हुथीको प्रस्तावप्रति साउदी सकारात्मक

(एएफपी)

रियाद — गृहयुद्धका कारण संकट व्यहोरिरहेको यमनको मुख्य विद्रोही हुथी समूहले अघि सारेको शान्तिको प्रस्तावलाई छिमेकी मुलुक साउदी अरेबियाले सकारात्मक रुपमा लिइएको प्रतिक्रिया दिएको छ । साउदी अरेबियाले यमनी विद्रोहीले आफ्ना तर्फबाट प्रस्तावको कार्यान्वयन भएमा थप सहकार्य गर्न सकिने जनाएको छ ।

सन् २०१५ देखि साउदी अरेबियाको अग्रसरतामा बनेको गठबन्धनले हुथी विद्रोही विरुद्ध आक्रामक कारबाही गरिरहेको छ । साउदीले हुथी विद्रोहीलाई इरानले समर्थन गरेको आरोप लगाउादै यमनमा अन्तरराष्ट्रियरुपमा मान्यताप्राप्त सरकारलाई खुलेर समर्थन गरिरहेको छ, तर यमनी सरकार मुलुकको राजधानी सानामा हुथीको कब्जा रहेकाले अन्यत्रबाट शासन सञ्चालन गरिरहेको छ । यस द्वन्द्वका कारण हजारौं व्यक्तिको मृत्यु भइसकेको छ । मारिएकामा अधिकांश व्यक्ति सर्वसाधारण नागरिक रहेको मानवीय सहायतासम्बन्धी निकायले जनाएका छन् । राष्ट्रसंघले यमनमा मानवीय संकट नै उत्पन्न भएको बताउादै आएको छ ।

साउदी अरेबियाका उपरक्षामन्त्री राजकुमार खालिद बिन सल्मानले ट्वीट गर्दै यमनमा घोषणा गरिएको शान्तिकार्यलाई साउदी अरेबियाले सकारात्मकरुपमा लिएको र त्यसको व्यवहारिक कार्यान्वयन भएको साउदी अरेबियाले हेर्न चाहेको बताए ।

गत सेप्टेम्बर २१ मा हुथी समूहले साउदी अरेबियासाग शान्ति कायम गर्न तयार रहेको घोषणा गरेका थिए । तर साउदी गठबन्धनका तर्फबाट निरन्तर हवाई आक्रमण भएपछि शान्तिको आशा टर्दै गएको थियो ।

साउदी अरेबियाले हुथी विद्रोहीको ‘कुरा होइन कार्य’का आधारमा मूल्यााकन गरिने स्पष्ट गरेको छ । सोमबार हुथी विद्रोहीले डिसेम्बर २०१८ मा राष्ट्रसंघको अगुवाईमा भएको शान्ति सम्झौता बमोजिम २९० जना युद्धबन्दीलाई मुक्त गरिएको बताएका थिए । राजकुमार खालिदले यमनमा उत्पन्न पछिल्लो परिस्थितिबाट इरानले लाभ लिन चाहेको आरोप लगाएका छन् ।

प्रकाशित : आश्विन १९, २०७६ ०८:२०
प्रतिक्रिया
पठाउनुहोस्
ADVERTISEMENT
ADVERTISEMENT

साउदीमा जमरा लहलह

होम कार्की

काठमाडौं — साउदी अरबको राजधानी रियादस्थित डाइट सेन्टरको क्याम्पमा उमारिएको जमरा लहलह परेको छ । यो क्याम्पमा अर्घाखाँचीका भूपेन्द्र थापा, तनहुँका सोमलाल पौडेल, सुकुबहादुर थापामगर र गुल्मीका मिलन थापा मिलेर जमरा उमारेका हुन् । 

डाइट सेन्टरमा ६० नेपाली काम गरिरहेका छन् । विजयादशमीको दिन डिउटी सकेर क्याम्पमा आएपछि उनीहरू एकै ठाउँमा भेला भएर निधारमा टीका र कानमा जमरा सिउरिने योजना बनाएका छन् । ‘हरेक दिन विधि पुर्‍याएर नै जमरा कोठामा पूजा भइरहेको छ,’ भूपेन्द्रले भने, ‘हामी बस्ने कोठाको कुनामा जमरा राखिएको छ । यो जमरा गाउँघरमै जस्तै देखिएको छ ।’ जमरा सप्रेको देख्दा क्याम्पका साथीहरू उत्साहित छन् । जमरासँग सेल्फी हान्दै आ–आफ्ना घरमा फोटो पठाउनेहरूसमेत छन् । ‘क्याम्पमा जमरा लहलह पर्दा मन पुलकित हुँदो रहेछ । दसैं साउदीमै भित्रिएजस्तो लागिरहेको छ,’ उनले भने ।

भूपेन्द्र सन् २००३ देखि साउदीमा काम गर्दै आइरहेका छन् । पुरानो कामदार भएकाले कम्पनीले उनको कुरा सुन्ने गर्छ । ‘हाम्रो जीवन नै विदेशमै बित्ने भयो । विदेशमा बस्नेलाई सबभन्दा बढी नरमाइलो हुने क्षण नै चाडपर्वमा हो । घरमा जान नपाए पनि रोएर बस्ने कुरा हुँदैन । सबै साथीहरूको पीडा एउटै हुन्छ । आफ्नै परिवार र आफन्त भेट नभए पनि साथीहरू त छौं नि,’ उनले भने, ‘विजयादशमीको दिन कम्पनीभन्दा बाहिर रहेका नजिकका साथीहरूलाई पनि आमन्त्रण गरेका छौं । कम्पनीमा रहेका नेपालीमध्ये सबभन्दा जेठो व्यक्तिबाट टीका ग्रहण गर्नेछौं ।’

यसपटक विजयादशमी मंगलबार छ । खाडीमा साप्ताहिक बिदा शुक्रबार हुन्छ । ‘प्रवासीको दसैं जहिले छुट्टी मिल्छ त्यहीले मनाउने हो । हामीले त यसपालिको दसैं शुक्रबार नै मनाइसक्यौं’, लिखु गाउँपालिका–२, नुवाकोटका नवराज लामिछानेले भने, ‘खसीबजारमा गएर खसी ल्यायौं । हरेक क्याम्पमा खसी ढालिएको छ ।’ रियादको अजेजियामा खसी किन्ने नेपालीको भीड थियो । ‘खसी बेच्नेहरूलाई नेपालीको दसैं आयो भन्ने थाहा छ । दसैंमा खसीको मूल्य नै बढेको छ । ३/४ सय रियालमा पाउने खसीको भाऊ बढेर ६ सयदेखि ९ सय रियाल पुगेको छ,’ उनले भने । साउदीमा छालासहितको खसीको मासु बजारमा किन्न पाइँदैन । छालासहितको मासु बिक्री गर्न रोक छ । धेरैजसो नेपालीले छालासहितको मासु मन पराउने हँुदा आफैं खसी मार हान्छन् । ‘कोठामा लगेर पकाएर खाने हो । कम्पनी आफैंले भने मेसमा मिसाउन दिँदैन,’ उनले भने । उनले इस्तारा (पार्टी प्यालेस) भाडामा लिएर साथीभाइ नाचगान गर्ने गरेको बताए । ‘आवासीय र अपिस क्षेत्रमा इस्तारा छैन । मुख्य सहर बाहिरमात्रै निजी कम्पनीहरूले इस्तारा चलाएका छन् । हामी इस्तारा भाडामा लिन्छौं । इस्ताराभित्रै बसेर टीका लगाउँछौं । यसमा प्रशासनले रोकतोक गर्दैन’, उनले भने ।

मुस्लिम राष्ट्र साउदी अरबमा नेपालीले भित्र टीका लगाएपछि सडकमा निस्कने गरेका छैनन् । ‘टीका लगाइसकेपछि क्याम्पभित्रै बस्ने हो । रातो टीका भएको निदार बोकेर बाहिर निस्कने आँट कसैको हुँदैन,’ उनले भने, ‘कतारजस्तो खुल्ला छैन ।’ कतारमा बेग्लै रौनक छ । साउदीमा विजयादशमीको दिन कामदारलाई बिदा छैन । कतारमा धेरैजसो कम्पनीले नेपाली कामदारलाई बिदा दिने गर्छन् । बहुराष्ट्रिय कम्पनी युनाइटेड प्रिकास्ट कम्पनीले विजयादशमीको दिन बिदा दिएको छ । यो कम्पनीमा ३ सय नेपाली काम गर्छन् । ‘यस्तो बेला परिवार सँगै बस्न नपाए पनि भिडियो च्याटबाट टीकामा सहभागी हुन बिदा दिइएको छ । कमसेकम परिवारले पनि नजिकको महसुस गर्छन्,’ कम्पनीका म्यानेजर सन्जिव रानाभाटले भने ।

दसैंका लागि कम्पनीका तर्फबाट कामदारलाई खसीसमेत उपहार दिने गरिएको छ । इमेज कम्पनीले ६ सय कामदारलाई खसी उपलब्ध गराएको जानकारी म्यानेजर राजन श्रेष्ठले दिए । ‘यस पटक नेपालबाट आमा आउनुभएको छ । उहाँलाई नै क्याम्पमा लिएर जाने हो । सबैलाई आमाको हातबाट टीका लगाइदिने योजनामा छौं,’ उनले भने । टीका जमरा लगाइसकेपछि कामदारहरू खुल्ला रूपमा बाहिर निस्कने गर्छन् । ‘विस्तारै गर्मी कम भइरहेको छ । । बाहिर हिँडडुल गर्न केही सहज छ,’ खोटाङका केदार बानियाँले भने ।

खाडी पुगेका साथीहरू एकआपसमा संगठित छन् । उनीहरूका संघसंस्था दसैं मनाउन सक्रिय छन् । ‘यहाँ पनि भलिबल, फुटबल प्रतियोगिता हुन्छ । जित्नेलाई खसी दिइन्छ । हाम्रो गाउँमै पुगेको जस्तो हुन्छ’, यूएईमा रहेका सिन्धुपाल्चोकका रमेश लुइँटेलले भने, ‘तैपनि प्रवासीका दसैं सिमलको भुवा जस्तै लाग्छ । जे जस्तो भए पनि हामी बाध्यतामा पनि रमाउन जानेका छौं ।’

बिदामा घर फिर्न नपाउनेहरूले परिवार नै आफ्नो कार्यस्थल बोलाउन थालेका छन् । कतारले ट्राभल एजेन्सीको जिम्मेवारीमा भिजिट भिसा दिन थालेपछि परिवारलाई बोलाउन सजिलो भएको हो । ‘दसैंमा कतारबाट नेपाल जाने टिकट छैन । नेपालबाट आउने टिकट सस्तोमा पाइएको छ । मैले यता नै परिवार र छोरीलाई बोलाएँ,’ झापाका उमेश श्रेष्ठले भने, ‘परिवार यतै आएपछि झन रमाइलो हुने भयो ।’

प्रकाशित : आश्विन १९, २०७६ ०८:१८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT