न्युजिल्यान्डमा ज्वालामुखी विस्फोट, ५ जनाको मृत्यु

(एजेन्सी)

अकल्यान्ड — न्युजिल्यान्डमा एउटा ज्वालामुखी विस्फोट भएपछि कम्तीमा ५ जनाको मृत्यु भएको छ । अधिकारीका अनुसार २० जना घाइते छन् । उनीहरूको शरीर पोलेको छ । उद्धारकर्मीहरूका अनुसार घाइतेमध्ये केहीको अवस्था गम्भीर छ । 

ZenTravel

अकस्मात् भएको ज्वालामुखी विस्फोटपछि कैयौं मानिस सम्पर्कविहीन भएको प्रहरीले जनाएको छ । स्थानीय सञ्चारमाध्यमका अनुसार ज्वालामुखी विस्फोट हुनु केही समयअघि उक्त क्षेत्र नजिकै पर्यटकरू हिंडिरहेका थिए ।

Meroghar

प्रहरीका अनुसार हताहत हुने व्यक्तिको सख्या बढ्न सक्ने बताइएको छ । २३ जनाको सकुशल उद्धार गरिएको छ । तर विस्फोटको खतरा कायमै रहेकाले थप उद्धार गर्न निकै जोखिमपूर्ण रहेको अधिकारीहरूको भनाई छ । उद्धारका लागि सेनाले प्रहरीलाई सघाइरहेको छ ।

बीबीसीका अनुसार न्युजिल्यान्डको उत्तरपूर्वी भेगको ह्वाकारी भनिने ‘ह्वाइट आइल्यान्ड’ मा ज्वालामुखी विस्फोट भएको हो । निजी स्वामित्वमा रहेको मुख्य पर्यटकीय गन्तव्य ह्वाइट आइल्यान्डमा ज्वालामुखीहरू सक्रिय छन् ।
प्रहरीका अनुसार ज्वालामुखी विस्फोटका समय उक्त क्षेत्रमा ५० जनाको हाराहारीमा आन्तरिक तथा बाह्य पर्यटकहरू थिए । न्युजिल्यान्डको क्रुज एसोसियसनले विस्फोटका कारण पर्यटक सवार एक डुंगा पनि प्रभावित भएको छ । उद्धार कार्यका लागि नजिकैको ह्वकाताने नगरमा उद्धारकर्मी परिचालित गरिएको छ । तर प्रहरी उप–कमिस्नर जोन टिम्सले ज्वालामुखी पुनः विस्फोट हुने खतराका कारण सुरक्षाकर्मी उक्त क्षेत्रमा पुग्न नसकेको बताए ।

एक स्थानीय माँझीले विस्फोटपछि उक्त क्षेत्रमा च्याउजस्तो आकारमा विशाल धुवाँको मुस्लो देखिएको बताए । सन् २००१ यता ह्वाइट आइल्यान्डमा भएको यो पहिलो ज्वालामुखी विस्फोट हो । ह्वाइट आइल्यान्डमा विगतमा पनि कैयौं ज्वालामुखी विस्फोट भए पनि उक्त क्षेत्रमा मानिस रहेका बेला भएको यो पहिलो हो ।

न्युजिल्यान्डकी प्रधानमन्त्री जसिन्डा आर्डर्नले घटनालाई निकै ठूलो भएको र उद्धारका लागि सुरक्षाकर्मीलाई उद्धारका लागि निर्देशन दिइसकिएको बताइन् । उनले ज्वालामुखी विस्फोटपछिको बाक्लो धुवाँ
तथा खरानीका कारण सुरक्षाकर्मीलाई उद्धारका लागि कठिनाइ भइरहेको जनाइन् ।

प्रकाशित : मंसिर २४, २०७६ ०९:२८
प्रतिक्रिया
पठाउनुहोस्
ADVERTISEMENT

सान्ना विश्वकै कान्छी प्रधानमन्त्री

(एजेन्सी)

हेलसिन्की — फिनल्यान्डकी ३४ वर्षीया सान्ना मरिन विश्वकै सबैभन्दा कम उमेरकी प्रधानमन्त्री चयन भएकी छन् । 

प्रधानमन्त्री आन्ती रिन्नेले पदत्याग गरेपछि सोसल डेमोक्र्याटिक पार्टीले मरिनलाई सरकारको नेतृत्व गर्न चयन गरेको थियो । उनले मंगलबार पद तथा गोपनीयताको शपथ लिनेछिन् । उनले गत जुनयता यातायात तथा सञ्चारमन्त्रीको जिम्मेवारी सम्हाल्दै आएकी थिइन् ।

प्रधानमन्त्रीको पदभार ग्रहण गरेपछि मरिन विश्वकै सबैभन्दा कम उमेरकी पदमा आसीन प्रधानमन्त्री बन्नेछिन् । युक्रेनका प्रधानमन्त्री ओलेक्सी होन्चरुकको उमेर हाल ३५ वर्ष भयो भने न्युजिल्यान्डकी प्रधानमन्त्री जसिन्डा आर्डर्न ३९ वर्ष पुगिन् ।

बीबीसीका अनुसार गठबन्धन सरकारमा ५ वटा दल सहभागी भएका हुन् । सबै दलको नेतृत्व महिलाले गर्नेछन् । तीमध्ये ४ दलका नेतृ ३५ वर्षभन्दा कम उमेरका छन् । हुलाक सेवामा भएको हडतालको विषयमा विश्वासको मत गुमाएपछि प्रधानमन्त्री आन्ती रिन्नेले राजीनामा दिएसँगै फिनल्यान्डको संसद्ले नयाँ प्रधानमन्त्री चयन गरेको हो ।

प्रधानमन्त्री चयनका लागि भएको मतदानमा झिनो अन्तरले विजयी भएपछि संवाददाताहरूसँगै प्रतिक्रिया दिँदै उनले ‘नवीन काममार्फत जनताको विश्वास जित्न आफू क्रियाशील रहने’ बताइन् ।

यद्यपि, उमेरबारे पत्रकारहरूले सोधेको प्रश्नको उत्तरमा भने उनी मुस्कुराइन् । त्यसलगत्तै केही गम्भीर बन्दै उनले भनिन्, ‘मैले मेरो उमेर वा लिंगबारे कहिल्यै केही सोचेकी छैन ।’ मरिन नोर्डिक देशमा प्रधानमन्त्री हुने तेस्रो महिला हुन् । उनले आफू राजनीतिमा आउनुको कारण र विश्वास पाएको कारणबारे सोचविचार गरेर अघि बढ्ने बताइन् । फिनल्यान्डमा गत अप्रिलमा भएको निर्वाचनमा पहिलो बनेका कारण सोसल डेमोक्र्याटिक दलकी नेता रहेकी मरिन प्रधानमन्त्री चयन भएकी हुन् ।

स्थानीय सञ्चारमाध्यमका अनुसार मरिनलाई उनकी आमाले एक्लै हुर्काएकी थिइन् । सन् २०१५ मा मरिनले आफू आफ्नो परिवारबाट विश्वविद्यालय जाने पहिलो व्यक्ति रहेको बताएकी थिइन् । सन् २०१५ मा सांसद बनेकी मरिन २७ वर्षकै उमेरमा टम्परे सरहको प्रशासन प्रमुखमा निर्वाचित भएकी थिइन् ।

प्रकाशित : मंसिर २४, २०७६ ०९:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×