सिरियामा टर्कीको आक्रमण : प्रतिकार गर्न सेना र कुर्द एकजुट

एजेन्सीहरू

अंकारा/बेरुत — सिरियाको उत्तरी सीमामा टर्कीले गरेको आक्रमणको प्रतिकार गर्न सरकारी सेना र कुर्दिस लडाकु एकजुट भएका छन् । 

सिरियाली सञ्चारमाध्यमले सरकारी फौज देशको उत्तरी सीमामा पठाइएको बताएको केहीबेरमा कुर्दिस लडाकुले त्यसको पुष्टि गरेको बीबीसीले उल्लेख गरेको छ ।

सिरियाली जिहादी समूह इस्लामिक स्टेट (आईएस) लाई परास्त गर्ने अमेरिकी अभियानमा कुर्द नेतृत्वको सिरियन डेमोक्रेटिक फोर्सेस (एसडीएफ) ले सघाउँदै आएको थियो । तर एसडीएफलाई टर्कीले आतंककारी समूह बताउँदै गतसातादेखि उनीहरू लक्षित आक्रमण गरेको हो ।

अमेरिकी राष्ट्रपति डोनाल्ड ट्रम्पले सिरियामा खटिएका अमेरिकी सेना फिर्ताको निर्णय गरेलगत्तै टर्कीले आक्रमणलाई तीव्रता दिएको हो । ट्रम्पको निर्णयको देशभित्रै पनि विरोध भइरहेको छ ।

अन्तर्राष्ट्रिय सञ्चारमाध्यमले कुर्द नेतृत्वको प्रशासनलाई उद्धृत गर्दै उत्तरी सिरियाको सबै सीमामा सिरियाली सैनिक परिचालित हुने सहमति भएको जनाएका छन् ।
सिरियाली सेनाले एसडीएफलाई टर्कीको आक्रमणको प्रतिकार गर्न तथा टर्कीको सेना वा उसले खटाएका अन्य लडाकुलाई लखेट्न सक्ने एसडीएफको अपेक्षा छ । कुर्द प्रशासनले पछिल्लो सहमतिले ‘टर्कीद्वारा कब्जा गरेका सिरियाली सहरलाई मुक्त गर्न सघाउने’ बताएको छ ।

अमेरिकाको संरक्षण गुमाएलगत्तै कुर्दहरूले सिरियासँग गरेको गठबन्धनलाई महत्त्वपूर्ण तथा रणनीतिक मानिएको छ । तर सिरिया सरकारले के कस्तो सहयोग गर्ने भन्ने यकिन भने छैन ।

टर्कीको सेनाले एसडीएफको नियन्त्रणमा रहेका क्षेत्रमा स्थल तथा हवाई आक्रमण गरिरहेको छ । सिरियास्थित जिहादी समूह इस्लामिक स्टेटलाई हराउने क्रममा कुर्दहरू अमेरिकाका मुख्य सहयोगी थिए ।

टर्किस फौजले ‘अपरेसन पिस स्प्रिङ’ अन्तर्गत आफूहरूले आतंककारीका आश्रयस्थल ध्वस्त पार्न’ कारबाही चलाएको बताउने गरेको छ । टर्कीका राष्ट्रपति रेसेप तैयप इर्दोगानले ‘युफ्रेटिज नदीको पूर्वी क्षेत्रका कुर्द लडाकुलाई विस्थापित गरी सिरियाली शरणार्थीका लागि सुरक्षित क्षेत्र निर्माण गर्न कारबाही सुरु गरेको’ बताउँछन् ।

कुर्दिस र टर्किस फौजबीचको भिडन्तपछि आईएस आबद्ध करिब ८ सय जना भागिसकेका जनाइएको छ । निगरानी समूह ‘सिरियन अब्जर्भेटरी फर ह्युमन राइट्स’ का अनुसार टर्कीको आक्रमणका कारण हालसम्म ५० सर्वसाधारण र १०० सयभन्दा बढी कुर्द लडाकु मारिइसकेका छन् ।

यद्यपि, टर्कीले ४ सय ५० कुर्द लडाकुको मृत्यु भएको दाबी गरेको छ । आफूतर्फ १८ सर्वसाधारण तथा ४ सैनिक मारिएको उसको भनाइ छ । एसडीएफले टर्कीको दाबी खण्डन गर्दै आफ्ना ५६ लडाकु मारिएका जनाएको छ ।

आक्रमणपछि टर्कीले सिरियाली सीमाक्षेत्रका सहर तल अब्याद तथा रस अल–ऐनमाथि कब्जा जमाएको बीबीसीले उल्लेख गरेको छ ।

प्रकाशित : आश्विन २८, २०७६ १०:१८
ADVERTISEMENT
प्रतिक्रिया
पठाउनुहोस्
ADVERTISEMENT

क्याटालोनियाका ९ नेतालाई जेल सजाय

स्वतन्त्रतासम्बन्धी विवादास्पद जनमतसंग्रहमा राजद्रोह तथा सार्वजनिक सम्पत्ति हिनामिना गरेको स्पेनको सर्वोच्च अदालतको ठहर
(एजेन्सी)

बार्सिलोना — स्पेनको सर्वोच्च अदालतले क्टालोनियाका ९ जना नेतालाई ९ देखि १३ वर्षसम्मको जेल सजाय तोकेको छ । 

क्याटालोनियमा सन् २०१७ मा गरिएको स्वतन्त्रतासम्बन्धी जनमतसंग्रहमा उनीहरूले राजद्रोहको कार्य गरेको अदालतको ठहर छ । अन्य ३ जना स्वतन्त्रता पक्षधर कार्यकर्तालाई पनि अदालतले अवज्ञा गरेकोमा दोषी ठहर गरे पनि जरिवाना मात्र तिराउने फैसला गरेको छ ।

सबै १२ जनाले आफूमाथिका आरोप अस्वीकार गर्दै आएका छन् । नेताहरूलाई जेल सजाय तोकेसँगै अदालतले पूर्व क्याटालान नेता कार्लेस पुइग्डेमोन्टलाई नयाँ पक्राउ आदेश जारी गरेको छ । उनी हाल स्वेच्छिक निर्वासनका क्रममा बेल्जियममा छन् ।

पुइग्डेमोन्टलाई ‘राजद्रोह र सार्वजनिक सम्पत्ति हिनामिना गरेको’ ठहर भएपछि उनीमाथि नयाँ युरोपेली तथा अन्तर्राष्ट्रिय पक्राउ पुर्जी जारी गरिएको हो । उनी सन् २०१७ मा मुद्दा दायर गरिएपछि भागेर बेल्जियम पुगेका हुन् ।

सजाय सुनाइएकामध्ये केही क्याटालोनिया सरकार तथा संसद्का मुख्य पदमा छन् भने केही कार्यकर्ता तथा सांस्कृतिक अभियन्ता छन् । म्याड्रिडस्थित अदालतमा चार महिनासम्म चलेको सुनुवाइका क्रममा अदालतसमक्ष उनीहरूले ‘आफूहरू गलत आरोपसहित लगाइएका मुद्दाले अन्यायमा परेको’ दाबी गरेका थिए ।

क्याटालोनियाका पूर्वउपाध्यक्ष ओरिओल जन्क्वेरासलाई १३ वर्ष लामो कारावास सजाय सुनाइएको हो । अदालतले उनलाई ‘राजद्रोह तथा सार्वजनिक कोषको दुरुपयोग’ मा दोषी ठहर गरेको हो । अभियोजनकर्ताले उनीमाथि २५ वर्षको जेलसजाय माग गरेका थिए । क्याटालान क्षेत्रका पूर्वश्रममन्त्री डोलर्स बास्सा, सरकारका पूर्वप्रवक्ता जोर्डी टुरुल, बाहृय मामलासम्बन्धी पूर्वमन्त्री राउल रोमेभालाई १२ वर्षको कारावास सजाय सुनाइएको छ । त्यसैगरी, संसदका पूर्वप्रवक्ता, आन्तरिक मामलासम्बन्धी पूर्वमन्त्री, क्याटालान क्षेत्रका पूर्वमन्त्री, क्याटालान राष्ट्रियसभाका पूर्वअध्यक्ष तथा दुई अभियन्तासमेतलाई कारावास सजाय सुनाइएको हो । जन्क्वेरासले ‘राजनीतिक विचारधारका आधारमा आफूहरूलाई जेल हालिएको दाबी गर्दै पृथकतावादीहरू झन् कडा हुने’ प्रतिक्रिया दिएका छन् । क्याटालोनियाका पूर्वअध्यक्ष पुइग्डेमोन्टले ‘पृथकतावादी नेताहरूमाथि सबै गरी सय वर्षको जेल सजाय तोकिनु अमानवीय भएको’ बताएका छन् ।

‘अहिलसम्मभन्दा धेरै, अब पहिलेको तुलनामा झन् चर्को प्रतिक्रिया जनाउने समय आएको छ,’ पुइग्डोमेन्टले थपे, ‘हाम्रो भविष्यका लागि, हाम्रा छोराछोरीका लागि । अनि लोकतन्त्र, क्याटालोनिया र युरोपका लागि ।’

अदालतको फैसला सार्वजनिक भएसँगै स्वतन्त्रता पक्षधरहरूले क्याटालोनियाको राजधानी बार्सिलोनामा विरोध र्‍याली आयोजना गरेका छन् । उनीहरूले मुख्य सहरका सडकहरू अवरुद्ध पारेका छन् ।

फैसलाको विरोधमा विद्यार्थीहरू क्याटालोनियको झन्डा तथा ब्यानरसहित विरोधमा उत्रेका बीबीसीले जनाएको छ । विरोध प्रदर्शनमा सहभागीले ‘यो न्याय होइन, बदला हो’ भन्दै नाराबाजी गरेका थिए ।

फुटबल क्लब बार्सिलोना र क्याटालन फुटबल संघले कारावास सजायको भर्त्सना गर्दै ‘वार्ता र समझादी’ का आधारमा समस्या सुल्झाउन आग्रह गरेको छ । संघले नेताहरू र उनीहरूका परिवारप्रति ऐक्बद्धता जनाउन क्याटालोनिया क्षेत्रका सबै फुटबल खेल स्थगित गर्ने घोषणासमेत गरेको छ ।

सन् २०१७ मा क्याटालोनियको स्वतन्त्रताका लागि गरिएको जनमतसंग्रहमा पृथकतावादी पक्षधरले बहुमत हासिल गरेका थिए । त्यसलगत्तै क्षेत्रीय संसद्मा क्याटालोनिया स्पेनबाट स्वतन्त्र हुने प्रस्ताव लगिएपछि केन्द्र सरकारले हस्तक्षेप गरेको थियो । त्यसलगत्तै स्पेनको संवैधानिक अदालतले जनमतसंग्रहलाई अवैध घोषित गरेपछि क्याटालोनियामा संघर्ष चर्केको हो ।

प्रकाशित : आश्विन २८, २०७६ १०:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×