फिलिपिन्समा ज्वालामुखीको त्रास

 ८ हजार मानिस विस्थापित,  दुई म्याग्निच्युडमाथिका ३२ कम्पन, सुनामीको चेतावनी
एजेन्सी

मनिला — फिलिपिन्सको सक्रिय ज्वालामुखी तालबाट लाभा निस्किन थालेपछि अधिकारीहरूले ‘केही घण्टा वा दिनभित्र डरलाग्दो विस्फोट’ हुन सक्ने चेतावनी दिएका छन् ।राजधानी मनिलाबाट करिब ६० किलोमिटर दक्षिणमा रहेको तालबाट सोमबार बिहान लाभा निस्किन थालेको हो । अधिकारीका अनुसार ज्वालामुखीको जोखिम बढेसँगै ८ हजार मानिसलाई सुरक्षित स्थानमा सारिएको छ । 

ZenTravel

ताल फिलिपिन्सको दोस्रो बढी सक्रिय ज्वालामुखी हो । तालको बीचमा रहेको द्वीपमा अवस्थित यो विश्वकै साना ज्वालामुखीमध्येको एक हो । ४५० वर्षयता ताल ज्वालामुखी कम्तीमा ३४ पटक विस्फोट भइसकेको छ ।

Meroghar

ताल ज्वालामुखी २३० वर्गकिलोमिटर क्षेत्र भएको विशाल तालको बीचमा रहेका छ । यसअघि यो सन् १९७७ मा विस्फोट भएको थियो । सन् १९११ मा यसको विस्फोटका कारण एक हजार पाँच सय मानिसको ज्यान गएको थियो ।

ताल ज्वालामुखी नजिकैको बतांगस प्रान्तमा अधिकारीहरूले ‘संकटकालीन अवस्था’ को घोषणा गरेका छन् । आइतबार उक्त ज्वालामुखीबाट निकै ठूलो मात्रामा खरानीको थुप्रो निस्केको थियो । त्यस क्रममा निरन्तर आवाज आउनुका साथै कम्पनहरू गएका बीबीसीले उल्लेख गरेको छ ।

अधिकारीका अनुसार सोमबार बिहानदेखि ७५ वटा कम्पन गएका र तीमध्ये ३२ वटा दुई म्याग्निच्युडभन्दा माथिका थिए । ज्वालामुखी र भूकम्पसम्बन्तधी सरकारी निकायका अनुसार स्थानीय समयअनुसार ज्वालामुखीका कारण करिब दुई घण्टासम्म चट्याङ पर्नुका साथै बिजुली चम्किएको थियो । निकायका निर्देशक रेनाटो सोलिडमले ‘धुवाँको मुस्लो, खरानीको थुप्रो, चट्टानका ससाना टुक्रा र ग्यास ६० किलोमिटरभन्दा बढीको गतिमा निस्केको जनाए ।

त्यसलगत्तै अधिकारीले विस्फोटको चेतावनीको तह तीनबाट बढाएर चारमा पुर्‍याएका छन् । चेतावनीको अधिकतम तह पाँच हुन्छ । त्यसका साथै अधिकारीले ज्वालामुखीकाकारण सुनामी आउन सक्ने चेतावनी पनि दिएका बीबीसीले उल्लेख गरको छ । रिङ अफ
फायर भनिने भूकम्पीय जोखिम रहेको क्षेत्रमा पर्ने फिलिपिन्समा भूकम्प र ज्वालामुखीका घटना सामान्य मानिन्छन् ।

संयुक्त राष्ट्रसंघका अनुसार ताल ज्वालामुखीको १४ किलोमिटर वरपरको क्षेत्रमा ४ लाख ५० हजार मानिस बसोबास गर्छन् । नजिकैका क्षेत्रमा ज्वालामुखीको खरानी टाढासम्म पुगेर खसेपछि मानिसलाई मास्क लगाउन सुझाव दिइएको छ । मनिलामा मास्कको अभाव हुन थालेको एक स्थानीयवासीले बताए ।

‘जब म मेरो कार भएको स्थानमा पुगेँ, यो खरानीले ढाकिएको देखेँ । म हतारहतार मास्क किन्न पसलमा गएँ तर सकिएको रहेछ,’ एक स्थानीय एन्जेल बउतिस्ताले भने । सरकारले मास्कका खुद्रा बिक्रेतालाई मूल्य नबढाउन आग्रह गरेको बीबीसीले जनाएको छ ।ज्वालामुखीबाट उडेको खरानीका कारण मनिलास्थित अन्तर्राष्ट्रिय विमानस्थलमा आइतबार सबै उडानहरू स्थगित भएका थिए ।

सोमबार भने केही विमान सेवाले उडान सुचारु गरेका थिए । यद्यपि, अधिकारीले ज्वालामुखीबाट उडेका चट्टानका टुक्रा तथा खरानीका कारण विमानमा क्षति पुग्नसक्ने चेतावनी दिएका जनाइएको छ । राष्ट्रपति रोड्रिगो डुर्टेटेले मनिलामा सबै सरकारी कामकारबाही बन्द गर्न निर्देशन दिएका छन् । त्यहाँका सबै विद्यालय पनि बन्द भएका छन् ।

प्रकाशित : पुस २९, २०७६ ०७:३९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

ओस्कर मनोनयन : 'प्यारासाइट'को कमाल

एजेन्सी

सोमबार साँझ सार्वजनिक भएको वर्ष २०१९ को ओस्कर मनोनयनमा कोरियाली फिल्म 'प्यारासाइट'ले मुख्य विधामा परेर धेरैलाई आश्चर्यमा पारेको छ । यसै वर्ष कान फिल्म फेस्टिभलमा उत्कृष्ट फिल्मको अवार्ड जित्ने पहिलो कोरियन फिल्म बनेको 'प्यारासाइट' ओस्करमा उत्कृष्ट फिल्म र उत्कृष्ट अन्तर्राष्ट्रिय फिल्म दुवै विधामा मनोनित भएको छ । यी दुवैसहित यो फिल्म जम्मा ६ विधामा मनोनित भएको छ । उत्कृष्ट निर्देशक र पटकथामासमेत यो मनोनित छ ।

मार्टिन स्कोरसेजीको नेटफ्लिक्स ड्रामा 'दी आइरिसम्यान', क्वन्टिन टेरेन्टिनोको 'वन्स अन अ टाइम इन हलिउड', टोड फिलिप्सको 'जोकर' र साम मेन्डिसको '१९१७' सँगै बोङ जो हुको 'प्यारासाइट' वर्षको प्रभावशाली फिल्ममा परेको छ। उत्कृष्ट फिल्ममा यी उल्लिखित फिल्मका अलावा 'फोर्ड भर्सेस फरारी', 'जो जो र्‍याबिट', 'लिटल वुमन''म्यारिज स्टोरी' मनोनित छन्।

यसपाली ठूलो भिडन्त निर्देशकमा पनि हुने देखिएको छ। निर्देशकमा दुई हलिउड हस्ती मार्टिन स्कोरसेजी (दी आइरिसम्यान) र क्वन्टिन टेरेन्टिनो (वन्स अपन अ टाइम इन हलिउड)का लागि मनोनित छन्। यिनका अलावा 'प्यारासाइट'का बोङ जो हु, वर्षकै चर्चित फिल्म 'जोकर'का टोड फिलिप्स र पहिलो विश्वयुद्धको कथा बोकेको '१९१७'का साम मेन्डिस मनोनित छन्। केहीअघि सम्पन्न गोल्डन ग्लोब अवार्डमा मेन्डिसले निर्देशक र उत्कृष्ट फिल्ममा बाजी मारेका थिए।

उत्कृष्ट अभिनेतामा जोकरका वाकिन फिनिक्स (गोल्डेन ग्लोब विजेता), पेन एन्ड ग्लोरीका एन्टोनियो बान्डेरस (यस वर्षका क्यान विजेता), वन्स अपन अ टाइम इन हलिउडका लियोनार्डो डिक्याप्रियो, म्यारिज स्टोरीका एडम ड्राइभर र दी टु पोप्सका जोनाथन प्रेइसी मनोनित भएका छन्।

अभिनेत्रीमा जुडीकी रेनी जेल्वेगर, बमसेलकी चार्लिज थेरोन, लिटल वुमनकी सउराइज रोनान, म्यारिज स्टोरीकी स्कारलेट जोन्सन र हर्रियतका लागि सिन्थिया एरिभोबीच प्रतिस्पर्धा हुनेछ।

सहअभिनेतामा वन्न अपन अ टाइम इन हलिउडका ब्रड पिट, दी आइरिसम्यानका अल पचिनो र जोय पेसी तथा अ ब्युटीफुल डे इन नेवरहुडका टम ह्यांक्स र टु पोप्सका एन्थोनी हप्किन्सका बीच प्रतिस्पर्धा हुनेछ।

अन्तर्राष्टीय फिल्म (पहिलेको विदेशी भाषाको फिल्म)मा प्यारासाइटसँग पेन एन्ड ग्लोरी, हनील्यान्ड, लेस मिजरेबल्स क्रोपर क्रिस्टीबीच प्रतिस्पर्धा हुनेछ।

यस वर्ष 'प्यारासाइट' जस्तै गत वर्ष 'रोमा' उत्कृष्ट फिल्म र अन्तर्राष्ट्रीय फिल्ममा मनोनित थियो। यसले अन्तर्राष्ट्रीय फिल्म र निर्देशकको अवार्ड जितेको थियो।

समग्रमा भने 'जोकर'ले सबभन्दा बढी ११ विधामा मनोनयन पाएको छ । ओस्कर अवार्ड फेव्रुअरी ९ मा वितरण गरिनेछ ।

प्रकाशित : पुस २८, २०७६ २१:१२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×