बेलायतमा एक कन्टेनरभित्र ३९ शव फेला,चालक पक्राउ

एजेन्सी

लन्डन — बेलायतको एसेक्सस्थित वाटरग्लेड औद्योगिक क्षेत्रको पूर्वी सडकमा राखिएको एउटा लरीको कन्टेनरभित्र ३९ वटा शव फेला परेका छन् । शवहरु मध्ये ३८ जना वयस्क र एक जना किशोरको रहेको बताइएको छ । 

प्रहरीका अनुसार उक्त लरी बल्गेरियाबाट होलिहेड हुँदै शनिबार बेलायत छिरेको थियो । हत्याको आशंकामा प्रहरीले नर्दन आयरल्यान्डका २५ वर्षीय लरी चालकलाई पक्राउ गरेको छ ।


शवहरुको पहिचान गर्ने प्रयास भइरहेको एसेक्स प्रहरीले जनाएको छ । बेलायती प्रधानमन्त्री बोरिस जोनसनले घटनाबाट आफू स्तब्ध भएको बताउँदै घटनाबारे निरन्तर जानकारी लिइरहेको जनाएका छन् । प्रहरीले औद्योगिक क्षेत्र बन्द गरेर घेराबन्दी गरेको छ ।

राष्ट्रिय अपराध अनुसन्धान विभागले घटनाबारे छानबिन गर्नका लागि अनुसन्धान अधिकृतहरु त्यस क्षेत्रमा खटाइएको जनाएको छ ।

यसअघि सन् २००० मा ५८ जना चिनियाँ आप्रवासीको शव लरीको पछाडि फेला पारिएको थियो । डोभरमा भएको उक्त घटनामा दुई जना भने जीवितै थिए ।

प्रकाशित : कार्तिक ६, २०७६ १६:५९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

भारत–पाक तनाव : गोली हानाहानपछि आरोप–प्रत्यारोप

एजेन्सी

श्रीनगर/इस्लामाबाद — भारत–पाकिस्तान सीमाक्षेत्र कश्मीरमा गोली हानाहान भएपछि दुई देशबीच फेरि तनाव चर्किएको छ ।

उनीहरूले एकअर्कालाई गोलाबारी गरेको आरोप लगाएका छन् । घटनामा दुवैतिर सैनिक तथा गैरसैनिक नागरिकको मृत्यु भएको छ । भारत र पाकिस्तान दुवैले एकअर्कालाई युद्धविराम भंग गरेको आरोप लगाउँदै आफूहरु प्रतिकारमा उत्रेको दाबी गरेका छन् ।

परमाणु हतियार सम्पन्न दुई देशबीच कश्मीर विवादका कारण दुई पटकसम्म युद्ध भइसकेको छ । तर पछिल्लो समय कश्मीर मुद्दाका कारण भारत र पाकिस्तानबीच तनाव निकै बढेको हो ।

फेब्रुअरीमा कश्मीरमा गरिएको एक आत्मघाती आक्रमणमा भारतीय सशस्त्र फौजका ४६ जवानको मृत्यु भएपछि भारतले पाकिस्तानमा हवाई आक्रमण गरेको थियो । पुलवामामा गरिएको आत्मघाती बम आक्रमणको पाकिस्तानस्थित विद्रोही समूह जैस–ए–मोहम्मदले जिम्मेवारी लिएको थियो ।

त्यसका कारण बढेका दुई देशका तनाव गत अगस्टमा भारतले कश्मीरको विशेषाधिकार खारेज गरेपछि पाकिस्तानले त्यसको विरोध गर्‍यो । भारतीय निर्णयविरुद्ध अन्तर्राष्ट्रिय समर्थन खोजिरहेका पाकिस्तानी प्रधानमन्त्री इमरान खानले यो मुद्दा राष्ट्रसंघलगायतमा उठाइसकेका छन् ।

कश्मीर आफ्नो स्वामित्वमा हुनुपर्ने भारत र पाकिस्तान दुवैको दाबी छ । कश्मीरमा सन् २००३ मा युद्धविराम गर्ने भारत र पाकिस्तानबीच भएको सहमति पछिल्लो वर्षको तनावले जोखिममा परेको आंकलन गरिएको छ । दुई देशका सैनिकबीच सीमावर्ती कुपवारा जिल्लाका दुई गाउँमा आइतबार गोलाबारी भएको थियो । तर दुई पक्षका दाबी फरक छन् । पाकिस्तानले गैरसैनिकलाई तारो बनाएको भारतको आरोप छ ।

भारतीय सेनाप्रमुख विपीन राउतले भारतीय पक्षले गरेको लडाकु लक्षित आक्रमणमा कम्तीमा ६ पाकिस्तानी सैनिकको मृत्यु भएको तथा ३ शिविर नष्ट भएको दाबी सञ्चारमाध्यमलाई बताएका छन् ।

पाकिस्तानी सेनाका प्रवक्ता असिफ गफुरले भारतले युद्धविराम भंग गरेको तथा ‘नियतवश गैरसैनिकलाई तारो बनाएको’ आरोप लगाएका छन् । उनले आफ्नो प्रतिकारात्मक कारबाहीमा ९ भारतीय सैनिकको ज्यान गएको र अन्य केही घाइते भएका दाबी गरे ।

पाकिस्तानी पक्षले हालसम्म कम्तीमा २ हजारपटक युद्धविरामको नियमविपरीत कारबाही गरेको भारतीय गृह मन्त्रालयको दाबी छ । ती घटनामा भारतका २१ जनाको मृत्यु भएको उसको भनाइ छ । यस वर्ष सीमाक्षेत्रमा भारतीय पक्षबाट भएको कारबाहीमा १४ सैनिकसहित ४५ जनाको मृत्यु भएको पाकिस्तानको दाबी छ ।

प्रकाशित : कार्तिक ४, २०७६ २१:२९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×