कान्तिपुर वेबसाईट
AdvertisementAdvertisement

परमाणु परीक्षण फेरि थाल्ने उत्तर कोरियाको चेतावनी 

एजेन्सीहरु

प्योङयाङ — उत्तर कोरियाली नेता किम जोङ–उनले आफ्नो मुलुकले फेरि परमाणु र अन्तर महाद्विपीय ब्यालेस्टिक क्षेप्यास्त्र परीक्षण थाल्ने बुधबार चेतावनी दिएका छन् ।

उनले अमेरिकासँग जारी वार्ताका क्रममा परमाणु र लामो दूरीको क्षेप्यास्त्र परीक्षण स्थगन गरेपछि वासिङ्टनको रबैयाले फेरि त्यो कार्य गर्न उस्काएको भन्दै उक्त चेतावनी दिएका हुन् । बीबीसीका अनुसार उनले आफ्नो मुलुकले शीघ्र ‘एउटा नयाँ रणनीतिक हतियार’ विश्वसमक्ष पेस गर्नेसमेत जनाएका छन् ।


‘वार्ताका लागि ढोका खुला राखेका छौँ,’ उनले भने, ‘तर उत्तर कोरियाले कुनै पनि परीक्षण सुचारु गर्ने/नगर्ने कुरा अमेरिकी भूमिकामा निर्भर रहनेछ ।’ विगत केही वर्षयता प्योङयाङले आफ्नो परमाणु कार्यक्रम स्थगन गरेको छ । तर, उत्तर कोरियाले परमाणु कार्यक्रम पूर्ण रूपमा समाप्त नगरेसम्म उसमाथि जारी प्रतिबन्ध हटाउन अमेरिकाले आनाकानी गर्दै आएको छ । विश्लेषकहरुले किमको यो भनाइ अमेरिकामाथि दबाब दिने उद्देश्यले आएको हुन सक्ने टिप्पणी गरेका छन् ।


यसै क्रममा सन् २०१९ को अन्त्यमा उत्तरले धेरै साना हतियारको परीक्षण गरेको थियो । ती परीक्षणहरु अमेरिकामाथि प्रतिबन्ध हटाउनका लागि दबाब स्वरूप गरिएको विश्लेषकहरुको भनाइ छ । तर, स्वघोषित मोरेटोरियम अन्तर महाद्विपीय ब्यालेस्टिक मिसाइल (आईसीबीएम) अमेरिकी मुख्य भूमिसम्म पुग्न सक्ने खालका परीक्षण हो । यो वासिङ्टनसँगको वार्ताको आधारमध्ये एउटा रहेको सञ्चारमाध्यमहरुले जनाएका छन् । सन् २०१७ यता प्योङयाङले यस प्रकारको कुनै परीक्षण गरेको छैन ।


नेता किमको पछिल्लो टिप्पणी एउटा असामान्य घटनाका रूपमा मानिएको प्योङयाङमा पार्टी नेताहरुको चार दिवसीय महत्त्वपूर्ण बैठकपछि सार्वजनिक भएको छ । यसलाई विश्वजगत्ले अर्थपूर्ण रूपमा लिएको छ ।


जनवरी १ मा किमको भनाइलाई उद्धृत गर्दै सरकारी सञ्चारमाध्यमले दक्षिण कोरियासँग अमेरिकाले संयुक्त सैन्य अभ्यास जारी राखेर आफ्नो प्रतिबन्धलाई वासिङ्टनले बढाएकाले उत्तर कोरिया अब स्वघोषित रोकका लागि बाध्य नरहेको जनाएको छ । ‘यस प्रकारको गतिविधिले उत्तर कोरिया आफ्नो एकतर्फी प्रतिबद्धता लागू गर्न बाध्य हुनुपर्ने कुनै आधार छैन,’ कोरियाली समाचार संस्था केसीएनएले उल्लेख गरेको छ ।


आफ्नो भाषणमा नेता किमले चेतावनी दिँदै भनेका छन्, ‘विश्वले निकट भविष्यमा उत्तर कोरियाबाट एउटा नयाँ रणनीतिक हतियार हेर्न पाउनेछ । ’ उक्त रणनीतिक हतियारबारे भने विस्तृत विवरण सार्वजनिक गरिएको छैन ।


बीबीसीका अनुसार पार्टी बैठकमा नेता किमको टिप्पणीले यो स्वीकार गर्छ कि प्रतिबन्धले अर्थ व्यवस्थालाई प्रभावित गरेको कुरो एउटा सत्य भए पनि यसलाई शीघ्र माथि उकास्न नसकिने सम्भावनालाई पनि छर्लङ्ग पारेको छ । तर नेता किमले आफ्नो चेतावनीमा ‘उत्तर कोरियालीहरु आफ्नो बेल्टलाई बलियो बनाउनतिर लागिपर्ने’ भन्न भ्याएका छन् ।’ उत्तर कोरियाली नेताले हालैका महिनाहरुमा जस्तो आक्रामक प्रतिक्रिया दिनुको साटो पर्यवेक्षकहरुका लागि ‘टोनिङ–डाउन’ का रूपमा डोनाल्ड ट्रम्प वा दक्षिण कोरियाको नाम उल्लेख नगरीकनै आफ्नो पछिल्लो चेतावनी जारी गरेका छन् ।


उत्तर कोरियाका विश्लेषण साइट ‘एनके न्युज’ का च्याड ओ’ क्यारोलले भनेका छन्, ‘अप्रिल २०१८ मा लामो दूरीको क्षेप्यास्त्र र मोटाटोरियममाथि परमाणु परीक्षणहरु कम गर्नका लागि यो टिप्पणी महत्त्वपूर्ण छ । यस प्रकारको परीक्षण साता वा महिनामै हुन सक्ने भए पनि त्यो अमेरिकी कदमका लागि आकस्मिक हुन सक्ने उनले बताए । नेता किमको पछिल्लो सार्वजनिक टिप्पणीहरु नव वर्षको अवसरमा उनले दिने सामान्य भाषणका रूपमा मात्र रहेको प्रतिक्रियासमेत केही विश्लेषकहरुको छ । प्रकाशित : पुस १६, २०७६ २१:४६

प्रतिक्रिया
पठाउनुहोस्

चीनको विशाल ‘स्टारफिस’ विमानस्थल खुल्यो

९८ वटा फुटबल मैदान बराबरको क्षेत्रफल ओगटेको, सन् २०२५ सम्म ७ करोड २० लाख यात्रुलाई एउटै विशाल टर्मिनलमा ह्यान्डल गर्न सक्ने क्षमता, तत्काल चारवटा रनवे रहेको र सन् २०४० सम्म प्रतिवर्ष १० करोड यात्रुलाई सेवा प्रदान गर्न आठ रनवे बनाउने योजना
एजेन्सीहरु

बेइजिङ — चीनले १ खर्ब २४ अर्ब ९८ करोड २० लाख रुपैयाँ (११ अर्ब अमेरिकी डलर) मा निर्माण गरेको विशाल विमानस्थल ‘स्टारफिस’ बुधबारबाट खुला गरेको छ ।

मुलुकको ७० औं वार्षिकोत्सव (राष्ट्रिय दिवस) को केही दिन मात्रै बाँकी रहँदा उक्त विमानस्थल खुला गरेको हो । चीनले अक्टोबर १ मा आफ्नो राष्ट्रिय दिवस मनाउँदै आएको छ ।

चिनियाँ राष्ट्रपति सी जिनपिङले बुधबार औपचारिक रूपमा राजधानी बेइजिङस्थित ‘द ड्याक्सिङ इन्टरनेसनल एयरपोर्ट’ को शुभारम्भ गरेका हुन् । सरकारी सञ्चारमाध्यम ‘चाइन डेली’ का अनुसार नयाँ विमानस्थल ९८ वटा फुटबल मैदान बराबरको क्षेत्रमा फैलिएको छ । यसको कूल क्षेत्रफल ७ लाख वर्गमिटर रहेको छ । विमान परिषद्ले बेइजिङको विमानस्थल अमेरिकाको अटलान्टापछि विश्वकै दोस्रो सबैभन्दा ठूलो हवाई अड्डा भएको जनाएको छ । अधिकारीहरुले भीडभाड बढी हुने ‘बेइजिङ क्यापिटल इन्टरनेसनल एयरपोर्ट’ माथि यात्रुको चाप कम गर्न नयाँ विमानस्थलको आवश्यकता रहेको बताएका छन् ।

‘द ड्याक्सिङ विमानस्थल’ ले भनेको छ, ‘विश्वको सबैभन्दा ठूलो अन्तर्राष्ट्रिय टर्मिनलमा सबैभन्दा ठूलो भवन निर्माण गरिएको छ, सन् २०२५ सम्म सहरबाट ठूलो संख्यामा यात्रुहरुलाई सेवा प्राप्त हुने अपेक्षा छ ।’ चिनियाँ सञ्चारमाध्यम ‘ग्लोबल टाइम्स’ का अनुसार सात आन्तरिक विमानलाई तत्कालै नयाँ विमानस्थलबाट परिचालन गरिने कार्यक्रम छ । पहिलो उडान एउटा ‘चाइना सदर्न एयरलाइन्स ए ३८०’ ले स्थानीय समयअनुसार १६ बजेर २३ मिनेटमा उडान भरेको छ । ब्रिटिस एयरवेज, क्याथे प्यासिफिक र फिनएयरसहित अन्तर्राष्ट्रिय यात्रुबाहक विमान कम्पनीहरुले पहिले नै ड्याक्सिङका लागि आफ्नो मार्ग घोषणा गरिसकेका छन् ।

नयाँ विमानस्थल जुन तियानमेन स्क्वायरबाट करिब ४६ किलोमिटर दक्षिणमा पर्छ । यसको डिजाइन प्रसिद्ध वास्तुकार जहा हदिदले गरेका थिए । विमानस्थलको उद्घाटनसँगै बेइजिङ सहर एउटा यस्तो समूहमा समावेश भएको छ, जसमा न्युयोर्क र लन्डन पनि पर्छ । यी सहरहरुमा दुईवटा अन्तर्राष्ट्रिय विमानस्थलबाट यात्रुहरुले सेवा प्राप्त गरिरहेका छन् । सन् १९५८ मा खोलिएको ‘बेइजिङ क्यापिटल’ को उपयोग १० करोडभन्दा बढी यात्रुले उपयोग गरिसकेका छन् ।

नयाँ विमानस्थलका अधिकारीहरुका अनुसार सन् २०२५ सम्म ७ करोड २० लाख यात्रुलाई एउटै विशाल टर्मिनलमा ह्यान्डल गर्न सक्ने क्षमता ड्याक्सिङ विमानस्थलको हुने छ । निर्माण सुरु गरेको पाँच वर्षभित्रै यो विमानस्थल खुला गरिएको बेलायती अखबार ‘दी गार्जियन’ ले जनाएको छ । ‘पिपुल्स रिपब्लिक अफ चाइना’ को स्थापना दिवसको ७० औं राष्ट्रिय दिवसको तयारी भइरहेकै बेला राष्ट्रपति सीले मेगा विमानस्थलको सुरुवात गरेका हुन् । नयाँ विमानस्थल स्टारफिसको आकारमा निर्माण गरिएको छ । यो विमानस्थलको विशेषता भनेको यसमा चारवटा रनवे छन् ।

सन् २०४० सम्म यो विमानस्थललाई एक वर्षमा १० करोड यात्रुलाई सेवा दिने गरी आठवटा रनवेमा विस्तार गर्ने योजनासमेत रहेको ‘दी गार्जियन’ ले लेखेको छ । विमानस्थलमा ग्राहकलाई विमानसँग सम्बन्धित सबै जानकारी रोबोटबाटै दिने व्यवस्था गरिएको छ । यसमा अनुहारबाटै यात्रुको विवरणहरु जाँच गरिने छ । बेइजिङमा अर्को विमानस्थलको आवश्यताबारे धेरै पहिलेदेखि आवाज उठिरहेकोले ‘स्टारफिस’ को निर्माण गरिएको चिनियाँ अधिकारीहरुले बताएका छन् । आर्थिक राजधानीका रूपमा रहेको हङकङमा महिनौंसम्म जारी गतिरोध अन्त्यका लागि चीनले अन्तर्राष्ट्रिय दबाबको समाना गर्नुपरे पनि निर्धारित समयभन्दा पहिले नै यो विमानस्थलको निर्माण कार्य सम्पन्न गरेको छ ।

प्रकाशित : आश्विन ८, २०७६ २०:५६
पूरा पढ्नुहोस्
प्रतिक्रिया
पठाउनुहोस्
×