विद्रोही आक्रमणमा ५३ सैनिक मारिए

(एजेन्सी)

बामाको — मालीको उत्तरपूर्वी क्षेत्रमा रहेका सैनिक पोस्टमा विद्रोहीले गरेको आक्रमणमा कम्तीमा ५३ सैनिकको मृत्यु भएको छ । मृतकमध्ये एक सर्वसाधारण छन् । 

सेनाले ट्वीट गर्दै ‘आक्रमणलाई आतंककारी हमला’ भनेको छ । इस्लामिक लडाकुहरूले गराएका पछिल्ला हिंसामध्ये यो ठूलो भएको अधिकारीहरूको भनाइ छ ।

नाइजरसँगको सिमामा पर्ने मेनका क्षेत्रको इन्डेलिमानमा रहेको सैनिक कार्यालयमा विद्रोहीले आक्रमण गरेका सरकारका प्रवक्ता याया सान्गारेले जनाएका छन् । उनले आक्रमणपछि उक्त स्थानको अवस्था सरकारी फौजको नियन्त्रणमा रहेको बताए ।

‘अहिले अवस्था नियन्त्रणमै छ, शव संकलन गरेर पहिचानको कार्य भइरहेको छ,’ उनले ट्वीटरमा लेखेका छन् । उनका अनुसार आक्रमण र क्षतिको पूर्ण विवरण आइसकेको छैन ।

अधिकारीहरूका अनुसार घटनाको हालसम्म कसैले जिम्मेवारी लिएको छैन । त्यस क्षेत्रमा अल कायदा आबद्ध जिहादीहरूको प्रभाव बढी रहेको मानिन्छ ।

सन् २०१२ मा इस्लामिक विद्रोहीले मालीको उत्तरी क्षेत्र आफ्नो नियन्त्रणमा लिएका थिए । त्यसलगत्तै फ्रान्स नेतृत्वको चलाइएको सुरक्षा कारबाहीमा उक्त भूभाग फिर्ता गरिए पनि शान्ति स्थापित हुन सकेको छैन भने मालीका अन्य स्थान तथा छिमेकी देशमा समेत हिंसा फैलिएको छ ।

सेप्टेम्बर अन्त्यमा बुर्किना फासोमा विद्रोहीले दुइटा सैनिक क्याम्पमा आक्रमण गरेका थिए । आक्रमणमा ३८ सैनिकको मृत्यु भएको थियो । माली, बुर्किना फासो, चाड, नाइजर र मौरिटानियामा फ्रान्सको सहयोगमा ‘जी ५ सहेल’ नामक प्रतिआतंकवादी कारबाही सञ्चालन गरिँदै आएको छ ।

प्रकाशित : कार्तिक १७, २०७६ ०९:४७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

लरीमा मृत भेटिएका सबै भियतनामी

(एजेन्सी)

लन्डन — बेलायतको एसेक्समा गतसाता एक लरीभित्र मृत भेटिएका सबै ३९ जना व्यक्ति भियतनामी भएको प्रहरीले बताएको छ । 

वाटरग्लेड औद्योगिक क्षेत्रको पूर्वी सडकमा रहेको लरीमा गतसाता ३९ जनाका शव भेटिएका थिए । मृतकमध्ये ३१ पुरुष र आठ महिला छन् । औद्योगिक क्षेत्रमा चिसो तापक्रम हुने व्यवस्था गरिएको लरीभित्र फेला परेका शव चिनियाँ नागरिकका भएको बताइएको थियो ।

एसेक्स प्रहरीले आफूहरू केही मृतकका भियतनाम र बेलायतस्थित परिवारका सदस्य तथा भियतनाम सरकारसँग निरन्तर सम्पर्कमा रहेको बताएको छ । केही भियतनामीले आफ्ना नजिकका व्यक्तिहरूको मृत्यु भएको हुन सक्ने बताएका प्रहरीको भनाइ छ ।

शव भेटिनुभन्दा केही समयअघि २६ वर्षीया एक महिलाले आफ्नो ‘विदेश यात्रा असफल’ भएको भन्दै परिवारका सदस्यलाई सन्देश पठाएकी थिइन् । मृत्युको कारण पत्ता लगाउन परीक्षण भइरहेको प्रहरी अधिकारीको भनाइ छ । टिम स्मिथले सबै मृतकहरू भियतनामी भएको लगभग यकिन भए पनि प्रहरी मृतकको सनाखत गर्ने अवस्थामा नरहेको बताए ।

लन्डनस्थित भियतनामी दूतावासले घटनाप्रति दु:ख व्यक्त गरेको छ । दूतावावासका अनुसार पीडितको परिचय खुल्न तथा दुई देशका सम्बन्धित निकायले पुष्टि गर्न अझै बाँकी छ । मृतकको शव भियतनाम पुर्‍याउन सम्बन्धित निकायहरूसँग समन्वय गर्ने तथा परिवारका सदस्यलाई सघाउने दूतावासको भनाइ छ । यसअघि एक भियतनामी पुरुषले आफ्ना ३० वर्षीय छोराको पनि मृत्यु भएको आफूलाई लागेको बताएका थिए । बेलायतस्थित भियतनामी समुदायका मानिसको एक संगठनले सम्पर्कविहीन २० जनाको तस्बिर प्रहरीलाई उपलब्ध गराइएको जनाइएको छ ।

लरीको कन्टेनरभित्र रेफ्रिजेरेटरको जस्तो चिसो हुने भएकाले तापक्रम २५ डिग्री सेल्सीयससम्म झर्न सक्छ । प्रारम्भिक विवरणहरूमा लरी बुल्गेरियाबाट आएको बताइए पनि सरकारले सन् २०१७ मा दर्ता
भएयता नफर्किएको जनाएको छ ।

शवहरू फेला परेपछि उत्तरी आयरलन्डका लरी चालक मोरिस रोबिन्सनलाई पक्राउ गरिएको थियो । उनलाई सोमबार अदालत पेस गरिएको थियो । उनीविरुद्ध ३९ जनाको हत्या गरेको अभियोग लगाइएको छ ।
सन् २००० को जुनमा बेलायतको डोभरमा एउटा लरीको पछाडि ५८ चिनियाँ आप्रवासीका शव भेटिएका थिए । लरी चालकलाई हत्या अभियोगमा जेल सजाय भएको थियो ।

संयुक्त राष्ट्रसंघले सन् २०१४ देखि बेलायत आउने क्रममा ज्यान गुमाएका आप्रवासीबारे अभिलेख राख्न सुरु गरेको हो । त्यसपछिका वर्षमा कन्टेनर वा लरीमा ५ जना आप्रवासीका शव भेटिएको थियो । सन् २०१४ मा युरोपमा आप्रवासी संकट सुरु हुनुअघिको तथ्यांक भने बेलायत सरकारसँग उपलब्ध छैन ।

प्रकाशित : कार्तिक १७, २०७६ ०९:४४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT