क्याम्पसमा ४ हजार पेट्रोल बम

(एजेन्सी)

हङकङ — हङकङ प्रहरीले पोलिटेक्निकल युर्निभर्सिटि क्याम्पस (पीयूसी) बाट शुक्रबार करिब ४ हजार पेट्रोल बम बरामद गरेको छ । 

प्रहरीका अनुसार शुक्रबार बरामद गरिएका ३ हजार ९८९ वटा पेट्रोल बममध्ये १ हजार ३३९ वटा निकै विस्फोटक छन् । प्रहरीले क्याम्पस क्षेत्रमा सरसफाई गरि विश्वविद्यालय व्यवस्थापनलाई बुझाइएको जनाएको छ । हङकङमा लोकतन्त्रको मागसहित ६ महिनादेखि आन्दोलन गरिरहेका प्रदर्शनकारीले केही सातादेखि पीयूसीलाई मुख्य अखडा बनाएका थिए । विरोध प्रदर्शनका क्रममा गतसाता उक्त क्याम्पसमा प्रहरी तथा आन्दोलनकारीबीच हिंसात्मक झडपहरू भएका थिए ।

पीयूसी क्षेत्रमा भएको आन्दोलनका क्रममा प्रहरीले १ हजार ३७७ लाई पक्राउ गरेको थियो । तीमध्ये ८१० जनालाई पीयूसी परिसरबाट बाहिरिने क्रममा र ५६७ नजिकैबाट नियन्त्रणमा लिइएको थियो । पक्राउ परेकामध्ये ३१८ जना १८ वर्षमुनिका छन् । हङकङमा लोकतन्त्रको माग गर्दै गत जुनदेखि हरेक सप्ताहन्तमा विरोध प्रदर्शन गरिंदै आएको छ । विरोध चर्किंदै गएपछि प्रदर्शनकारीले बेइजिङ पक्षधर भनिएका व्यापारिक प्रतिष्ठानलाई ताकेर पेट्रोल बम प्रहार गरेका थिए ।

गत जुनमा विवादास्पद सुपुदर्गी विधेयक पारित गराउने सरकारी योजनाको विरोधमा प्रदर्शन सुरु भएको विरोध प्रदर्शन पछिल्ला दिनमा विधेयकको खारेजी तथा हङकङकी कार्यकारी प्रमुख क्यारी लामको राजीनामामा केन्द्रित छ ।

प्रदर्शनकारीलाई समर्थन गर्ने कानुनमा अमेरिकी राष्ट्रपति डोनाल्ड ट्रम्पले विहीबार हस्ताक्षर गरेपछि चीन र अमेरिकाबीच जारी तनाव थप उत्कर्षमा पुगेको छ । अमेरिकी राष्ट्रपतिले हस्ताक्षर गरेको ‘हङकङ मानव अधिकार र लोकतन्त्र ऐन’ मा हङकङले चीनबाट पर्याप्त स्वायत्तता हासिल गरे/नगरेकोबारे अमेरिकाले वार्षिक समीक्षा गर्ने व्यवस्था छ ।

ट्रम्पको कदमले चिढिएको बेइजिङले अमेरिकालाई ‘जवाफी कदम चाल्ने’ चेतावनी दिएको छ । चिनियाँ विदेश मन्त्रालयले ‘अमेरिकाले तथ्यलाई वेवास्था गरेको र सत्यलाई बंग्याएको तथा हिंसात्मक अपराधीलाई खुलमखुला समर्थन गरेको’ आरोप समेत लगाएको छ ।

प्रकाशित : मंसिर १४, २०७६ ०९:५९
प्रतिक्रिया
पठाउनुहोस्
ADVERTISEMENT

ट्रम्प अकस्मात् अफगानिस्तान पुगे : सेनालाई खाना बाँडे

(एजेन्सी)

(काबुल) — अमेरिकी राष्ट्रपति डोनाल्ड ट्रम्पले अफगानिस्तानको आकस्मिक भ्रमण गरेका छन् । ‘थ्यांक्स गिभिङ’ का अवसरमा बिनासूचना काबुल पुगेका ट्रम्पले अफगानिस्तानमा खटिएका अमेरिकी सैनिकलाई भेटे । 

बग्राम हवाई सैन्य अखडामा राष्ट्रपति ट्रम्पले सैनिकहरूलाई आफैंले पस्केर खाना दिए । उनीहरूसँगै बसेर खाए र सामूहिक तस्बिर खिचाए । समाचार संस्था एएफपीका अनुसार सैनिकलाई खाना खुवाउने क्रममा राष्ट्रपति ट्रम्पलाई जर्नेल मार्क मिलीले सहयोग गरेका थिए ।

बीबीसीका अनुसार भ्रमणका क्रममा ट्रम्पले अमेरिका र तालिवान विद्रोहीबीच वार्ता भइरहेको जानकारी गाएका थिए । सेनालाई सम्बोधन गर्दै ट्रम्पले भने, ‘तालिवान विद्रोहीले वार्तामार्फत् सहमतिको खोजी गर्न चाहिरहेका छन् ।’

भ्रमणका अवसरमा उनले अफगान राष्ट्रपति असरफ घानीसँग पनि भेटघाट गरेका छन् । त्यस क्रममा राष्ट्रपति घानीले ‘अन्तिम बलिदान’ दिएको भन्दै अमेरिकी सेनालाई धन्यवाद दिएका थिए । उनले भने, ‘अफगान फौजले आफ्नो नियन्त्रण कायम गर्दै गइरहेका छन् ।’ हाल अफगानिस्तानमा झन्डै १३ हजार अमेरिकी सैनिक तैनाथ छन् । सन् २००१ को सेप्टेम्बरमा अमेरिकामा भएका आतंकवादी आक्रमणपछि अमेरिकाले अफगानिस्तानमा सैनिक तैनाथ गरेको हो ।

१८ वर्षको अवधिमा तालिवान तथा इस्लामिक स्टेटविरुद्धको कारबाहीका क्रममा करिब २ हजार ४ सय सैनिको ज्यान गइसकेको छ । भ्रमणका क्रमा राष्ट्रपति ट्रम्पले अमेरिकाले अफगानिस्तानमा तैनाथ सैनिकको संख्या ८ हजार ६ सयमा झार्ने बताएका अन्तर्राष्ट्रिय सञ्चारमाध्यमले जनाएका छन् । तर कहिलेदेखि सैनिक संख्या घटाइनेबारे भने केही उल्लेख गरेका छैनन् ।

शान्तिवार्ताको पहल सुरु भएपछि हालै तालिवान विद्रोही र अमेरिकी पक्षबीच कतारको दोहामा वार्ता भएको थियो । तर औपचारिक वार्ता भने सुरु हुन सकेको छैन । शान्तिवार्ता थाल्ने उद्देश्यले अमेरिका र तालिवानबीच गतसाता बन्दी साटासाट गरेका थिए ।

अफगान अधिकारीले लामो समयदेखि तालिवानसँग युद्धविराम माग गर्दै आएका छन् । हाल तालिवानले आफ्नो नियन्त्रण कायम राखेको भू–भाग सन् २००१ यता कै सबैभन्दा ठूलो छ ।

यसअघि गत सेप्टेम्बरमा वासिङ्टननजिकैको क्याम्प डेभिडमा हुने भनिएको तालिवान अमेरिकी वार्ता अन्तिम समयमा स्थगित भएको थियो । ट्रम्पले अफगानिस्तानका राष्ट्रपति असरफ घानीसहित वरिष्ठ तालिवान नेतालाई वार्ताका लागि बोलाएका थिए । तर काबुलमा तालिवानले गरेको विस्फोटमा अमेरिकी सेनाको ज्यान गएपछि ट्रम्प क्रुद्ध भएका थिए ।

प्रकाशित : मंसिर १४, २०७६ ०९:५३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×