बहस गरेका थिए। चन्द्रशेखरलाई लगाइएको आरोपमा प्रहरीसँग कुनै प्रमाण नभएकाले उनको गिरफ्तारी गैरकानुनी भएको उनले बताए। चन्द्रशेखरकाे मुद्दामा बुधबार पुन: सुनुवाइ हुँदैछ।

को हुन् चन्द्रशेखर आजाद?
चन्द्रशेखर आजाद उर्फ रावण उत्तर प्रदेशको सहारनपुरको धडकौलीमा स्थायी बासिन्दा हुन्। उनी कानुनमा स्नातक गरेका छन् ।
सन् २०१४ मा उनले विनय रतन सिंहसँग मिलेर भीम आर्मी वा भीम आर्मी भारत एकता मिसनको स्थापना गरे।


यो संस्था दर्ता भएको छैन, तर यसले दलित र सीमान्तकृत समुदायको लागि लड्ने उद्घोष गरेको थियो। चन्द्रशेखेरले आफ्नो गाउँमा ‘द ग्रेट चमार डा. भीमराव अम्बेडकर ग्राम धडकौली तपाईँलाई हार्दिक स्वागत गर्दछ’ भनेर बोर्ड लगाएपछि चर्चामा आएका थिए।

भीम आर्मी कस्तो संस्था हो?
भीम आर्मीले भारतका सात वटा राज्यमा ४० हजारभन्दा बढी सदस्य भएको दाबी गर्छ। विशेषगरी यो संस्था उत्तर प्रदेशका सीमान्तकृत समुदायमा लोकप्रिय रहेको छ। यसले सीमान्तकृत समुदायका बालबालिकाको शैक्षिक सुधारका लागि तीन सयभन्दा बढी विद्यालय सञ्चालन गरिरहेको छ। दलित समुदायका १८ वर्षदेखि २५ वर्षसम्मका युवा संस्थामा जोडिन सक्छन्। संस्थामा सबैभन्दा बढी चमार समुदायका सदस्य रहेका छन्। त्यस्तै मुस्लिम समुदाय पनि संस्थामा जोडिन सक्नेछन्।

सन् २०१७ मा भीम आर्मीले दिल्लीमा अम्बेडकरको फोटोसहित ठूलो प्रदर्शन गरेको थियो। दिल्ली प्रहरीका अनुसार भीम आर्माीका झन्डै १० हजार सदस्य जन्तर मन्तरमा भेला भएर विरोध प्रदर्शन गरेका थिए।

-एजेन्सीकाे सहयाेगमा

प्रकाशित : माघ १, २०७६ १४:०३
प्रतिक्रिया
पठाउनुहोस्
ADVERTISEMENT

सुनको मूल्यमा उतारचढाव कायमै,  तोलामा ७०० ले बढ्यो

कान्तिपुर संवाददाता

काठमाडौँ — निकै उतारचढावकाबीच कारोबार हुँदै आएको सुनको मूल्यमा बुधबार सामान्य वृद्धि भएको छ । नेपाल सुनचाँदी व्यवसायी महासंघका अनुसार बुधबार सुनको मूल्यमा प्रतितोला ७०० रुपैयाँले वृद्धि भएको छ ।

महासंघले छापावाला सुनको मूल्य प्रतितोला ७४ हजार ७०० र तेजाबी सुनको मूल्य प्रतितोला ७४ हजार ४०० तोकेको छ । मंगलबार छापावाला सुन प्रतितोला ७४ हजार र तेजाबी सुन प्रतितोला ७३ हजार ७०० रुपैयाँमा खरिदबिक्री भएको थियो । गत बधुबार नेपाली बजारमा सुनको मूल्य अहिलेसम्मकै उच्च बिन्दुमा पुगेको थियो ।

उक्त दिन छापावाला सुनको मूल्य प्रतितोला ७६ हजार ५०० र तेजाबी सुनको मूल्य प्रतितोला ७६ हजार २०० रुपैयाँ पुगेको थियो । सुनको मूल्य बढेसँगै चाँदीको मूल्यमा पनि प्रतितोला ५ रुपैयाँले वृद्धि भएको छ । आज चाँदीको मूल्य प्रतितोला ८८५ मा खरिदबिक्री भइरहेको महासंघले जनाएको छ ।

पछिल्लो समय मध्यपूर्वमा देखिएको तनाव, चीन–अमेरिका व्यापार युद्धका कारण सुनको मूल्यमा उतारचढाव देखिँदै आएको छ ।

प्रकाशित : माघ १, २०७६ १३:४६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×