राजस्थानमा मरे हजारौं चरा

एजेन्सी

राजस्थान — भारतको राजस्थानस्थित सम्भर तालमा मंगलबार हजारौं चरा मृत भेटिएका छन् । मृत भेटिएका चरा दस प्रजातिका रहेका अधिकारीहरुले जनाएका छन् ।

ZenTravel

मृत भेटिएका चराको संख्या कम्तीमा ५ हजार रहेको स्थानीयले दाबी गरेका छन् । तर भारतीय अधिकारीले मृत चराको संख्या १ हजार ५ सय मात्र रहेको बताएका छन् ।

Meroghar

ठूलो संख्यामा मृत चरा भेटिएपछि स्थानीय तथा अधिकारीहरू आश्चर्यमा परेका भारतीय सञ्चारमाध्यमले जनाएका छन् । ‘हामीले कहिल्यै यस्तो देखेका थिएनौं । ५ हजारभन्दा चराहरू एकै ठाउँमा रहस्यमय रूपमा मरेका छन्,’ चरा जानकार स्थानीय अभिनभ वैष्णभले भने ।

पानीमा भएको खराबीका कारण चरा मरेका हुन सक्ने अनुमान अधिकारीहरुको छ । यद्यपि त्यसबारे परीक्षण तथा अध्ययन भइरहेको जनाइएको छ । विज्ञहरुका अनुसार ती चराहरु विभिन्न स्थानबाट बसाइँसराइका क्रममा राजस्थान पुगेका थिए ।

फरेस्ट रेन्जर राजेन्द्र जखरले केही समयअघि परेको बाक्लो असिनाका कारण चरा मरेका हुन सक्ने बताए । ‘हाम्रो अनुमानमा १ हजार ५ सय चरा मरेका छन् । पानीमा विषादी, जीवाणु तथा अन्य खराबी मिसिएको हुन सक्ने भएकाले यकिन गर्न हामीले परीक्षणका लागि नमुना पठाएका छौं,’ जखरले भने । तर अर्का एक अधिकारीले भने, बर्डफ्लुका कारण पनि चराको मरेका हुन सक्ने अनुमान गरेका छन् ।

सम्भर नुनिलो पानी पाइने भारतको सबैभन्दा ठूलो ताल हो । बसाइँसराइका क्रममा क्षेत्रमा बर्सेनि २ देखि ३ लाख चरा उक्त क्षेत्रबाट आवतजावत गर्छन् ।

प्रकाशित : कार्तिक २६, २०७६ २१:३०
ADVERTISEMENT
प्रतिक्रिया
पठाउनुहोस्
ADVERTISEMENT

अस्ट्रेलियाको डढेलो अनियन्त्रित

२ राज्यमा आपत्कालीन अवस्था घोषणा, ६०० विद्यालय तथा शैक्षिक संस्था बन्द
एजेन्सी

सिड्नी — अस्ट्रेलियाको पूर्वी तटीय क्षेत्रमा शुक्रबारदेखि फैलिएको डढेलो अनियन्त्रित भएको अधिकारीहरुले जनाएका छन् ।

डढेलोका कारण हालसम्म ३ जनाको मृत्यु भइसकेको छ भने दर्जनौं मानिस घाइते भएका छन् । बीबीसीका अनुसार करिब २ सय संरचना जलेर नष्ट भएका छन् । डढेलोका कारण केही पुल, विद्यालय, सरकारी भवन ध्वस्त हुनुका साथै विद्युत् लाइन अवरुद्ध छ ।

मंगलबार साँझसम्म राज्यका सयभन्दा बढी स्थानमा डढेलो सक्रिय रहेको जनाइएको छ । हालसम्म करिब १० लाख हेक्टर क्षेत्र डढेलोले ध्वस्त भएको जनाइएको छ । अधिकारीहरुले तीव्र गतिको हावाहुरी, उच्च तापक्रम र न्यून आद्रताका कारण डढेलो ‘तत्काल नियन्त्रण गर्न असम्भव देखिएको’ जनाएका छन् ।

अधिकारीहरुले मंलबारको डढेलोलाई सन् २००९ मा भिक्टोरियामा फैलिएको आगलागीसँग तुलना गरेका छन् । ‘कालो शनिबार’ नाम दिइएको उक्त घटनामा १ सय ७३ जनाको ज्यान गएको थियो ।

स्थानीय सञ्चारमाध्यमका अनुसार डढेलो विभिन्न सय स्थानमा सक्रिय छ । तीमध्ये ३ स्थानलाई उच्च खतरा रहेको भन्दै चेतावनी जारी गरिएको छ । न्यु साउथ वेल्समा मात्रै ६ सय विद्यालय तथा शैक्षिक संस्था बन्द गरिएको अन्तर्राष्ट्रिय सञ्चारमाध्यमले जनाएका छन् । न्यु साउथ वेल्सको शिक्षा विभागले आगलागी नियन्त्रणमा नआएसम्म विद्यालय बन्द गर्न यसअघि नै निर्देशन दिएको थियो ।

डढेलो विनाशकारी बन्दै गएपछि न्यु साउथ वेल्स र क्विन्सल्यान्ड राज्यमा एक साताका लागि आपत्कालीन अवस्थाको घोषणा गरिएको छ । आपत्कालीन अवस्थाको घोषणासँगै अग्नि नियन्त्रण निकायले सरकारी स्रोत अतिरिक्त प्रयोग गर्ने, इन्धन सेवा बन्द गर्ने तथा स्थानीयलाई सुरक्षित स्थानमा सार्ने अधिकार पाएको छ ।

अस्ट्रेलियाका बिमा कम्पनीहरुको प्रतिनिधिमूलक संस्था इन्स्युरेन्स काउन्सिलले डढेलोका कारण सिड्नीका अति प्रभावित क्षेत्रमा मात्र करिब ४ करोड डलरभन्दा बढीको क्षती भएको अनुमान गरेको छ ।

न्यु साउथ वेल्सको उत्तरी क्षेत्रमा करिब १ हजार किलोमिटर क्षेत्र समेट्दै अघि बढेको डढेलो अग्नि नियन्त्रकहरूले नियन्त्रण गर्ने प्रयास गरिरहेका जनाइएको छ । डढेलो अन्यत्र फैलन नदिन १ हजार ३ सय बढी अग्नि नियन्त्रक खटाइको छ ।

अस्ट्रेलियाका प्रधानमन्त्री स्कट मरिसनले डढेलो नियन्त्रणका लागि सरकारले सक्दो प्रयास गरिरहेको भन्दै मानिसलाई नआत्तिन भनेका छन् । उनले आवश्यकताअनुसार सेना परिचालन गर्न सरकार तयार रहेको बताएका छन् ।

यसअघि, मरिसनले अस्ट्रेलियामा पछिल्ला महिना पटकपटक ढडेलो फैलिएको भन्दै रोकथामका लागि हरेक नागरिक सचेत बन्नुपर्ने बताएका थिए । अस्ट्रेलियाले हरेक वर्ष डढेलोसँग जुध्दै आएको भए पनि यस वर्ष विगतको तुलनामा ठूलो क्षेत्रमा फैलिएको छ ।

प्रकाशित : कार्तिक २६, २०७६ १९:१६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×